రణబాలి కథ రివీల్ చేసిన దర్శకుడు!

దర్శకుడు రాహుల్ సంకృత్యన్, టాక్సీవాలా, శ్యామ్ సింగరాయ్ వంటి విజయవంతమైన చిత్రాలతో తనకంటూ ప్రత్యేక గుర్తింపు పొందారు. ప్రస్తుతం ఆయన తన తదుపరి ప్రాజెక్ట్, విజయ్ దేవరకొండ కథానాయకుడిగా తెరకెక్కుతున్న రణబాలి సినిమాతో ప్రేక్షకుల ముందుకు రానున్నారు. పీరియాడిక్ యాక్షన్ డ్రామాగా రూపొందుతున్న ఈ చిత్రం కథకు సంబంధించి ఇటీవల పలు ఆసక్తికర విషయాలను రాహుల్ వెల్లడించారు. ఇప్పటివరకు రణబాలి ప్రాజెక్ట్ ఒక స్వాతంత్ర్య సమరయోధుడి బయోపిక్ అని, రాయలసీమ చరిత్రకు సంబంధించిన నిజమైన కథ అని అనేక ఊహాగానాలు పరిశ్రమలో వినిపించాయి. అయితే, ఈ పుకార్లపై దర్శకుడు రాహుల్ సంకృత్యన్ స్పష్టతనిచ్చారు. కథా నేపథ్యం, సినిమా ఆత్మ ఎలా ఉండబోతున్నాయో ఆయన హింట్ ఇచ్చారు. రాయలసీమ చరిత్రలో చెరగని ముద్ర వేసిన బుడ్డా వెంగళ్ రెడ్డి, ఉయ్యాలవాడ నరసింహారెడ్డి, గడేకల్ బొబ్బిలి నాగిరెడ్డి వంటి వీరుల జీవితాలు తనను ఎంతగానో ప్రభావితం చేశాయని ఆయన తెలిపారు. వారి వీరోచిత గాథలు, పోరాటాలు ఇప్పటికీ ఆ ప్రాంతంలో పాటల రూపంలో ప్రచారంలో ఉన్నాయని, ఆ స్ఫూర్తిని ఆధారంగా చేసుకుని రణబాలి పాత్రను అభివృద్ధి చేసినట్లు వెల్లడించారు