ఒక టీ రూ.500.. పానిపూరీ ప్లేట్ రూ.800.. ఆ స్టార్ నటుడి కేఫ్‌లో ధరలు చూసి షాకవుతోన్న నెటిజన్లు
స్టార్ నటుడు ప్రారంభించిన ఈ కేఫ్ ఈ మధ్యన తరచుగా వార్తల్లో నిలుస్తోంది. ఇప్పుడు ఈ కేఫ్ మెనూ అలాగే ఫుడ్ ఐటమ్స్ ధరలు కూడా బయటకు వచ్చాయి. ఇక్కడ అక్కడ టీ ధర రూ. 500 కాగా, ఒక పానీపూరి ప్లేట్ ధర సుమారు రూ. 800 ఉంటుంది.
Updated on: Oct 18, 2026 | 7:15 PM
బాలీవుడ్ స్టార్ నటుడు కపిల్ శర్మ గురించి తెలుగు ఆడియెన్స్ కు కూడా పరిచయమే. ఇతను కేఫ్ బిజినెస్ లో కూడా భారీగ ఆదాయం ఆర్జిస్తున్నాడు. గత ఏడాది జూలైలో కెనడాలో మొదటి ‘క్యాప్స్ కేఫ్’ అవుట్‌లెట్‌ను ప్రారంభించిన తర్వాత, కపిల్ శర్మ ఇప్పుడు తన బ్రాండ్‌ను దుబాయ్‌కి విస్తరించారు. ఆయన డిసెంబర్ 31, 2025న అల్ కిఫాఫ్‌లో మరో కొత్త అవుట్‌లెట్‌ను ప్రారంభించారు. హాస్యనటి భారతి సింగ్ ఇటీవల దుబాయ్‌లోని ఈ కేఫ్‌ను సందర్శించారు. ఈ సందర్భంగా కేఫ్‌ను లేత గులాబీ, తెలుపు రంగులతో పాటు బంగారు వర్ణపు మెరుపుతో అందంగా అలంకరించారు. అయితే, ఈ కేఫ్‌లోని మెనూ, అలాగే ఫుడ్ ఐట్స్ ధరలు ప్రస్తుతం నెట్టింట వైరల్ గా మారాయి. ఈ మెనూలో అనేక పానీయాలు, రకరకాల కేకులు, భారతీయ, అంతర్జాతీయ వంటకాలు ఉన్నాయి. అయితే, ఈ కేఫ్‌లో లభించే వంటకాల ధరలు చాలా ఆశ్చర్యపరుస్తున్నాయి. ఒక కప్పు మసాలా చాయ్ ధర రూ. 500 కాగా, ఒక సర్వింగ్ దేశీ పానీ పూరీ ధర ఏకంగా రూ. 800. ఈ మెనూలో అత్యంత ఖరీదైన వంటకం చీజ్ పెన్నే పాస్తా – దీని ధర రూ. 1,604. కాగా, ఈ కేఫ్‌లో అత్యంత చౌకైనది ఎస్ప్రెస్సో – దీనిని తినాలంటే రూ. 490 చెల్లించాల్సి ఉంటుంది.
క్యాప్స్ కేఫ్ భారతీయ, అంతర్జాతీయ వంటకాలు రెండింటినీ అందిస్తుంది. అయితే ఇక్కడ సాధారణ ఆహార పదార్థాలు కూడా చాలా ఖరీదైనవి. ఒక దోసె ధర రూ. 775 కాగా, ఒక బాంబే శాండ్‌విచ్, అవకాడో టోస్ట్ ఒక్కొక్కటి రూ. 1,034 లు పలుకుతున్నాయి. ఒక ప్లేట్ షెవ్‌పురి ధర రూ. 905 కాగా, ఫ్రెంచ్ టోస్ట్ ధర రూ. 1,300లు. మెనూలో మెక్సికన్ బౌల్, బటర్ చికెన్, పాన్‌కేక్‌లు కూడా ఉన్నాయి. ఆలూ పరాఠా ధర రూ. 700 కాగా, దాల్ మఖానీ ధర రూ. 1035. ప్రత్యేక వంటకాలలో మసాలా చాయ్ రూ. 550కి మరియు పానీ పూరీ రూ. 800కి లభిస్తాయి. ఇక్కడ సాధారణ భారతీయ వంటకాలకు కూడా ప్రీమియం ధరలకు అందిస్తున్నారు. కాగా ఈ కేఫ్ అలంకరణ పారిస్‌లోని పేస్ట్రీ దుకాణాల (ప్యాటిస్సరీస్) నుండి ప్రేరణ పొందిందని చెబుతారు. కేఫ్ లోపలి భాగంలో లేత గులాబీ రంగులు, ఐవరీ షేడ్స్, తెల్లని పాలరాయి, బంగారు అలంకరణలను ఉపయోగించారు. ఈ రంగుల కారణంగా కేఫ్ చాలా అందంగా లగ్జరీగా కనిపిస్తోంది. అందువల్ల, ఈ ప్రదేశం కేవలం ఆహారం కోసమే కాకుండా, ఇన్‌స్టాగ్రామ్‌లో ఫోటోలను పంచుకోవడానికి కూడా ప్రత్యేకమైనది.
గత సంవత్సరం, కెనడాలోని కాప్స్ కేఫ్‌లో జరిగిన కాల్పుల ఘటన కారణంగా ఈ కేఫ్ వార్తల్లో నిలిచింది. కేఫ్ తెరిచిన కొద్ది రోజులకే దానిపై దాడి జరిగింది, ఆ తర్వాత ఆగస్టులో మరో దాడి జరిగింది. అక్టోబర్‌లో, కారులోంచి జరిపిన కాల్పుల్లో కేఫ్ కిటికీలు పగిలిపోయాయి. కొన్ని నివేదికలు ఈ ఘటనకు లారెన్స్ బిష్ణోయ్ గ్యాంగ్‌తో సంబంధం ఉందని పేర్కొన్నాయి. అయితే అదృష్టవశాత్తూ, ఈ కాల్పుల్లో ఎవరూ గాయపడలేదు. ఈ దాడిపై కపిల్ స్పందించారు. నవంబర్‌లో, తన చిత్రం ‘కిస్ కిస్కో ప్యార్ కరూన్ 2’ ప్రమోషన్ల సందర్భంగా, ఈ దాడుల గురించి అడిగినప్పుడు, కపిల్ శర్మ ఇలా సమాధానమిచ్చారు. “ప్రతి కాల్పుల ఘటన తర్వాత, కేఫ్‌కు మునుపటి కంటే మెరుగైన ఓపెనింగ్ లభించింది. కాబట్టి, దేవుడు నాతో ఉంటే, అంతా బాగుంటుంది,” అని ఆయన మీడియాతో అన్నారు. ప్రస్తుతం ఆయన నెట్‌ఫ్లిక్స్‌లో ‘ది గ్రేట్ ఇండియన్ కపిల్ షో’కు హోస్ట్‌గా వ్యవహరిస్తున్నారు.
Kapil Sharma’s Kap’s Cafe
మరిన్ని సినిమా వార్తల కోసం ఇక్కడ క్లిక్ చేయండి.
