BiggBoss 10: అందుకే షాలినిని ఉంచి నన్ను ఎలిమినేట్ చేశారు.. బిగ్ బాస్ నుంచి బయటకు వచ్చాక చరణ్
బిగ్ బాస్ ఇంట్లో ఐదో వారం రోడ్ టు రీలోడ్ ముగిసింది. ఈ వారం ఎన్నో ఆసక్తికర పరిణామాలు చోటుచేసుకోగా.. అపూర్వ, చరణ్‌లు హౌస్ నుంచి ఎలిమినేట్ అయ్యారు. మరోవైపు ఐదుగురు కొత్త కంటెస్టెంట్లు ఎంట్రీ ఇవ్వడంతో ఇంటి వాతావరణం పూర్తిగా మారిపోయింది. శివ్, దక్ష, నీతూ మాస్టర్, శ్వేతా నాయుడు, రామకృష్ణలు హౌస్‌లోకి అడుగుపెట్టారు
బిగ్ బాస్ 10 ఇంటి నుండి ఎలిమినేట్ అయిన తర్వాత, చరణ్ మహాదేవు ఓ ప్రెస్ మీట్‌లో తన అనుభవాలను, హౌస్ లోని పరిస్థితులను పంచుకున్నాడు. తన ఎలిమినేషన్ హౌస్‌మేట్స్ ఓటింగ్‌తో జరిగిందని, ఇది రెండుసార్లూ ఇలాగే జరిగిందని చరణ్ వెల్లడించాడు. ప్రేక్షకుల ఓట్లతో రెండుసార్లూ తాను ఇంటిలోకి వెళ్లినా, హౌస్‌మేట్స్ నిర్ణయం వల్లే బయటకొచ్చానని ఆయన అన్నారు. “నా జర్నీ బాగానే జరిగింది, ముఖ్యంగా ఈ వారం నేను బయటికి వచ్చినప్పుడు నా నామినేషన్లు, టాస్క్‌లు మెరుగుపడ్డాయి” అని చరణ్ పేర్కొన్నాడు. రీ-ఎంట్రీ చాలా తక్కువ మందికి వస్తుందని, ఈ అవకాశం తనకు, చైత్రకు వచ్చిందని చరణ్ గుర్తు చేసుకున్నాడు. అగ్నిపరీక్ష నుంచి మొదలైన తన ప్రయాణంలో ప్రేక్షకులు చూపిన ప్రేమకు కృతజ్ఞతలు తెలిపాడు. డే వన్ ఆడిషన్స్ నుంచి ప్రేక్షకులు తనను ఆదరించారని, వారి గుండెల్లో తనకంటూ ఒక స్థానం ఉందని అన్నాడు. ఈ ప్రేమ ఇలాగే కొనసాగాలని, తనకు ఓట్లు వేసి మద్దతు ఇచ్చిన ప్రతి ఒక్కరికి పేరు పేరునా ధన్యవాదాలు తెలిపాడు చరణ్.
హౌస్‌లో కామన్స్ వర్సెస్ సెలబ్రిటీస్ అనే వ్యత్యాసం డెఫినెట్‌గా ఉందని చరణ్ అన్నాడు. వారం అంతా కలిసినా, ఓటింగ్ విషయానికి వచ్చేసరికి సెలబ్రిటీలు తమ వారికే, కామన్స్ తమ వారికే ఓటు వేసుకుంటారని వివరించాడు. కెప్టెన్సీ సమయంలో ఇది స్పష్టంగా కనిపించిందని అన్నాడు. త్రిగుణ్ ఆటతీరును ప్రశంసిస్తూ, ఆయన షోలో కనిపించడానికి, పేరు రావడానికి ఏదైనా చేస్తాడని, ఈ విషయంలో త్రిగుణ్ సక్సెస్ అయ్యాడని చెప్పాడు. షాలిని, రోహిత్ బంధం గురించి మాట్లాడుతూ, అది వారి వ్యక్తిగత విషయమని, తాను అందులో జోక్యం చేసుకోలేదని తెలిపాడు. తన ఆటతీరు గురించి మాట్లాడుతూ, తాను అనవసర గొడవలు, డ్రామాల జోలికి పోలేదని, తన జెన్యూనిటీని నిలుపుకున్నానని అన్నాడు. “చరణ్ చరణ్ లాగే ఆడాడు” అని ఆయన స్పష్టం చేశాడు.
రెండో అవకాశం పొందిన తర్వాత కూడా, తాను తనను తాను మెరుగుపరుచుకునే ప్రక్రియలోనే ఉన్నానని తెలిపాడు. తనను ఎలిమినేట్ చేయడానికి హౌస్‌మేట్స్ ఎటువంటి స్ట్రాంగ్ కారణాలను చెప్పలేదని, సీక్రెట్ బ్యాలెట్ ఓటింగ్ జరిగిందని తెలిపాడు. వైల్డ్ కార్డ్‌లు షాలినిని టార్గెట్ చేయడం చూస్తుంటే, లోపల ఉన్న హౌస్‌మేట్స్‌కు షాలిని బయట నెగటివిటీ ఎదుర్కొంటోందని అర్థమై ఉంటుందని, అందుకే షాలినిని ఉంచి తనను పంపి ఉండవచ్చని చరణ్ అభిప్రాయపడ్డాడు. విన్నర్‌ను అంచనా వేయడం తొందరపాటు అవుతుందని, అందరిలో కొన్ని లోపాలు ఉన్నాయని చరణ్ అన్నాడు. రోహిత్, త్రిగుణ్ ఇద్దరికీ గెలిచే అవకాశం ఉందని, అయితే వారు తమ లోపాలను సరిదిద్దుకొని, మెజారిటీ ప్రజలకు నచ్చినట్లు ఆడితే విజేతలు కావచ్చని అన్నాడు. ముఖేష్ గౌడ తన నోరు జారడం, ఆటిట్యూడ్ గురించి, దేబ్జానీ మోదక్ స్వీట్ పర్సనాలిటీ గురించి కూడా మాట్లాడారు. చివరిగా, అభిమానుల ప్రేమకు, మద్దతుకు చరణ్ మరోసారి ధన్యవాదాలు తెలిపాడు.
మరిన్ని సినిమా వార్తల కోసం ఇక్కడ క్లిక్ చేయండి.