సైక్లింగ్ చేస్తే జరిగే అద్భుత మార్పులపై వాతావరణ శాస్త్రవేత్తల షాకింగ్ కామెంట్స్
శారీరక వ్యాయామాన్ని, వాతావరణ మార్పులను విడివిడిగా చూడకూడదు. ఈ రెండింటినీ కలిపి పరిష్కరించినప్పుడే అటు పర్యావరణానికి, ఇటు ప్రజారోగ్యానికి మేలు జరుగుతుంది. ఉదాహరణకు, మనం కారుకు బదులు సైకిల్ వాడితే కార్బన్ ఉద్గారాలు తగ్గడమే కాకుండా, మన గుండె ఆరోగ్యం మెరుగుపడుతుంది. సీజన్కి అనుగుణంగా ఎలాంటి వ్యాయామాలు చేయాలో తెలుసుకుందాం..
పర్యావరణ కాలుష్యం, భూతాపం వంటి సమస్యలు ప్రపంచాన్ని వణికిస్తున్న వేళ.. వీటికి పరిష్కారం కేవలం పెద్ద పెద్ద యంత్రాల్లోనో, టెక్నాలజీలోనో లేదు, మన కాళ్ల కిందే ఉందని శాస్త్రవేత్తలు చెబుతున్నారు. మనం రోజూ చేసే నడక, సైక్లింగ్ వంటి చిన్న చిన్న పనులు వాతావరణ మార్పులను అడ్డుకోవడమే కాకుండా, మన ఆరోగ్యాన్ని కూడా మెరుగుపరుస్తాయని తాజా అధ్యయనాలు వెల్లడిస్తున్నాయి. న్యూజిలాండ్లోని ఆక్లాండ్ యూనివర్సిటీ ఆఫ్ టెక్నాలజీ పరిశోధకులు రూపొందించిన ‘ఫిజికల్ యాక్టివిటీ అండ్ క్లైమేట్ చేంజ్ మోడల్’ ఇప్పుడు ప్రపంచవ్యాప్తంగా చర్చనీయాంశమైంది.
వాతావరణం – వ్యాయామం మధ్య సంబంధం..
తీవ్రమైన ఎండలు, ఆకస్మిక వరదలు వంటి పరిస్థితులు ప్రజలు బయటకు వెళ్లి వ్యాయామం చేయడానికి అడ్డంకిగా మారుతున్నాయి. దీనివల్ల నడక, సైక్లింగ్ వంటి పనులు తగ్గిపోతున్నాయి. వాహనాలపై ఆధారపడటం పెరగడం వల్ల మళ్లీ కార్బన్ ఉద్గారాలు పెరిగి వాతావరణం మరింత వేడెక్కుతోంది. ఈ విష వలయాన్ని ఛేదించాలంటే పబ్లిక్ ట్రాన్స్పోర్ట్ మరియు నడకను ప్రోత్సహించే విధానాలు రావాలని పరిశోధకులు సూచిస్తున్నారు. 200 దేశాల్లోని 661 జాతీయ విధానాలను పరిశీలించినప్పుడు ఒక చేదు నిజం బయటపడింది. చాలా దేశాలు కాగితాల మీద వ్యాయామాన్ని ప్రోత్సహించే చట్టాలు చేశాయి కానీ, వాటి అమలులో మాత్రం అట్టడుగున ఉన్నాయి. కేవలం 38.7 శాతం విధానాలు మాత్రమే వివిధ ప్రభుత్వ శాఖలను సమన్వయం చేసుకుంటూ ముందుకు సాగుతున్నాయి. రాజకీయ ప్రాధాన్యత తక్కువగా ఉండటమే దీనికి ప్రధాన కారణమని నిపుణులు అభిప్రాయపడుతున్నారు.
సామాజిక వ్యత్యాసాలు..
68 దేశాల డేటాను విశ్లేషిస్తే, ధనిక దేశాల్లోని పురుషులకు వ్యాయామం చేసే అవకాశాలు ఎక్కువగా ఉండగా, పేద దేశాల్లోని మహిళలకు ఆ అవకాశాలు 40 శాతం తక్కువగా ఉన్నాయి. అయితే, శారీరక శ్రమతో కూడిన పనులు మాత్రం పేద వర్గాల్లోనే ఎక్కువగా కనిపిస్తున్నాయి. ఈ అంతరాలను తగ్గించి అందరికీ వ్యాయామం చేసే సౌకర్యాలు కల్పించినప్పుడే సామాజిక సమానత్వం సిద్ధిస్తుంది. నడక, సైక్లింగ్, పబ్లిక్ ట్రాన్స్పోర్ట్ను ప్రోత్సహించడం అనేది కేవలం ఆరోగ్య సూత్రం మాత్రమే కాదు, అది ఒక పర్యావరణ బాధ్యత కూడా. భవిష్యత్ తరాలకు పచ్చని భూమిని అందించాలంటే ప్రభుత్వం మరియు ప్రజలు కలిసి ఈ దిశగా అడుగులు వేయాలి.