బ్రేక్ఫాస్ట్ చేసేటప్పుడు ఈ తప్పులు చేస్తున్నారా..? ప్రాణాలకే ముప్పు అని తెలుసా
ఉదయం రాజులా, మధ్యాహ్నం మంత్రిలా, రాత్రి బంటులా తినాలని పెద్దలు చెబుతుంటారు. కానీ నేటి బిజీ జీవనశైలిలో చాలామంది బ్రేక్ఫాస్ట్ను అరకొరగా తీసుకోవడం లేదా పూర్తిగా మానేయడం చేస్తుంటారు. న్యూట్రిషనిస్ట్ సహీబా భరద్వాజ్ చెబుతున్నట్లుగా, ఈ అలవాటు మెటబాలిజంను దెబ్బతీయడమే కాకుండా, రక్తంలో కొలెస్ట్రాల్ పెరగడానికి, గుండె సమస్యలు మరియు టైప్-2 డయాబెటిస్ రావడానికి కారణమవుతుంది. ఉదయం తీసుకునే ఆహారం సమతుల్యంగా లేకపోతే శరీర ఆరోగ్యం దెబ్బతినడం ఖాయం.
చాలామంది బ్రేక్ఫాస్ట్లో కేవలం పండ్లు మాత్రమే తీసుకోవడం, లేదా ఆకలిని చంపుకోవడానికి ప్యాన్కేక్స్, మఫిన్స్ వంటి వాటిని తింటుంటారు. ఇవి శరీరానికి సరిపడా శక్తిని ఇవ్వవు. ఫలితంగా తిన్న గంటలోనే మళ్లీ ఆకలి వేస్తుంది, ఏకాగ్రత తగ్గుతుంది. కండరాల పుష్టి కోసం బ్రేక్ఫాస్ట్లో ప్రొటీన్లు, ఫ్యాట్స్ తప్పనిసరి. గుడ్లు, పెరుగు, పనీర్, నట్ బటర్ వంటి వాటిని చేర్చుకోవడం వల్ల రోజంతా శక్తివంతంగా ఉండవచ్చు. కొందరు కార్బోహైడ్రేట్లను పూర్తిగా మానేస్తుంటారు, ఇది సరైనది కాదు. ఓట్స్, ఉప్మా, పోహ, శాండ్విచ్ వంటివి రక్తంలోని గ్లూకోజ్ స్థాయిలను పెంచకుండా రోజంతా ఎనర్జీని ఇస్తాయి.
వాటికి బదులుగా..
ఉదయాన్నే ఫ్రూట్ జ్యూస్లకు బదులుగా పండ్లను నేరుగా తినడం మేలు. సిట్రస్ జ్యూస్లు తాగడం వల్ల గ్యాస్ట్రిక్ సమస్యలు వచ్చే అవకాశం ఉంది. అలాగే చాక్లెట్ ప్యాన్కేక్స్, అధిక చక్కెర కలిపిన ఆహారాలు రక్తంలో షుగర్ లెవల్స్ను ఒక్కసారిగా పెంచి అనారోగ్యానికి దారితీస్తాయి. డీప్ ఫ్రై చేసిన ఆహారాలను అస్సలు తీసుకోకూడదు. టీ లేదా కాఫీ ఒక కప్పు వరకు సరే, కానీ అంతకు మించి తాగడం వల్ల నిద్రలేమి సమస్యలు తలెత్తుతాయి.
ఆరోగ్యకరమైన పద్ధతులు
నిద్రలేచిన గంటలోపు బ్రేక్ఫాస్ట్ చేయడం చాలా ముఖ్యం. చాలామంది ఆఫీసు హడావిడిలో నిలబడి, హడావిడిగా తింటుంటారు, ఇది ఒబేసిటీకి మరియు జీర్ణ సమస్యలకు దారితీస్తుందని అధ్యయనాలు చెబుతున్నాయి. కాబట్టి, నిశ్శబ్దంగా, ప్రశాంతంగా కూర్చుని ఆహారాన్ని బాగా నమిలి తినడం అలవాటు చేసుకోవాలి. అప్పుడే ఆహారంలోని పోషకాలు శరీరానికి అందుతాయి.
అవశ్యక ఫ్యాటీ యాసిడ్స్ కోసం అవిసె గింజలు, డ్రై ఫ్రూట్స్ వంటివి బ్రేక్ఫాస్ట్లో భాగం చేసుకోండి. మీ ఉదయం ఆహారం మీ రోజంతా చేసే పనుల సామర్థ్యాన్ని నిర్ణయిస్తుంది. కాబట్టి, ఆరోగ్యం కోసం సమయాన్ని కేటాయించి, పౌష్టికాహారాన్ని ఆస్వాదించడం నేర్చుకోండి. మీ బ్రేక్ఫాస్ట్ రొటీన్లో ఈ మార్పులు చేసుకోండి, ఆరోగ్యవంతమైన జీవితాన్ని పొందండి.