LIC నుంచి 3 అద్భుతమైన ప్లాన్లు.. చదువు, పెళ్లికి నో టెన్షన్‌!

ప్రతి తల్లిదండ్రి తమ పిల్లల భవిష్యత్తు ఆర్థికంగా సురక్షితంగా ఉండాలని కోరుకుంటారు. ముఖ్యంగా ఉన్నత విద్య, వివాహం వంటి పెద్ద ఖర్చులు భవిష్యత్తులో భారంగా మారకుండా ముందుగానే ప్రణాళికలు వేసుకోవాలని చూస్తారు. ఈ అవసరాన్ని దృష్టిలో ఉంచుకుని భారతీయ జీవిత బీమా సంస్థ ఎల్‌ఐసీ (LIC) పిల్లల భవిష్యత్తుకు భద్రత కల్పించే అనేక ప్రత్యేక పాలసీలను అందిస్తోంది. వాటిలో ముఖ్యంగా మూడు పథకాలు తల్లిదండ్రుల దృష్టిని ఆకర్షిస్తున్నాయి.

మొదటగా జీవన్ లక్ష్య పథకం. ఇది బీమా రక్షణతో పాటు పొదుపు ప్రయోజనాలను కూడా అందిస్తుంది. పాలసీదారుడు అనుకోకుండా మరణించినా కుటుంబానికి ప్రతి సంవత్సరం హామీ మొత్తంలో కొంత భాగం అందుతుంది. పాలసీ కాలం పూర్తయ్యాక ఒకేసారి పెద్ద మొత్తం, అదనంగా బోనస్ కూడా లభిస్తుంది. పిల్లల చదువు లేదా వివాహం కోసం భవిష్యత్తులో భారీ ఖర్చులు ఎదుర్కొనే కుటుంబాలకు ఇది ఉపయోగకరంగా ఉంటుంది. ఇక రెండో పథకం పూర్తిగా పిల్లల భవిష్యత్తును దృష్టిలో ఉంచుకుని రూపొందించబడింది. పిల్లలకు 20 ఏళ్లు వచ్చిన తర్వాత నుంచి విడతల వారీగా నిధులు అందుతాయి. 25 సంవత్సరాల వయస్సు వచ్చే వరకు ఈ చెల్లింపులు కొనసాగుతాయి. ఉన్నత విద్య, ఉద్యోగ జీవితం ప్రారంభ దశలో పిల్లలకు ఆర్థికంగా అండగా నిలవడమే దీని ప్రధాన లక్ష్యం.

మూడో పథకం క్రమబద్ధమైన చెల్లింపులపై ఆధారపడి ఉంటుంది. పిల్లలకు 18, 20, 22 సంవత్సరాలు వచ్చినప్పుడు కొంత మొత్తాన్ని చెల్లిస్తారు. చివరగా 25 సంవత్సరాల వయస్సులో మిగిలిన మొత్తం, బోనస్‌తో కలిసి అందుతుంది. ఈ పథకంలో ముఖ్యమైన అంశం ఏమిటంటే, పాలసీదారుడు మరణించినా మిగిలిన ప్రీమియంలు మాఫీ అవుతాయి. అయినప్పటికీ పిల్లలు పూర్తి ప్రయోజనాలను పొందుతూనే ఉంటారు. ఈ మూడు పథకాల ప్రధాన ప్రత్యేకత పిల్లల భవిష్యత్తుకు భద్రత కల్పించడం. క్రమశిక్షణతో పొదుపు చేయడమే కాకుండా, అనుకోని పరిస్థితుల్లో కూడా కుటుంబానికి ఆర్థిక రక్షణను అందిస్తాయి. అందుకే పిల్లల భవిష్యత్తు కోసం ముందుగానే ఆర్థిక ప్రణాళిక రూపొందించాలనుకునే తల్లిదండ్రులకు ఈ LIC పథకాలు ఒక మంచి ఎంపికగా భావించబడుతున్నాయి.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి