గాల్వాన్ ఘటనపై చైనా పశ్చాత్తాపం !

భారత సైనికులు 20 మందిని పొట్టన పెట్టుకున్న గాల్వాన్ ఘటనపై చైనా స్పందించింది. ఘర్షణ జరిగిన రెండు నెలల తర్వాత చైనా పశ్చాత్తాపం వ్యక్తం చేసింది. గాల్వాన్ ఘర్షణను దురదృష్టకరమైన సంఘటనగా వ్యాఖ్యానించింది. ఇలాంటి ఘటనలు జరగాలని ఇరు దేశాలూ కోరుకోవడం లేదని భారత్ లోని చైనా రాయబారి సన్ వీడాంగ్ ప్రకటించారు. ఆగస్టు 18న నిర్వహించిన ‘ఇండియా-చైనా యూత్ ఫోరం’ వెబినార్ లో ఆయన ఈ వ్యాఖ్యలు చేసినట్లు చైనా రాయబార కార్యాలయం వెల్లడించింది.

ఓ వైపు సరిహద్దుల్లో సైనిక సంపత్తిని మోహరిస్తూ.. మరోవైపు బలగాల ఉపసంహరణ కోసం చర్చలు జరుపుతున్న చైనా.. భారత్‌తో దోస్తీ గురించి కీలక వ్యాఖ్యలు చేసింది. భారత్‌ను చైనా ప్రత్యర్థిగా కాకుండా ఓ మిత్ర దేశంగా, ముప్పుగా కాకుండా ఓ అవకాశంగా భావిస్తున్నామని చైనా రాయబారి వీడాంగ్ అన్నారు. గాల్వాన్ లాంటి దురదృష్టకర ఘటనలు మరోసారి పునరావృతం కాకుండా చూసుకోవాల్సిన అవసరం ఉందని వీడాంగ్ అభిప్రాయపడ్డారు. అందుకు సంబంధించి అన్ని రకాల చర్యలు తీసుకుంటున్నామని అన్నారు.

ఇరు దేశాల మధ్య సరిహద్దు సమస్యలు, విబేధాలను చర్చలు, సంప్రదింపుల ద్వారా పరిష్కరించుకోవాలని.. ద్వైపాక్షిక సంబంధాలను మళ్లీ గత స్థాయికి తీసుకెళ్లాలని వీడాంగ్ వ్యాఖ్యానించారు. అత్యంత వేగంగా అభివృద్ధి చెందుతున్న భారత్, చైనాల మధ్య పరస్పర సహకారం ఎంతో అవసరమన్న అభిప్రాయాన్ని వీడాంగ్ వ్యక్తం చేశారు. వివాదాలకు స్వస్తి పలికి అభివృద్ధి దిశగా సాగాల్సిన అవసరం ఉందన్నారు.

ద్వైపాక్షిక సంబంధాల్లో భాగంగా సరిహద్దు వివాదాల్ని సైతం పరిష్కరించుకునేందుకు కృషి చేస్తామని అన్నారు. కొన్నేళ్లుగా ఇరు దేశాల మధ్య నెలకొన్న బలమైన సంబంధాలు తాజాగా నెలకొన్న ప్రతికూల పరిస్థితుల్ని పరిష్కరించుకునేందుకు దోహదం చేస్తాయని వీడాంగ్ విశ్వాసం వ్యక్తం చేశారు.