ఇక క్రీడల సంరంభం ? కళకళ లాడనున్న స్టేడియాలు !

దేశంలో స్టేడియాలు, స్పోర్ట్స్ కాంప్లెక్సుల ఓపెనింగ్ కి ప్రభుత్వం గ్రీన్ సిగ్నల్ ఇవ్వడంతో.. స్పోర్ట్స్ అథారిటీ ఆఫ్ ఇండియా ఓ సమగ్ర ప్రామాణిక ఆపరేటింగ్ ప్రొసీజర్ ని రూపొందించింది. దీంతో మళ్ళీ ఇవన్నీ కళకళలాడబోతున్నాయి. మొదట  అథ్లెట్ల శిక్షణ దశల వారీగా ప్రారంభం కానుందని, స్పోర్ట్స్ ని నాలుగు కేటగిరీలుగా విభజించామని ఈ  సంస్థ తెలిపింది. ఆ క్రమంలో ప్రతి కేటగిరీకి  వేర్వేరు ప్రికాషన్స్ ఉంటాయని వెల్లడించింది. అథ్లెట్లకు, కోచ్ కి, స్టాఫ్ కి…అందరికీ ఆరోగ్య సేతు యాప్ తప్పనిసరి ! స్పోర్ట్స్ ని నాలుగు కేటగిరీలుగా విభజించారు. నాన్-కాంటాక్ట్, మీడియం కాంటాక్ట్, ఫుల్ కాంటాక్ట్, వాటర్ స్పోర్ట్స్ అన్నవే ఇవి !

ప్రతి స్పోర్ట్స్ అథారిటీ ఆఫ్ ఇండియా వెన్యూ వద్ద కోవిడ్ టాస్క్ ఫోర్స్ ను ఏర్పాటు చేయనున్నారు. క్రీడాకారులకు శిక్షణ ప్రారంభానికి ముందు ఆయా సెంటర్ల ప్రాంగణంలో డిస్ ఇన్ఫెక్ట్ తప్పనిసరి అని స్పోర్ట్స్ అథారిటీ స్పష్టం చేసింది. ప్రతి నేషనల్ స్పోర్ట్స్ ఫెడరేషన్ నుంచి చీఫ్ కోచింగ్ స్టాఫ్.. ఈ టాస్క్ ఫోర్స్ లో సభ్యులుగా ఉంటారని, వారు ఎప్పటికప్పుడు అథ్లెట్ల ఆరోగ్య పరిస్థితి, తదితరాలను పర్యవేక్షిస్తుంటారని ఈ సంస్థ వివరించింది.