Mahesh Vitta: ఆ షూటింగ్స్‌కి వెళ్లడం కంటే.. అడ్డా మీద కూలీగా వెళ్లడం బెటర్..

కమెడియన్ మహేష్ విట్టా, సీరియల్స్ ప్రొడక్షన్ పనితీరుపై తీవ్రస్థాయిలో మండిపడ్డారు. సీరియల్స్ కన్నా అడ్డ మీద కూలీ బెటర్ అంటూ తన అనుభవాన్ని పంచుకున్నారు. ఇటీవల ఇచ్చిన ఇంటర్వ్యూలో, తన కెరీర్, ఆర్థిక ఇబ్బందులు, కుటుంబ మద్దతు గురించి మాట్లాడారు. ఈ క్రమంలో, సీరియల్స్ ప్రొడక్షన్ పట్ల తనకున్న వ్యతిరేకతను బలంగా వ్యక్తం చేశారు. మహేష్ విట్టా మాట్లాడుతూ, ఒకప్పుడు ఆర్థిక సమస్యల కారణంగా సీరియల్స్ లోకి వెళ్లాలని ఆలోచించినట్లు తెలిపారు. అప్పుడు తన భార్య జాబ్ చేస్తూ కుటుంబానికి అండగా నిలిచారని, ఆమె సంపాదనతోనే ఇంటిని నడిపారని గుర్తు చేసుకున్నారు. మంత్లీ శాలరీ వస్తుంది కదా అని సీరియల్స్ లోకి వెళ్లాలనుకున్నప్పుడు, తన భార్య సినిమా అంటే నీకెంత ఇష్టమో నాకు తెలుసు. ముందు నువ్వు చేసిన సినిమా రిలీజ్ చేసుకో, ఆరు నెలలు చూడు. ఆ తర్వాత నీ ఇష్టమైన నిర్ణయం తీసుకో అని చెప్పిందని పేర్కొన్నారు. ఆమె ప్రోత్సాహంతో ఆ నిర్ణయాన్ని వెనక్కి తీసుకున్నట్లు చెప్పారు. సీరియల్స్ పట్ల తనకున్న చేదు అనుభవాన్ని వివరిస్తూ.. తాను ఒక వెబ్ సిరీస్ చేశానని, అది సీరియల్ ప్రొడక్షన్ మాదిరిగానే ఉందని చెప్పారు. అక్కడ వాతావరణం ఘోరం, చాలా ఘోరం అని అభివర్ణించారు. మనుషులుగా కూడా చూడరు. అంత టార్చర్ ఉంటుంది. అంత గలీజుగా ఉంటుంది అని ఆవేదన వ్యక్తం చేశారు. ఈ అనుభవం తర్వాత సీరియల్స్‌కు దండం రా నాయనా అనిపించిందని అన్నారు.

తెలుగువాళ్లు ఆత్మాభిమానం ఎక్కువ కాబట్టే సీరియల్స్‌లో ఎక్కువమంది కనిపించరని, ఇతర భాషల వాళ్లే ఎక్కువగా పని చేస్తారని మహేష్ విట్టా అభిప్రాయపడ్డారు. సినిమాల్లో పనిచేయడం వెయ్యి రెట్లు మెరుగని, సీరియల్స్ ప్రొడక్షన్ తో పోలికే లేదని స్పష్టం చేశారు. తనకు ఒకే ఒక ప్రొడక్షన్ లో అలాంటి అనుభవం ఎదురైందని, అన్ని చోట్లా అలా ఉండకపోవచ్చని అన్నారు. అయినప్పటికీ, ఆ అనుభవంతో తనకు సీరియల్స్ అంటేనే భయం వేసిందని చెప్పారు. ఒకవేళ సినిమాల్లో అవకాశాలు రాకపోయినా, దోశల బండి పెట్టుకుంటా అని, అది కూడా మంచి బిజినెస్సే అని సరదాగా వ్యాఖ్యానించారు. ఇది సీరియల్స్ ప్రొడక్షన్ లోని పని వాతావరణంపై ఆయనకున్న తీవ్రమైన నిరాశను తెలియజేస్తుంది.

Also Read: తక్కువ ఖర్చుతో కోళ్లకు మేతగా పురుగులు ఇలా తయారు చేస్కోండి