డకౌట్ హిస్టరీ వెనుక మిస్టరీ ఇంతుందా.. అసలు క్రికెట్ హిస్టరీలో ఎన్ని రకాల డకౌట్స్ ఉన్నాయో తెలిస్తే షాకే..!
Types of Ducks in Cricket: క్రికెట్ ఒక అనిశ్చితుల ఆట. ఎంతటి మహారథులైనా కొన్నిసార్లు సున్నాకే తలవంచక తప్పదు. మైదానంలో ఎన్ని సెంచరీలు నమోదైనా, ఈ వింత డక్ అవుట్లు అందించే రసవత్తర క్షణాలు క్రికెట్ చరిత్రలో ఎప్పటికీ ప్రత్యేక ఆకర్షణగా నిలుస్తాయి.
Types of Ducks in Cricket: మైదానంలోకి అడుగుపెట్టిన బ్యాటర్ భారీ స్కోరు సాధించాలని కలలు కంటాడు. తీరా క్రీజులోకి వచ్చీ రాగానే పరుగుల ఖాతా తెరవకుండానే వెనుదిరిగితే ఆ నిరాశ మాటల్లో చెప్పలేనిది. క్రికెట్ ప్రపంచంలో ఈ జీరో పరుగుల నిష్క్రమణను ‘డక్ అవుట్’ అంటారు. కేవలం సాధారణ డక్ మాత్రమే కాదు.. ఇందులో ఎన్నో రకాలు ఉన్నాయి. ఆ విశేషాలు, ఈ చెత్త లిస్ట్లో చేరిన ఆటగాళ్ల జాబితా ఓసారి చూద్దాం..
డక్ అవుట్ అనే పదం వెనుక ఉన్న అసలు కథ..
క్రికెట్లో సున్నాను బాతు గుడ్డుతో పోల్చడం శతాబ్దాల కిందటే మొదలైంది. బ్యాటర్ సున్నా చుట్టి వెనుదిరిగినప్పుడు స్కోర్బోర్డుపై ఆ అంకె బాతు ఆకారంలో కనిపిస్తుందని 1866 ప్రాంతంలో ఒక వార్తాపత్రికలో తొలిసారిగా రాశారు. నాటి నుంచి నేటి వరకు పరుగులేమీ చేయకుండా వెనుదిరిగే ప్రతి సందర్భానికి ‘డక్’ అనే పదమే స్థిరపడిపోయింది. ఆట సాంకేతికంగా మారిన కొద్దీ ఈ సున్నాలకు సైతం విభిన్నమైన పేర్లు పుట్టుకొచ్చాయి.
గోల్డెన్ డక్ సహా మైదానంలో నమోదయ్యే రకరకాల డక్స్..
బ్యాటర్లు ఎదుర్కొనే బంతులు, ఎదురయ్యే పరిస్థితులను బట్టి క్రికెట్లో డక్ అవుట్లను పలు వర్గాలుగా విభజించారు.
సాధారణ డక్: కొన్ని బంతులు ఆడి, ఎలాంటి పరుగు చేయకుండా పెవిలియన్ చేరడం.
గోల్డెన్ డక్: ఇన్నింగ్స్లో తాను ఎదుర్కొన్న మొట్టమొదటి బంతికే అవుటవ్వడం. బ్యాటర్కు ఇది అత్యంత చేదు అనుభవం.
సిల్వర్ డక్: రెండో బంతికి ఖాతా తెరవకుండా పెవిలియన్ చేరడం.
బ్రాంజ్ డక్: మూడో బంతికి సున్నా పరుగుల వద్ద వెనుదిరగడం.
డైమండ్ డక్: కనీసం ఒక్క బంతి కూడా ఎదుర్కోకుండా రనౌట్ లేదా ఇతర రూపాల్లో అవుట్ కావడం.
రాయల్ లేదా ప్లాటినం డక్: మ్యాచ్ ఆరంభపు తొలి బంతికే ఓపెనర్ సున్నాకు అవుట్ కావడం.
టైటానియం డక్: జట్టు మొత్తం ఇన్నింగ్స్ మొదటి బంతికే ఓపెనర్ రనౌట్ అవ్వడం (బంతి ఎదుర్కోకుండా).
కింగ్ డక్: ఒకే టెస్టు మ్యాచ్లోని రెండు ఇన్నింగ్స్ల్లోనూ మొదటి బంతికే పెవిలియన్ చేరడం.
అంతర్జాతీయ క్రికెట్లో అత్యధిక డక్ అవుట్ల ఘనత ఎవరిది?
సుదీర్ఘ కెరీర్లో ఎంతటి మేటి ఆటగాళ్లయినా ఈ సున్నా ఉచ్చులో చిక్కుకోక తప్పలేదు. అన్ని ఫార్మాట్లు (టెస్ట్, వన్డే, టీ20) కలిపి అంతర్జాతీయ క్రికెట్ చరిత్రలో అత్యధిక సార్లు డక్ అవుట్ అయిన తొలి ఐదుగురు ఆటగాళ్ల వివరాలు:
ముత్తయ్య మురళీధరన్ (శ్రీలంక, 59 )
కోర్ట్నీ వాల్ష్ (వెస్టిండీస్, 54)
సనత్ జయసూర్య ( శ్రీలంక, 53)
గ్లెన్ మెక్గ్రాత్ (ఆస్ట్రేలియా, 49)
స్టువర్ట్ బ్రాడ్ (ఇంగ్లాండ్, 49)
ఈ జాబితాలో ప్రధానంగా లోయర్ ఆర్డర్ బౌలర్లు ఎక్కువగా ఉన్నప్పటికీ, దిగ్గజ ఓపెనర్ సనత్ జయసూర్య టాప్-3లో ఉండటం గమనార్హం. ఆయన దూకుడుగా ఆడే క్రమంలో ఎదురైన ఎదురుదెబ్బలు ఈ రికార్డుకు కారణమయ్యాయి.
మరిన్ని క్రీడా వార్తల కోసం ఇక్కడ క్లిక్ చేయండి..