గోరంత సైజు ఫ్యాన్‌తో స్మార్ట్ గ్లాసెస్ భవిష్యత్తు మారనుందా? ఈ టెక్నాలజీ గురించి తెలుసా

పరికరాల ఉపరితల ఉష్ణోగ్రతను 40 శాతం వరకు తగ్గించడంతో పాటు సన్నని సికామోర్ స్పీకర్లతో బరువును నియంత్రించేలా ఈ సిస్టమ్ రూపుదిద్దుకుంది. ఆర్టిఫిషియల్ ఇంటెలిజెన్స్ శకంలో రోజువారీ వాడకానికి అత్యంత అనుకూలంగా మారనున్న ఈ విప్లవాత్మక స్మార్ట్ గ్లాసెస్ కూలింగ్ టెక్నాలజీ పూర్తి వివరాలను తెలుసుకుందాం!

వేడిని తగ్గించే ‘మైక్రో కూలింగ్’..

సాధారణంగా స్మార్ట్ గ్లాసెస్‌ను ఎక్కువసేపు ఉపయోగిస్తే వేడెక్కడం అందరూ ఎదుర్కొంటున్న ప్రధాన సమస్య. ఈ ఇబ్బందికి శాశ్వతంగా ముగింపు పలుకుతూ xMEMS Labs ఒక వినూత్న మైక్రో కూలింగ్ టెక్నాలజీని పరిచయం చేసింది. ఈ కొత్త కూలింగ్ వ్యవస్థను ‘µCooling’ పేరుతో కంపెనీ పిలుస్తోంది. ఇది ఒక చిన్న చిప్ రూపంలో ఉండి, నేరుగా గ్లాసెస్ ఫ్రేమ్‌లోనే సరిగ్గా సరిపోతుంది. చాలా చిన్నదిగా ఉన్నప్పటికీ, పరికరం ఉపరితల ఉష్ణోగ్రతను ఏకంగా 40 శాతం వరకు తగ్గిస్తుందని కంపెనీ చెబుతోంది. అంతేకాకుండా, వేడిని తట్టుకునే సామర్థ్యాన్ని 70 శాతం వరకు పెంచుతుంది. దీంతో వినియోగదారులు రోజంతా ఎలాంటి అసౌకర్యం లేకుండా ఈ గ్లాసెస్‌ను ధరించవచ్చు.

మెరుగైన ఆడియో అనుభవం

కేవలం కూలింగ్ మాత్రమే కాకుండా, బరువును తగ్గించేందుకు అత్యంత సన్నని స్పీకర్ వ్యవస్థను కూడా కంపెనీ పరిచయం చేసింది. ‘సికామోర్’ పేరుతో రూపుదిద్దుకున్న ఈ స్పీకర్ మందం కేవలం ఒక మిల్లీమీటర్ మాత్రమే ఉంటుంది. గ్లాసెస్ హ్యాండిల్స్‌లో అమర్చే ఈ స్పీకర్ల వల్ల బరువు పెరగకుండానే, నాణ్యమైన సౌండ్ మరియు ఏఐ అసిస్టెంట్లతో మాట్లాడేటప్పుడు స్పష్టమైన ఆడియో లభిస్తుంది.

తేలికైన స్మార్ట్ గ్లాసెస్

ప్రస్తుతం స్మార్ట్ గ్లాసెస్ పరిధి పెరిగి, ఆర్టిఫిషియల్ ఇంటెలిజెన్స్ (AI) ఫీచర్లు విపరీతంగా ఎక్కువ అవుతున్నాయి. ప్రాసెసింగ్ ఎక్కువయ్యే కొద్దీ వేడి, పరికరం బరువు కూడా పెరుగుతాయి. ఈ రెండింటినీ సమర్థవంతంగా అదుపులో ఉంచడానికి ఈ కూలింగ్ ఫ్యాన్ మరియు సన్నని స్పీకర్ల కాంబినేషన్ అద్భుతంగా తోడ్పడుతుంది. బరువు తక్కువగా, వేడెక్కకుండా ఉండే స్మార్ట్ గ్లాసెస్ రోజువారీ వాడకానికి ఎంతో అనుకూలంగా మారనున్నాయి. ఈ కొత్త టెక్నాలజీని త్వరలోనే తైపీ, షెన్‌జెన్‌లలో జరగబోయే ప్రత్యేక సదస్సుల్లో కంపెనీ ప్రదర్శించనుంది. ఈ సాంకేతికత గనుక పూర్తిస్థాయిలో అందుబాటులోకి వస్తే, మనం వాడే స్మార్ట్ గ్లాసెస్ మరింత తేలికగా, స్టైలిష్‌గా, శక్తివంతంగా మారడం ఖాయం.