మా దేశానికే మీ సేవలు… లేకుంటే.. ‘ యాపిల్ ‘ కి ట్రంప్ హెచ్చరిక

యాపిల్ సంస్థ తన ఉత్పత్తులను తమ దేశంలోనే తయారు చేయాలని, లేని పక్షంలో విపరీతంగా టారిఫ్ లు విధిస్తామని అమెరికా అధ్యక్షుడు డొనాల్డ్ ట్రంప్ హెచ్చరించారు. యాపిల్ తాజాగా తన అత్యాధునిక ‘ మ్యాక్ ప్రో ‘ డెస్క్ టాప్ కంప్యూటర్ ని తయారు చేసింది. కంపెనీ ఉత్పత్తుల్లోనే ఇది అత్యంత ఖరీదైనది. తన ప్రొడక్టులను ఇక అమెరికా నుంచి చైనాకు షిఫ్ట్ చేయాలని యాపిల్ నిర్ణయించిన నేపథ్యంలో ట్రంప్ ఆగ్రహం వ్యక్తం చేశారు. ‘ మీరు చైనాకు ‘ వెళ్ళిపోతే ‘.. మీకు టారిఫ్ లో మాఫీ గానీ, ఇతర ప్రయోజనాలు గానీ ఉండబోవు ‘ అని ఆయన ట్వీట్ చేశాడు. యాపిల్ తన కొత్త కంప్యుటర్లోని కొన్ని విడిభాగాలను చైనాలో తయారు చేయించింది. కానీ ఇక ఈ ‘ ఆటలు సాగబోవని ‘, మీరు ఈ దేశంలోనే ఇందుకు పూనుకోవాలని ట్రంప్ ‘ ఆదేశించాడు ‘. ఆయన ఈ ప్రకటన చేసిన వెంటనే.. యాపిల్ షేర్ల వ్యాల్యూ ఇండెక్స్ లో స్వల్పంగా తగ్గింది. (ఈ ఇండెక్స్ లోనే ప్రధాన టెక్నాలజీ సంస్థల షేర్లు ట్రేడ్ అవుతుంటాయి).

అమెరికా-చైనా మధ్య ట్రేడ్ వార్ జరుగుతున్నప్పటికీ.. తన ఈ అధునాతన కంప్యూటర్ ఉత్పత్తిని చైనాకు మార్చాలని యాపిల్ భావిస్తోందని వాల్ స్ట్రీట్ జర్నల్ పేర్కొంది. కొత్త మ్యాక్ ప్రో కంప్యూటర్ తయారీకి అనువుగా చైనాలోని ‘ క్వాంటా’ కంప్యూటర్ సంస్థతో కలిసి పని చేయాలని యాపిల్ నిర్ణయించిందని న్యూయార్క్ డైలీ ఒక వార్తను ప్రచురించింది. ఆ దేశంలోని ఓ ప్లాంట్ లో ఇప్పటికే యాపిల్ సంస్థ ఉత్పత్తులు కొన్ని తయారవుతున్నాయి. మ్యాక్ ప్రో కంప్యూటర్ ని ఇటీవల కాలిఫోర్నియాలో ప్రదర్శనకు ఉంచినప్పుడు అది అనేకమంది దృష్టిని ఆకర్షించింది. దీని ధరను 6 వేల అమెరికన్ డాలర్లు గా నిర్ణయించారు. 2018 లో అమెరికా-చైనా మధ్య ట్రేడ్ వార్ మొదలైనప్పటి నుంచి చైనా నుంచి దిగుమతి అయ్యే అన్ని వస్తువులమీదా ట్రంప్ ప్రభుత్వం టారిఫ్ లను పెంచింది. అలాగే అమెరికా నుంచి తాము దిగుమతి చేసుకునే సరకులపైనా చైనా సుంకాలను పెంచింది. అప్పటి నుంచి ఈ రెండు దేశాల మధ్యా టారిఫ్ వార్ కొనసాగుతోంది. ఇంత జరుగుతున్నా యాపిల్ సంస్థ తన కొత్త కంప్యూటర్ తయారీని చైనాకు మార్చాలని తీసుకున్న నిర్ణయం ట్రంప్ ప్రభుత్వానికి మింగుడుపడడంలేదు.