WiFi రూటర్‌పై కాయిన్ పెడితే ఇంటర్నెట్ స్పీడ్ పెరుగుతుందా? ఈ ట్రిక్‌లో నిజమెంత?

ఇంట్లో వైఫై సిగ్నల్ తక్కువగా ఉందా? అయితే రూటర్‌పై ఒక నాణెం పెడితే సిగ్నల్, ఇంటర్నెట్ స్పీడ్ పెరుగుతుందని సోషల్ మీడియాలో కొన్ని వీడియోలు, పోస్టులు వైరల్ అవుతున్నాయి. నాణెంలోని లోహం యాంటెనా లాగా పనిచేసి వైఫై సిగ్నల్‌ను మెరుగుపరుస్తుందని కొందరు చెబుతున్నారు. మరి అందులో నిజమెంత అనేది ఇప్పుడు తెలుసుకునే ప్రయత్నం చేద్దాం..

నాణెం పెడితే ఇంటర్నెట్ స్పీడ్ పెరుగుతుందా?

రౌటర్‌పై నాణెం పెట్టడం వల్ల వైఫై వేగం పెరుగుతుందని చెప్పడం సరైంది కాదు. సాధారణంగా వైఫై రూటర్లు 2.4GHz, 5GHz వంటి ఫ్రీక్వెన్సీల్లో పనిచేస్తాయి. ఒక సాధారణ కాయిన్ రూటర్‌పై ఉంచడం వల్ల ఈ సిగ్నల్ శక్తి లేదా ఇంటర్నెట్ వేగం గణనీయంగా పెరుగుతుందని చెప్పడానికి ఆధారం లేదు. నెట్‌వర్క్ వేగం అనేది ఇంటర్నెట్ ప్లాన్, రూటర్ సామర్థ్యం, దూరం, గోడలు, ఇతర ఎలక్ట్రానిక్ పరికరాల జోక్యం వంటి అనేక అంశాలపై ఆధారపడి ఉంటుంది.

నాణెం వల్ల ఏమైనా ఉపయోగం ఉందా?

రూటర్‌ బరువు తక్కువగా ఉండి టేబుల్‌పై కదులుతున్నట్లయితే దాన్ని స్థిరంగా ఉంచడానికి నాణెం ఉపయోగపడవచ్చు. కానీ దీనికి వైఫై సిగ్నల్ పెరగడానికి ఎలాంటి సంబంధం లేదు. ముఖ్యంగా రౌటర్‌పై లోహ వస్తువులను ఉంచడం ద్వారా యాంటెనా పనితీరు మెరుగుపడుతుందని భావించడం తప్పు.

రూటర్‌పై వస్తువులు పెట్టడం ఎందుకు మంచిది కాదు?

రూటర్ పనిచేసే సమయంలో కొంత వేడిని ఉత్పత్తి చేస్తుంది. ఆ వేడి బయటకు వెళ్లేందుకు రూటర్‌లో వెంటిలేషన్ రంధ్రాలు ఉంటాయి. వాటిపై నాణేలు లేదా ఇతర వస్తువులు ఉంచితే గాలి ప్రసరణకు ఆటంకం ఏర్పడే అవకాశం ఉంది. దీని వల్ల రూటర్ వేడెక్కడం, పనితీరు తగ్గడం లేదా దీర్ఘకాలంలో పరికరానికి నష్టం కలిగే ప్రమాదం ఉంటుంది.

రూటర్‌ను ఎక్కడ ఉంచాలి?

మెరుగైన వైఫై కోసం రౌటర్‌ను ఇంటి మధ్యభాగానికి దగ్గరగా, కొంత ఎత్తులో, చుట్టూ ఖాళీ స్థలం ఉండేలా ఉంచడం మంచిది. పెద్ద లోహ వస్తువులు, మైక్రోవేవ్ వంటి ఎలక్ట్రానిక్ పరికరాలు, మూసివున్న క్యాబినెట్లు, అధిక వేడి ఉండే ప్రాంతాలకు దూరంగా ఉంచాలి. వంటగది లేదా కిటికీ దగ్గర ఉంచడం కంటే ఇంటిలోని ఇతర ప్రాంతాలకు సిగ్నల్ సమానంగా చేరే ప్రదేశాన్ని ఎంచుకోవడం ఉత్తమం.