IPL 2024: గత సీజన్‌లో వైఫల్యం.. కట్‌చేస్తే.. ట్రేడింగ్‌తో ఇద్దరు ఆటగాళ్లను మార్చేసిన లక్నో, రాజస్థాన్ టీంలు?

Rr Vs Lsg Ipl 2024

IPL 2024కి ముందు, లక్నో సూపర్ జెయింట్స్ (LSG), రాజస్థాన్ రాయల్స్ (RR) మధ్య ఇద్దరు కీలక ఆటగాళ్ల కోసం ట్రేడ్ జరిగింది. ఇందులో లక్నో తన కీలక ఫాస్ట్ బౌలర్ అవేష్ ఖాన్‌ (Avesh Khan) కు బదులుగా రాజస్థాన్‌కు చెందిన దేవదత్ పడిక్కల్‌ను కొనుగోలు చేసింది. ESPN Cricinfo ప్రకారం, ఈ ట్రేడ్ ఇప్పటికే రెండు ఫ్రాంచైజీలు అంగీకారం తెలిపాయి. BCCI ఈ వారం అధికారిక ధృవీకరణను ఇవ్వగలదని తెలుస్తోంది.

2022 సీజన్‌కు ముందు జరిగిన వేలంలో అవేష్ ఖాన్‌ను 10 కోట్ల రూపాయల భారీ మొత్తానికి లక్నో సూపర్ జెయింట్స్ కొనుగోలు చేసింది. అతను గత రెండు సీజన్‌లలో ఫ్రాంచైజీతో సంబంధం కలిగి ఉన్నాడు. అదే సమయంలో, దేవదత్ పడిక్కల్‌ను రాజస్థాన్ రూ. 7 కోట్ల 75 లక్షలకు కొనుగోలు చేసింది. గత సీజన్‌లో కూడా తన వద్దే ఉంచుకుంది. అయితే, ఇప్పుడు ఈ ఇద్దరు ఆటగాళ్ల జట్లు తదుపరి ఎడిషన్‌కు ముందు మారుతారని తెలుస్తోంది.

ఈ ఇద్దరు ఆటగాళ్లు గత సీజన్‌లో ఓ మోస్తారు ప్రదర్శనను కలిగి ఉన్నారు. ఇదే కారణంతో ఈ ట్రేడ్ జరిగినట్లు తెలుస్తోంది. ఫాస్ట్ బౌలర్ అవేష్ గత సీజన్‌లో LSG కోసం 9 మ్యాచ్‌లలో 8 వికెట్లు మాత్రమే తీసుకున్నాడు. అతని ఎకానమీ 9.75గా ఉంది. ఎడమచేతి వాటం బ్యాట్స్‌మెన్ దేవదత్ 11 మ్యాచ్‌ల్లో 26.10 సగటుతో 261 పరుగులు మాత్రమే చేశాడు. అతని బ్యాట్ నుంచి కేవలం రెండు అర్ధ సెంచరీలు మాత్రమే వచ్చాయి.

రాజస్థాన్ రాయల్స్ అవేశ్ ఖాన్‌కు ఐపీఎల్ కెరీర్‌లో నాల్గవ ఫ్రాంచైజీ అవుతుంది. ఇప్పటి వరకు అతను రాయల్ ఛాలెంజర్స్ బెంగళూరు, ఢిల్లీ క్యాపిటల్స్, లక్నో సూపర్ జెయింట్స్‌లో భాగంగా ఉన్నాడు. మరోవైపు, లక్నో పడిక్కల్‌కు మూడవ ఫ్రాంచైజీ అవుతుంది. ఇంతకు ముందు అతను రాయల్ ఛాలెంజర్స్ బెంగళూరు, రాజస్థాన్ రాయల్స్ తరపున ఆడాడు.

2024 సీజన్‌కు ముందు ఇది రెండవ ట్రేడ్ మాత్రమే కావడం విశేషం. ఈ నెల ప్రారంభంలో సూపర్ జెయింట్స్ రొమారియో షెపర్డ్‌ని ముంబై ఇండియన్స్‌కి ట్రేడ్ చేసింది. ఐపీఎల్ ఫ్రాంచైజీలు తమ రిటెన్షన్ జాబితాను ప్రకటించేందుకు నవంబర్ 26ను గడువుగా నిర్ణయించింది. 2024 సీజన్ కోసం ఆటగాళ్ల వేలం డిసెంబర్ 19న దుబాయ్‌లో జరగనుంది.

మరిన్ని క్రీడా వార్తల కోసం ఇక్కడ క్లిక్ చేయండి..