ఏపీలో భారీగా అదనపు ఎస్పీల బదిలీలు.. ఐదుగురికి పోస్టింగ్‌లు..!

ఏపీలో పలువురు నాన్‌కేడర్ ఎస్పీలతో పాటు అదనపు ఎస్పీలకు ప్రభుత్వం పోస్టింగ్ ఇచ్చింది. ఈ నేపథ్యంలో సుదీర్ఘకాలంగా ఎదురుచూస్తోన్న ఐదుగురికి పోస్టింగ్‌లు లభించాయి. మరో 20 మంది డీఎస్పీలకు ఎస్పీలుగా.. 12 మంది నాన్ కేడర్ ఎస్పీలకు అడిషనల్ ఎస్పీలుగా ప్రమోషన్లు ఇచ్చింది. ఈ మేరకు సోమవారం రాత్రి హోంశాఖ ఉత్తర్వులు జారీ చేసింది.

ఈ నేపథ్యంలో విశాఖపట్నం సిటీలో క్రైమ్స్‌ డీసీపీగా పనిచేస్తున్న వి.సురేష్‌ బాబును అక్కడే కొనసాగిస్తూ ఆర్‌.గంగాధర్‌రావును ఏసీబీ జాయింట్‌ డైరెక్టర్‌గా పంపింది. ఇక మాజీ ఉప ముఖ్యమంత్రి నిమ్మకాయల చినరాజప్ప ఓఎస్‌డీగా పనిచేసిన ఎ.వెంకటరత్నంను మంగళగిరిలోని డీజీపీ కార్యాలయంలో శాంతిభద్రతల ఏఐజీగా పంపింది. అలాగే మోహన్‌రావును ఇంటెలిజెన్స్‌కు, టి.గంగాధరంను కర్నూలుకు.. సీఐడీలో ఉన్న మేరీ ప్రశాంతిని విజయవాడ సిటీ అడ్మిన్‌ డీసీపీగా, రెడ్‌ శాండల్‌ టాస్క్‌ఫోర్స్‌ నుంచి వెంకట రవికుమార్‌ను ఏసీబీ జేడీగా ప్రభుత్వం బదిలీ చేసింది. ఇక ఏపీ ఎస్పీ మూడో బెటాలియన్‌ కమాండెంట్‌ శ్రీరామమూర్తిని 14వ బెటాలియన్‌కు, మరో కమాండెంట్‌ నాగరాజును హైదరాబాద్‌లోని అంబర్‌పేట్‌కు, వెయిటింగ్‌లో ఉన్న సత్తిబాబును ఏసీబీకి బదిలీ చేశారు. వీరితో పాటు వెయిటింగ్‌లో ఉన్న అడిషనల్‌ ఎస్పీ సుప్రజను తిరుపతి అడ్మిన్‌కు, అడిషనల్‌ డీసీపీ ఎం. రజనీని విశాఖ సిటీకి పంపిన ప్రభుత్వం.. ఏసీబీలో ఫైర్‌బ్రాండ్‌గా పనిచేసిన ఎ.రమాదేవిని విశాఖపట్నం మెరైన్‌కు బదిలీ చేసింది. కాగా ఇంటెలిజెన్స్‌లో ఉన్న కరీముల్లా షరీఫ్‌ను పశ్చిమ గోదావరి అడ్మిన్‌గా, వెయిటింగ్‌లో ఉన్న చౌడేశ్వరికి మార్కాపురం ఓఎస్‌డీగా పోస్టింగ్ ఇచ్చింది.