విండో AC కొనాలా? లేదా స్ప్లిట్ AC కొనాలా? దేనికి తక్కువ కరెంట్‌ అవసరం?

వేసవి కాలంలో ఎయిర్ కండిషనర్ కొనుగోలు చేయాలనుకునే వారి సంఖ్య పెరుగుతోంది. అయితే 1.5 టన్ విండో AC తీసుకోవాలా? లేక 1.5 టన్ స్ప్లిట్ AC కొనాలా అనే సందేహం చాలామందిని వేధిస్తోంది. ముఖ్యంగా విద్యుత్ వినియోగం, ఖర్చు విషయంలో ఈ రెండు మోడళ్ల మధ్య తేడా ఏమిటి అన్నది తెలుసుకోవడం అవసరం. ఇటీవల మార్కెట్లో అందుబాటులో ఉన్న 3-స్టార్ రేటింగ్ కలిగిన 1.5 టన్ విండో, స్ప్లిట్ AC మోడళ్లను పరిశీలిస్తే, విద్యుత్ వినియోగంలో స్పష్టమైన తేడా కనిపిస్తుంది. 1.5 టన్ 3-స్టార్ విండో AC సుమారు 1,600 గంటల వినియోగంలో 1,204.98 యూనిట్ల విద్యుత్‌ను వినియోగిస్తుంది. అంటే గంటకు సగటున 0.753 యూనిట్లు ఖర్చవుతాయి. ఒక యూనిట్ విద్యుత్ ధర రూ.7గా పరిగణిస్తే, గంటకు దాదాపు రూ.5.27 ఖర్చు అవుతుంది.

అదే సమయంలో 1.5 టన్ 3-స్టార్ స్ప్లిట్ AC 1,600 గంటల్లో 975.26 యూనిట్ల విద్యుత్‌ను మాత్రమే వినియోగిస్తుంది. అంటే గంటకు 0.609 యూనిట్లు మాత్రమే ఖర్చవుతాయి. ఇదే లెక్క ప్రకారం గంటకు సుమారు రూ.4.26 విద్యుత్ ఖర్చు అవుతుంది. ఈ గణాంకాల ప్రకారం స్ప్లిట్ AC విండో AC కంటే తక్కువ విద్యుత్ వినియోగిస్తుందని స్పష్టమవుతోంది. నిపుణుల అభిప్రాయం ప్రకారం స్ప్లిట్ ACలు ఆధునిక సాంకేతికతతో రూపొందించబడటం వల్ల తక్కువ విద్యుత్‌తో ఎక్కువ కూలింగ్ ఇస్తాయి. అలాగే ఇవి శబ్దం తక్కువగా ఉంచడం, గదిలో సమానంగా చల్లదనం కలిగించడం వంటి ప్రయోజనాలు కలిగి ఉంటాయి.

అయితే విండో ACలు తక్కువ ధరలో లభించడం, ఇన్‌స్టాలేషన్ సులభంగా ఉండటం వల్ల చిన్న గదులకు అనుకూలంగా ఉంటాయి. కాబట్టి వినియోగదారులు AC కొనుగోలు చేసే ముందు తమ గది పరిమాణం, బడ్జెట్, విద్యుత్ బిల్లు అంశాలను పరిగణనలోకి తీసుకోవాలని నిపుణులు సూచిస్తున్నారు. ముఖ్యంగా ఎనర్జీ రేటింగ్ చార్ట్‌ను పరిశీలించడం ద్వారా భవిష్యత్తులో అధిక ఖర్చులను నివారించవచ్చు.

మరిన్ని టెక్‌ వార్తల కోసం ఇక్కడ క్లిక్‌ చేయండి