Auqib Nabi: కోహ్లీ, రోహిత్ ఇచ్చిన సలహాలే న్యూజిలాండ్‌లో ఆకిబ్ నబీకి బాగా కలిసొచ్చాయా?

Auqib Nabi

Auqib Nabi: భారత యువ ఫాస్ట్ బౌలర్ ఆకిబ్ నబీ న్యూజిలాండ్ పర్యటనలో తనదైన ముద్ర వేయడానికి సిద్ధమవుతున్నాడు. గంటకు సుమారు 130 కిలోమీటర్ల వేగంతో బౌలింగ్ చేసే అతడు.. కేవలం వేగాన్నే నమ్ముకోవడం లేదు. బంతిని సరైన ప్రదేశంలో వేయడం, పిచ్ నుంచి లభించే సీమ్ కదలికలను ఉపయోగించుకోవడంపై దృష్టి పెట్టాడు. ఈ విషయంలో శుభ్‌మన్ గిల్, విరాట్ కోహ్లీ, రోహిత్ శర్మ వంటి సీనియర్ ఆటగాళ్లు ఇచ్చిన సలహాలు తనకు ఎంతో ఉపయోగపడుతున్నాయని నబీ వెల్లడించాడు.

వెస్టిండీస్‌పై అరంగేట్రం

వెస్టిండీస్‌తో స్వదేశంలో జరిగిన సిరీస్‌లో ఆకిబ్ నబీ భారత జట్టు తరఫున అంతర్జాతీయ క్రికెట్‌లో అరంగేట్రం చేశాడు. దేశవాళీ క్రికెట్‌లో నిలకడగా రాణించి జాతీయ జట్టులో చోటు సంపాదించాడు. ఇప్పుడు న్యూజిలాండ్‌తో జరుగుతున్న వన్డే సిరీస్‌లో తన బౌలింగ్‌తో గుర్తింపు తెచ్చుకోవాలని చూస్తున్నాడు. అక్కడి పరిస్థితులు తనకు కొత్త కావడంతో పిచ్ స్వభావాన్ని అర్థం చేసుకుంటూ బౌలింగ్‌లో మార్పులు చేసుకుంటున్నాడు.

స్పీడ్ కంటే స్కిల్ పైనే నమ్మకం

న్యూజిలాండ్‌తో నాలుగో వన్డేకు ముందు మీడియాతో మాట్లాడిన నబీకి బౌలింగ్ వేగం పెంచుకోవడంపై ప్రశ్న ఎదురైంది. దీనికి అతడు తనదైన శైలిలో సమాధానమిచ్చాడు. వేగంగా బౌలింగ్ చేయడం అదనపు ప్రయోజనమే అయినా, తన బలమైన అంశం బౌలింగ్ నైపుణ్యమేనని చెప్పాడు. దేశవాళీ క్రికెట్‌లో తాను సాధించిన విజయాలకు కారణం కూడా అదే అని వివరించాడు. అక్కడ రాణించడానికి ఉపయోగపడిన నైపుణ్యాలనే అంతర్జాతీయ స్థాయిలోనూ కొనసాగిస్తానని స్పష్టం చేశాడు.

ఇది కూడా చదవండి: Team India: న్యూజిలాండ్ టూర్‌కు పంత్ రెడీ.. అయితే షరతులు వర్తిస్తాయి..!

కోహ్లీ, రోహిత్, గిల్ ఇచ్చిన కీలక సలహా

న్యూజిలాండ్ పర్యటనలో భారత స్టార్ బ్యాటర్లు శుభ్‌మన్ గిల్, విరాట్ కోహ్లీ, రోహిత్ శర్మకు నెట్స్‌లో బౌలింగ్ చేసే అవకాశం నబీకి లభించింది. ఈ సందర్భంగా న్యూజిలాండ్ పిచ్‌లపై ఎలా బౌలింగ్ చేయాలో వారు కొన్ని సూచనలు చేశారు. అక్కడి పరిస్థితుల్లో స్వింగ్ కంటే సీమ్ కదలికలపై ఎక్కువగా దృష్టి పెట్టాలని చెప్పారు. అంతర్జాతీయ స్థాయి బ్యాటర్లు స్వింగ్‌ను సమర్థంగా ఎదుర్కొంటారని, అందుకే బంతిని పిచ్‌పై గట్టిగా పడేలా వేయడం ముఖ్యమని వివరించినట్లు నబీ తెలిపాడు.

స్క్రాంబుల్డ్ సీమ్‎తో వికెట్లు తీయడంపై దృష్టి

కోహ్లీ, రోహిత్, గిల్ చెప్పిన మరో ముఖ్యమైన అంశం స్క్రాంబుల్డ్ సీమ్. బంతిని విడుదల చేసే సమయంలో సీమ్ ఒకే దిశలో కాకుండా కొంత అస్తవ్యస్తంగా ఉండేలా వేయడాన్ని స్క్రాంబుల్డ్ సీమ్ అంటారు. ఇలాంటి బంతులు పిచ్‌పై పడిన తర్వాత ఊహించని కదలికను చూపించే అవకాశం ఉంటుంది. బంతిని పిచ్‌పై గట్టిగా వేయడం ద్వారా కూడా వికెట్లు తీసే అవకాశాలు పెరుగుతాయని సీనియర్లు సూచించినట్లు నబీ వెల్లడించాడు. న్యూజిలాండ్‌లో తొలిసారి బౌలింగ్ చేస్తున్న తనకు ఈ సలహాలు ఎంతో ఉపయోగపడుతున్నాయని చెప్పాడు.

ఇది కూడా చదవండి: Shreyas Iyer: కెప్టెన్‌గా తొలి మ్యాచ్‌లోనే సచిన్ రికార్డుపై కన్నేసిన శ్రేయస్ అయ్యర్

టెస్టు జట్టులో చోటు లేకపోయినా న్యూజిలాండ్‌లోనే నబీ

న్యూజిలాండ్‌తో జరగనున్న టెస్టు సిరీస్‌కు ఆకిబ్ నబీ ఎంపిక కాలేదు. అయినప్పటికీ భారత జట్టు సన్నాహాల్లో సహకరించేందుకు అతడు న్యూజిలాండ్‌లోనే ఉండనున్నాడు. అక్కడి వాతావరణం, పిచ్ పరిస్థితులకు అలవాటు పడటంతో పాటు జట్టు సాధనలో భాగం కానున్నాడు. సీనియర్ ఆటగాళ్ల నుంచి నేర్చుకున్న విషయాలను మైదానంలో ఎంతవరకు అమలు చేస్తాడన్నది ఇప్పుడు ఆసక్తికరంగా మారింది.

మరిన్ని క్రీడా వార్తల కోసం ఇక్కడ క్లిక్ చేయండి..