బంగాళాఖాతంలో అల్పపీడనం.. ఏపీలో వచ్చే మూడు రోజులు భారీ వర్షాలు
AP weather Update Telugu: ఆంధ్రప్రదేశ్‌లో రానున్న మూడు రోజుల పాటు వర్షాలు కురిసే అవకాశం ఉంది. బంగాళాఖాతంలో అల్పపీడనం ఏర్పడే సూచనల నేపథ్యంలో కోస్తాంధ్ర, యానాం, రాయలసీమలో పలుచోట్ల వర్షాలు, అక్కడక్కడా భారీ వర్షాలు కురవవచ్చు. ఉరుములు, మెరుపులతో పాటు గంటకు 50 కిలోమీటర్ల వేగంతో బలమైన గాలులు వీచే అవకాశం ఉందని అమరావతి వాతావరణ కేంద్రం తెలిపింది.
AP weather Update: ఆంధ్రప్రదేశ్‌లో రానున్న మూడు రోజుల పాటు వర్షాలు కురిసే అవకాశం ఉందని అమరావతి వాతావరణ కేంద్రం వెల్లడించింది. బంగాళాఖాతంలో ఏర్పడుతున్న వాతావరణ మార్పుల ప్రభావంతో కోస్తాంధ్ర, యానాం, రాయలసీమ ప్రాంతాల్లో పలుచోట్ల తేలికపాటి నుంచి మోస్తరు వర్షాలు, ఉరుములతో కూడిన జల్లులు కురిసే అవకాశం ఉందని తెలిపింది. కొన్ని ప్రాంతాల్లో భారీ వర్షాలు కురిసే సూచనలు ఉన్నాయని పేర్కొంది.
నెలాఖరుకు తుపానుగా మారనున్న వాయుగుండం
నైరుతి బంగాళాఖాతం, దానికి ఆనుకుని ఉన్న తమిళనాడు తీర ప్రాంతంపై సముద్ర మట్టానికి 5.8 కిలోమీటర్ల ఎత్తు వరకు ఉపరితల ఆవర్తనం కొనసాగుతోంది. దీని ప్రభావంతో రాబోయే 24 గంటల్లో అదే ప్రాంతంలో అల్పపీడనం ఏర్పడే అవకాశం ఉంది. ఈ ఉపరితల ఆవర్తనం నుంచి ఉత్తర కోస్తాంధ్ర వరకు సముద్ర మట్టానికి 3.1 కిలోమీటర్ల ఎత్తులో ద్రోణి విస్తరించి ఉంది. మరోవైపు థాయిలాండ్ గల్ఫ్, దానికి ఆనుకుని ఉన్న థాయిలాండ్, మయన్మార్ ప్రాంతాల్లో సముద్ర మట్టానికి 4.5 కిలోమీటర్ల ఎత్తు వరకు ఉపరితల ఆవర్తనం కొనసాగుతోంది. ఈ ఆవర్తనం అక్టోబర్ 21వ తేదీ ఉదయానికి వాయుగుండంగా ఉత్తర అండమాన్ సముద్రంలోకి ప్రవేశించే అవకాశం ఉంది. అనంతరం పశ్చిమ-వాయవ్య దిశగా కదులుతూ అక్టోబర్ 23వ తేదీ నాటికి ఆగ్నేయ బంగాళాఖాతం, దానికి ఆనుకుని ఉన్న తూర్పు-మధ్య బంగాళాఖాతంలో అల్పపీడనం ఏర్పడేందుకు అనుకూల పరిస్థితులు ఉన్నాయని వాతావరణ కేంద్రం తెలిపింది. ఈ అల్పపీడనం ఆ తర్వాత వాయవ్య దిశగా కదులుతూ మరింత బలపడే అవకాశం ఉందని అంచనా వేసింది. 27 నాటికి వాయుగుండం బలపడి మధ్య బంగాళాఖాతంలోకి ప్రవేశిస్తుందని అంచనా. ఆ తర్వాత రెండు రోజులకు తుపానుగా మారి నెలాఖరుకు ఉత్తర కోస్తా, దక్షిణ ఒడిశాల మధ్య తీరం దాటే అవకాశం ఉందని వాతావరణ శాఖ అధికారులు చెబుతున్నారు.
