జయలలిత ఆమెను తల్లిలా భావించారు.. చనిపోతే కంటతడి పెట్టుకున్నారు.. ఆ తెలుగు నటి ఎవరంటే..?

తెలుగు సినిమా చరిత్రలో సూర్యకాంతం పేరు వినగానే గయ్యాళి అత్త, గడుసైన తల్లి పాత్రలు మన కళ్ళముందు మెదులుతాయి. తన ప్రత్యేకమైన బాడీ లాంగ్వేజ్, డైలాగ్ డెలివరీ, మూతి విరుపులతో ఆమె ఆ పాత్రలకు ఒక గుర్తింపును, స్థాయిని కల్పించారు. గుండమ్మ కథ, రక్తసంబంధం, కులగోత్రాలు వంటి వందలాది చిత్రాలలో ఆమె గయ్యాళితనం ప్రేక్షకుల మదిలో చెరిగిపోని ముద్ర వేసింది. ఆమె తెరపైకి వస్తే థియేటర్ అంతా అలర్ట్ అయ్యేవారు. సూర్యకాంతమ్మొచ్చిందిరోయ్ అంటూ ప్రేక్షకులు ఆమె ఎంట్రీని ఆస్వాదించేవారు. ఆ పాత్రలు ఎంతగా ప్రసిద్ధి చెందాయంటే, ఇప్పటికీ కొందరు తమ కూతుర్లకు సూర్యకాంతం అని పేరు పెట్టడానికి వెనుకాడతారు.

అయితే, తెరపై కనిపించినంత గయ్యాళి ఆమె వ్యక్తిగత జీవితంలో కాదు. సూర్యకాంతం అత్యంత సున్నిత స్వభావి, ఆప్యాయత కలిగిన మహాతల్లి. ఆమె తోటి కళాకారులకు అన్నదానం చేయడంలో సిద్ధహస్తురాలు. షూటింగ్ స్పాట్‌లకు తన చేతి వంటలతో, రకరకాల పిండివంటలతో నిండిన పెద్ద క్యారేజీలు తెచ్చి, అందరికీ కొసరి కొసరి వడ్డించేవారు. ఈ విషయం తమిళనాడు ముఖ్యమంత్రి జయలలిత మాటల ద్వారా వెల్లడైంది. సూర్యకాంతం మరణించినప్పుడు, కన్నీటి పర్యంతమై వచ్చిన జయలలిత, ఆమెను తన తల్లితో సమానంగా భావించి, ఆప్యాయంగా అన్నం పెట్టి ఆకలి తీర్చిన అమ్మ అంటూ నివాళులర్పించారు.

ఆమె సినిమా రంగంలో అనేక దిగ్గజాలతో అనుబంధాన్ని పెంచుకున్నారు. విజయా సంస్థ అధినేతలు చక్రపాణి, నిర్మాత దుక్కిపాటి మధుసూధనరావు, దర్శకుడు బాపు, రచయిత ముళ్ళపూడి వెంకటరమణ వంటి వారిపై ఆమెకు ఎనలేని గౌరవం ఉండేది. మధుసూధనరావు ఆమెను అల్సేషన్ డాగ్ అని సరదాగా పిలిచేవారు. ప్రతి కొత్త సంవత్సరం మొదటి రోజున దుక్కిపాటి ఇంటికి వెళ్లి రూ. 101 అడిగి తీసుకునే సెంటిమెంట్ ఆమెది. బాపు-రమణల సినిమాలలో ఆమె పాత్రల కోసం ప్రత్యేకంగా కథలు అల్లేవారు. బాలరాజు కథ, అందాల రాముడు, బుద్ధిమంతుడు, ముత్యాల ముగ్గు చిత్రాల్లో ఆమె పాత్రలు విభిన్నంగా నిలిచాయి.

కార్లంటే, కళ్ళజోళ్లంటే సూర్యకాంతంకు చాలా ఇష్టం. మద్రాసులో కేవలం రెండే ఉన్న మే ఫ్లవర్ కార్లలో ఒకటి ఆమె సొంతం. ఒక సినిమా కోసం 150 రకాల కళ్ళజోళ్ళను తెప్పించుకున్నారంటే ఆమె అభిరుచి అర్థం చేసుకోవచ్చు. డబ్బు విషయంలో నిక్కచ్చిగా ఉన్నా, దానధర్మాల విషయంలో ఆమెకు ఆమే సాటి. సినిమాల మోజుతో పారిపోయి వచ్చి, డబ్బు పోగొట్టుకున్న అనేకమంది ఆడవాళ్లకు ఆమె ధన సహాయం చేసి ఊళ్లకు పంపించారు. అనేకమంది పేద బ్రాహ్మణ కుటుంబాల పిల్లలకు ఉపనయనాలు చేయించారు.

సూర్యకాంతం భర్త పెద్దిభొట్ల వెంకట చలపతిరావు. వారికి పిల్లలు లేకపోవడంతో, తన చెల్లెలు సత్యవతి కొడుకు అనంత పద్మనాభమూర్తిని దత్తత తీసుకున్నారు. పద్మనాభమూర్తి బ్యాంకులో ఉద్యోగం చేసి పదవీ విరమణ పొందారు. ఆయనకు ఇద్దరు పిల్లలు: సూర్య సత్యవెంకట బాలసుబ్రహ్మణ్యం (చార్టెడ్ అకౌంటెంట్), జయలక్ష్మి (ఎంబీబీఎస్).

1994 డిసెంబర్ 17న సూర్యకాంతం మరణించినప్పుడు, అప్పటి తమిళనాడు ముఖ్యమంత్రి జయలలిత వచ్చి నివాళులర్పించారు. అయితే, తెలుగు చిత్ర పరిశ్రమకు చెందిన అక్కినేని నాగేశ్వరరావు, గుమ్మడి వంటి ప్రముఖులు ఎవరూ ఆమె చివరి చూపునకు రాకపోవడం విచారకరం. ఎల్.వి. ప్రసాద్ మరణించినప్పుడు హాజరైన వారిలో పదోవంతు కూడా సూర్యకాంతం ఇంటికి రాలేదు. రాత్రిపూట మరణం సంభవించడంతో, మధ్యాహ్నం 12 గంటల వరకు ఎవరైనా వస్తారేమోనని కుటుంబ సభ్యులు ఎదురుచూశారు. ఎవ్వరూ రాకపోవడంతో సాయంత్రం 3 గంటలకు అంత్యక్రియలు జరిపారు. సూర్యకాంతం నిజమైన జీవితం, ఆమె మానవత్వం, కళాసేవ తరతరాలకు స్ఫూర్తినిస్తాయి.

Suryakantham