డ్రైవింగ్ లవర్స్ కోసం రీఎంట్రీ ఇచ్చేస్తున్న రెనాల్ట్. ధర తెలియాలంటే ఆరోజు వరకు ఆగాల్సిందే!

పెట్రోల్ ఇంజిన్‌తో పాటు హైబ్రిడ్ టెక్నాలజీ ఉన్న SUVలకు ప్రస్తుతం డిమాండ్ పెరుగుతోంది. ఇదే సమయంలో రెనాల్ట్ డస్టర్‌లో సెల్ఫ్ ఛార్జింగ్ హైబ్రిడ్ టెక్నాలజీని తీసుకొస్తోంది. 1.8 లీటర్ పెట్రోల్ ఇంజిన్‌కు రెండు ఎలక్ట్రిక్ మోటార్లను జత చేయడంతో మొత్తం 160bhp పవర్ అందుతుంది. మైలేజ్ కూడా 22 నుంచి 25kmpl వరకు ఉండొచ్చని అంచనా.

రెండు ఎలక్ట్రిక్ మోటార్లు

కొత్త డస్టర్ హైబ్రిడ్‌లో సెల్ఫ్ ఛార్జింగ్ హైబ్రిడ్ టెక్నాలజీని ఉపయోగించనున్నారు. రెనాల్ట్ దీనిని E-Tech హైబ్రిడ్ సిస్టమ్‌గా పిలుస్తోంది. ప్రస్తుతం డస్టర్ 1.0 లీటర్ టర్బో పెట్రోల్, 1.3 లీటర్ టర్బో పెట్రోల్ ఇంజిన్లతో అందుబాటులో ఉంది. హైబ్రిడ్ వెర్షన్ మూడో పవర్‌ట్రెయిన్‌గా చేరనుంది.

ఈ హైబ్రిడ్ వ్యవస్థలో 1.8 లీటర్, నాలుగు సిలిండర్ల పెట్రోల్ ఇంజిన్‌కు రెండు ఎలక్ట్రిక్ మోటార్లు జతకానున్నాయి. ఒకటి 20bhp సామర్థ్యంతో స్టార్టర్ జనరేటర్‌గా పనిచేస్తుంది. మరో 49bhp ట్రాక్షన్ మోటార్ నేరుగా చక్రాలకు శక్తిని అందిస్తుంది. వీటికి 1.4kWh బ్యాటరీ ప్యాక్ ఉంటుంది. మొత్తం వ్యవస్థ కలిపి 160bhp పవర్, 172Nm టార్క్‌ను ఉత్పత్తి చేస్తుంది. మల్టీ మోడ్ క్లచ్‌లెస్ ఆటోమేటిక్ గేర్‌బాక్స్‌తో ఇది రానుంది.

మైలేజ్ పరంగా 22 నుంచి 25kmpl వరకు లభించే అవకాశం ఉందని అంచనా. ముఖ్యంగా తక్కువ వేగంతో ప్రయాణించే సమయంలో ఎలక్ట్రిక్ మోటార్ ఎక్కువగా పనిచేస్తుంది. నగరాల్లో ట్రాఫిక్ పరిస్థితుల్లో దాదాపు 80 శాతం వరకు EV మోడ్‌లో ప్రయాణించే అవకాశం ఉండటంతో ఇంధన వినియోగం తగ్గే అవకాశం ఉంది.

ధర రూ.2 లక్షలు ఎక్కువ?

ప్రస్తుతం రెనాల్ట్ డస్టర్ ICE వెర్షన్ల ధరలు రూ.10.49 లక్షల నుంచి రూ.18.69 లక్షల వరకు ఉన్నాయి. హైబ్రిడ్ టెక్నాలజీ, ఎలక్ట్రిక్ మోటార్లు, బ్యాటరీ ప్యాక్ కారణంగా హైబ్రిడ్ వెర్షన్ ధర సుమారు రూ.2 లక్షలు ఎక్కువగా ఉండొచ్చని అంచనా. ముఖ్యంగా హైయర్ స్పెక్ వేరియంట్లలో ఈ పవర్‌ట్రెయిన్ అందుబాటులోకి వచ్చే అవకాశం ఉంది. లుక్ విషయంలో హైబ్రిడ్ డస్టర్ సాధారణ మోడల్‌కు చాలా దగ్గరగా ఉండనుంది. టెయిల్‌గేట్‌పై ఉండే ‘HYBRID’ బ్యాడ్జ్ ప్రధాన గుర్తింపుగా ఉంటుంది. సిగ్నేచర్ రెనాల్ట్ గ్రిల్, ఐబ్రో తరహా DRLలతో LED హెడ్‌ల్యాంప్స్, 18 అంగుళాల అల్లాయ్ వీల్స్, కనెక్టెడ్ LED టెయిల్‌ల్యాంప్స్ వంటి డిజైన్ అంశాలు కొనసాగుతాయి.

ఫీచర్ల విషయానికి వస్తే 10.1 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, గూగుల్ బిల్ట్ ఇన్, వైర్‌లెస్ స్మార్ట్‌ఫోన్ కనెక్టివిటీ, పవర్డ్, వెంటిలేటెడ్ ఫ్రంట్ సీట్లు, పనోరమిక్ సన్‌రూఫ్, 360-డిగ్రీ కెమెరా, లెవెల్-2 ADAS వంటి ఫీచర్లు లభించనున్నాయి. హైబ్రిడ్ పవర్‌ట్రెయిన్‌తో ఈ SUV మారుతి గ్రాండ్ విటారా, టయోటా హైరైడర్ వంటి మోడళ్లకు పోటీ ఇవ్వనుంది. భవిష్యత్తులో హ్యుందాయ్ క్రెటా, కియా సెల్టోస్ హైబ్రిడ్ మోడళ్లతోనూ పోటీ ఉండే అవకాశం ఉంది. 2026 అక్టోబర్ 17న ధరలు వెల్లడైన తర్వాత డస్టర్ హైబ్రిడ్‌కు సంబంధించిన పూర్తి వివరాలు స్పష్టమవుతాయి.