స్మోకింగ్తో పాడయ్యేది లంగ్స్ మాత్రమే కాదా? అవి కూడా ప్రమాదంలో పడతాయా
ధూమపానం ఊపిరితిత్తులు మరియు గుండెపై చూపే ప్రభావాల గురించి అందరికీ తెలుసు. కానీ, ఇది మీ ఎముకల బలాన్ని, వెన్నెముక ఆరోగ్యాన్ని కూడా పూర్తిగా దెబ్బతీస్తుందనే విషయం చాలామందికి తెలియదు. సిగరెట్లు లేదా పొగాకు ఉత్పత్తులలోని నికోటిన్ రక్త ప్రసరణను అడ్డుకుని, ఎముకలకు అందాల్సిన ఆక్సిజన్ మరియు పోషకాలను తగ్గిస్తుంది. దీనివల్ల ఎముకల సహజ మరమ్మత్తు ప్రక్రియ మందగిస్తుంది. ఎముకలు బలంగా ఉండాలంటే నిరంతరం పునరుద్ధరణ జరగాలి, కానీ పొగాకు ఈ ప్రక్రియను ఆటంకపరుస్తుంది.
శస్త్రచికిత్సలు జరిగినప్పుడు లేదా ఎముక విరిగినప్పుడు గాయం మానాలంటే రక్త ప్రసరణ చాలా కీలకం. పొగాకు వాడటం వల్ల ఈ రక్త ప్రసరణకు అంతరాయం కలిగి, విరిగిన ఎముకలు అతుక్కోవడానికి చాలా సమయం పడుతుంది. కొన్ని సందర్భాల్లో ఎముకలు అస్సలు అతుక్కోవు, దీనిని ‘నాన్-యూనియన్’ అంటారు. మీరు ఎన్ని ఖరీదైన చికిత్సలు చేయించుకున్నా, శరీరంలో రక్త ప్రసరణ సక్రమంగా లేకపోతే గాయాలు మానడం కష్టమని వైద్యులు హెచ్చరిస్తున్నారు.
వెన్నెముకకు ముప్పు..
వెన్నెముకలో ఉండే డిస్కులు మనకు కుషన్ లాగా పనిచేసి షాక్ అబ్జార్బర్లుగా ఉంటారు. పొగాకు వాడకం వల్ల శరీరానికి సరైన పోషణ, హైడ్రేషన్ అందక ఈ డిస్కులు త్వరగా పాడవుతాయి. ఫలితంగా నడుము నొప్పి, డిస్క్ ప్రోలాప్స్ వంటి సమస్యలు వస్తాయి. చాలామంది యువత తమ వెన్నునొప్పికి కారణం పొగాకు అని తెలుసుకోలేక ఇబ్బంది పడుతుంటారు. అలాగే, పొగాకు వల్ల ఎముకల సాంద్రత తగ్గి, ఎముకలు పెళుసుగా మారే ‘ఆస్టియోపోరోసిస్’ సమస్య తలెత్తుతుంది. ఇది హిప్, వెన్నెముక మరియు మణికట్టు ఎముకలు విరిగే ప్రమాదాన్ని పెంచుతుంది.
చాలామంది పొగ పీల్చడం మానేసి, గుట్కా లేదా నమలే పొగాకును సురక్షితమని భావిస్తారు. ఇది పూర్తిగా అపోహ మాత్రమే. పొగాకును ఏ రూపంలో తీసుకున్నా, నికోటిన్ మీ ఎముకల జీవక్రియను దెబ్బతీస్తుంది. నికోటిన్ రక్తంలో కలిసి ఎముకల ఆరోగ్యంపై ప్రతికూల ప్రభావం చూపుతుంది.
పరిష్కారం మీ చేతుల్లోనే!
ఒక్కసారి పొగాకు వాడకాన్ని ఆపగానే మీ శరీరం తిరిగి కోలుకోవడం మొదలవుతుంది. ఆర్థోపెడిక్ సర్జరీలకు లేదా ఫ్రాక్చర్ రికవరీకి ముందు పొగాకు అలవాటు మానేసిన వారిలో గాయాలు చాలా వేగంగా మానిపోతాయని వైద్యులు చెబుతున్నారు. మీకు నిరంతరం నడుము నొప్పి లేదా తరచుగా ఎముకలు విరుగుతుంటే, మీ అలవాట్లను ఒకసారి సమీక్షించుకోండి. పొగాకు మీ ఎముకలను లోపలి నుంచి బలహీనపరుస్తోంది. ఇప్పటికైనా ఈ వ్యసనానికి దూరంగా ఉండి, మీ ఎముకలను దృఢంగా కాపాడుకోండి. ఆరోగ్యం పట్ల సరైన అవగాహనతోనే మనం సంపూర్ణమైన జీవితాన్ని గడపగలం.