స్క్రీన్​ ఇంటీరియర్‌‌తో మార్కెట్‌ను ఆకట్టుకుంటున్న రెనాల్ట్‌..! కొత్త కారు విశేషాలు ఇవే

చిన్న కార్ల విభాగంలో చెరగని ముద్ర వేసిన క్విడ్ సరికొత్త ఆధునిక సాంకేతికత, ఆకర్షణీయమైన డిజైన్ హంగులతో మరింత పటిష్టంగా రూపుదిద్దుకుంది. మెరుగైన భద్రతా ప్రమాణాలతో పాటు అధునాతన ఇంటీరియర్ అనుభూతిని అందించే లక్ష్యంతో వస్తున్న ఈ హ్యాండ్‌సెట్ మార్కెట్లో భారీ అంచనాలను రేకెత్తిస్తోంది. అత్యాధునిక హంగులతో రూపుదిద్దుకుంటున్న ఈ కారు విశేషాలు తెలుసుకుందాం.

ఆకర్షణీయమైన డిజైన్

ఈ కారు ముందు భాగంలో పదునైన కొత్త బంపర్, గ్లాస్ బ్లాక్ ఫినిషింగ్ గ్రిల్‌ను అమర్చగా అన్ని వేరియంట్లలో ఎల్ఈడీ డీఆర్ఎల్స్ మరియు షార్క్-ఫిన్ యాంటెన్నా స్టాండర్డ్‌గా వస్తున్నాయి. వెనుక వైపు పారదర్శక లెన్స్‌లతో కూడిన కొత్త టెయిల్ ల్యాంప్‌లు ఉండగా లోగోలోనే రివర్సింగ్ కెమెరాను అత్యంత చాకచక్యంగా సమీకృతం చేశారు. టాప్-ఎండ్ అవుట్‌సైడర్ వేరియంట్ డ్యూయల్-టోన్ రూఫ్ మరియు 14 అంగుళాల డైమండ్-కట్ అల్లాయ్ వీల్స్‌ను కలిగి ఉంది.

ఇక ఇంటీరియర్ విషయానికి వస్తే డ్యాష్‌బోర్డ్‌లో పెద్ద మార్పులు చేసి 10.1 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆండ్రాయిడ్ ఆటో, ఆపిల్ కార్‌ప్లేతో పాటు 7 అంగుళాల టీఎఫ్‌టీ డిజిటల్ ఇన్‌స్ట్రుమెంట్ క్లస్టర్‌ను ఏర్పాటు చేశారు. మల్టీఫంక్షన్ స్టీరింగ్ వీల్, రెండు యూఎస్‌బీ టైప్-సి పోర్టులు ఇందులో ప్రధాన ఆకర్షణగా నిలుస్తున్నాయి.

భద్రతా ప్రమాణాలు

మెకానికల్ పరంగా ఇందులో అదే 1.0 లీటర్ 3-సిలిండర్ ఎస్సీఈ ఫ్లెక్స్-ఫ్యూయల్ ఇంజిన్‌ను కొనసాగించగా ఇది ఫ్లెక్స్-ఫ్యూయల్‌పై 71 హెచ్‌పీ పవర్, 98 ఎన్ఎం టార్క్ మరియు పెట్రోల్‌పై 68 హెచ్‌పీ పవర్, 92 ఎన్ఎం టార్క్‌ను ఉత్పత్తి చేస్తుంది. ఈ కారు బూట్ స్పేస్ 290 లీటర్లుగా ఉండగా వెనుక సీట్లు మడిచితే అది ఏకంగా 1,100 లీటర్లకు పెరుగుతుంది. ప్రయాణీకుల భద్రత కోసం ప్రామాణికంగా 4 ఎయిర్‌బ్యాగ్‌లు, ఈఎస్‌సీ, ట్రాక్షన్ కంట్రోల్, హిల్-స్టార్ట్ అసిస్ట్ మరియు టీపీఎంఎస్ వంటి అధునాతన ఫీచర్లను పొందుపరిచారు. బ్రెజిల్ మార్కెట్లో ఎవల్యూషన్ వేరియంట్ ధర సుమారు రూ. 13.19 లక్షలు, టెక్నో రూ. 14.10 లక్షలు అలాగే అవుట్‌సైడర్ వేరియంట్ ధర రూ. 15.75 లక్షలుగా నిర్ణయించగా భారత్‌లో ఈ మోడల్ విడుదలపై కంపెనీ నుంచి అధికారిక స్పష్టత రావాల్సి ఉంది.