కోస్తాంధ్ర, యానాంలో మూడు రోజుల వాతావరణం
ఈరోజు (అక్టోబర్ 20): కోస్తాంధ్ర, యానాం ప్రాంతాల్లో కొన్ని చోట్ల తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. ఒకటి లేదా రెండు చోట్ల భారీ వర్షాలు కురిసే సూచనలు ఉన్నాయి. అక్కడక్కడా ఉరుములు, మెరుపులు సంభవించవచ్చు. గంటకు 30 నుంచి 40 కిలోమీటర్ల వేగంతో, గరిష్ఠంగా 50 కిలోమీటర్ల వేగంతో బలమైన గాలులు వీచే అవకాశం ఉంది. రేపు (అక్టోబర్ 21): వర్షాల పరిస్థితి కొనసాగనుంది. కొన్ని ప్రాంతాల్లో తేలికపాటి నుంచి మోస్తరు వర్షాలు, ఉరుములతో కూడిన జల్లులు కురవవచ్చు. ఒకటి లేదా రెండు చోట్ల భారీ వర్షాలు పడే అవకాశం ఉంది. పిడుగులు, మెరుపులతో పాటు గంటకు 30–40 కిలోమీటర్ల వేగంతో, గరిష్ఠంగా 50 కిలోమీటర్ల వేగంతో గాలులు వీస్తాయి. ఎల్లుండి (అక్టోబర్ 22): అక్కడక్కడా తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. ఒకటి లేదా రెండు చోట్ల ఉరుములు, మెరుపులు సంభవించవచ్చు. గంటకు 30–40 కిలోమీటర్ల వేగంతో, గరిష్ఠంగా 50 కిలోమీటర్ల వేగంతో బలమైన గాలులు వీచే అవకాశం ఉంది.
రాయలసీమలోనూ వర్ష సూచన
ఈరోజు, రేపు (అక్టోబర్ 20, 21): రాయలసీమలో కొన్ని చోట్ల తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. ఒకటి లేదా రెండు చోట్ల భారీ వర్షాలు కురవవచ్చు. ఉరుములు, మెరుపులతో పాటు గంటకు 30–40 కిలోమీటర్ల వేగంతో, గరిష్ఠంగా 50 కిలోమీటర్ల వేగంతో గాలులు వీచే అవకాశం ఉంది. ఎల్లుండి (అక్టోబర్ 22): రాయలసీమలో ఒకటి లేదా రెండు చోట్ల తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. అక్కడక్కడా ఉరుములు, మెరుపులు సంభవించవచ్చు. బలమైన గాలులు గంటకు 30–40 కిలోమీటర్ల వేగంతో, గరిష్ఠంగా 50 కిలోమీటర్ల వేగంతో వీచే సూచనలు ఉన్నాయి.
ప్రజలు అప్రమత్తంగా ఉండాలి
రానున్న మూడు రోజుల పాటు వర్షాలు, ఉరుములు, మెరుపులు, బలమైన గాలులు వీచే అవకాశం ఉన్నందున ప్రజలు అప్రమత్తంగా ఉండాలి. ఉరుములు, మెరుపులు సంభవించే సమయంలో బహిరంగ ప్రదేశాల్లో ఉండకుండా సురక్షితమైన భవనాల్లో ఆశ్రయం పొందాలి. భారీ వర్షాలు కురిసే ప్రాంతాల్లో స్థానిక వాతావరణ పరిస్థితులను గమనిస్తూ జాగ్రత్తలు తీసుకోవాలని వాతావరణ శాఖ అధికారులు తెలిపారు.