Vastu Tips: మీ ఇంట్లో ఈ మార్పులు చేస్తే.. కుబేరుడి అనుగ్రహంతో ధన ప్రవాహమే..!

Kubera Blessings

వాస్తు శాస్త్రం ప్రకారం ఇంటిని నిర్మించడం మాత్రమే కాదు, ఇంట్లో ఉన్న ప్రతి వస్తువును సరైన దిశలో, సరైన స్థానంలో ఉంచడం కూడా అత్యంత ముఖ్యమైనది. ప్రతి దిశకు ఒక ప్రత్యేక శక్తి ఉందని వాస్తు శాస్త్రం చెబుతుంది. అందువల్ల తప్పు వస్తువులను తప్పు దిశలో ఉంచితే వాస్తు దోషాలు ఏర్పడి, ఆర్థిక సమస్యలు, కుటుంబ కలహాలు, మానసిక ఒత్తిడి వంటి అనేక ఇబ్బందులు కలగవచ్చు.
వాస్తు దోషాలను నివారించడానికి కొన్ని సాధారణ నియమాలను పాటించడం అవసరం. ముఖ్యంగా ఇంటి పరిశుభ్రత, వస్తువుల సరైన అమరికకు ఎంతో ప్రాధాన్యం ఇవ్వాలి.

ఉత్తర దిశలో గజిబిజి నివారించండి

వాస్తు ప్రకారం ఉత్తర దిశ సంపదకు సంకేతం. ఈ దిశకు అధిపతి అయిన కుబేరుడు ధనానికి దేవుడిగా భావించబడతాడు. కాబట్టి ఇంటి ఉత్తర దిశలో చెత్త, పనికిరాని వస్తువులు లేదా గజిబిజి ఉంచడం శుభప్రదం కాదు. ఇలా చేస్తే “కుబేర దోషం” ఏర్పడి, ఆర్థిక ఇబ్బందులు తలెత్తుతాయని విశ్వసిస్తారు. అందువల్ల ఉత్తర దిశ ఎప్పుడూ శుభ్రంగా, వెలుతురు నిండుగా ఉంచాలి. ఇలా చేస్తే ధనప్రవాహం సులభంగా ఉంటుందని వాస్తు శాస్త్రం సూచిస్తుంది.

పశ్చిమ దిశ పరిశుభ్రత కూడా ముఖ్యమే

వాస్తు ప్రకారం పశ్చిమ దిశకు అధిపతి శని దేవుడు. ఈ దిశలో చెత్త లేదా అపరిశుభ్రత ఉంటే “శని దోషం” కలగవచ్చని చెబుతారు. దీని ప్రభావంగా ఇంట్లో అనవసరమైన తగాదాలు, ఒత్తిడి, సమస్యలు ఎదురయ్యే అవకాశం ఉంటుంది. కాబట్టి పశ్చిమ దిశలో కూడా గజిబిజి లేకుండా శుభ్రంగా ఉంచడం మంచిది.

ముఖ్య సూచన

ఇంట్లో ఎక్కడైనా చెత్తను ఎక్కువసేపు నిల్వ చేయకూడదు. ప్రతి దిశను పరిశుభ్రంగా ఉంచడం వాస్తు పరంగా శుభప్రదం. గాలి, వెలుతురు సరిగా వచ్చేలా ఇంటి అమరిక ఉండాలి. ఇలా చిన్నచిన్న జాగ్రత్తలు తీసుకుంటే వాస్తు దోషాలు తగ్గి, ఇంట్లో శాంతి, సౌభాగ్యం నెలకొంటాయని వాస్తు శాస్త్రం చెబుతోంది.

(Disclaimer: ఈ వార్తలోని సమాచారం వాస్తు శాస్త్రం, మత విశ్వాసాలపై ఆధారపడి ఉంది. దీనిని టీవీ9 తెలుగు ధృవీకరించదు.)