IPL 2027: జనవరిలో ఐపీఎల్‌? లలిత్ మోడీకి మద్దతుగా జూహీ చావ్లా కీలక ప్రతిపాదన..!
KKR Co-owner Juhi Chawla: ఐపీఎల్‌ (IPL) నిర్వహణ సమయంపై మరోసారి చర్చ మొదలైంది. ప్రస్తుతం ఏప్రిల్‌–మే నెలల్లో జరిగే ఈ మెగా టోర్నీని జనవరిలో నిర్వహిస్తే ఎలా ఉంటుందనే ప్రతిపాదనకు కోల్‌కతా నైట్‌రైడర్స్‌ సహ యజమాని జూహీ చావ్లా మద్దతు తెలిపారు. వేసవి తీవ్రతను ప్రస్తావిస్తూ, ఆటగాళ్లు, అభిమానులకు మెరుగైన పరిస్థితులు కల్పించేందుకు షెడ్యూల్‌ను పునఃపరిశీలించాలని సూచించారు.
KKR Co-owner Juhi Chawla: ఇండియన్ ప్రీమియర్ లీగ్‌ (Indian Premier League) ప్రారంభమైనప్పటి నుంచి సాధారణంగా మార్చి చివరి వారం లేదా ఏప్రిల్‌లో మొదలై మే నెలాఖరు వరకు కొనసాగుతోంది. అయితే ఈ సమయంలో దేశంలోని పలు ప్రాంతాల్లో ఉష్ణోగ్రతలు తీవ్రంగా ఉంటున్నాయి. ముఖ్యంగా మధ్యాహ్నం మ్యాచ్‌లు, స్టేడియాల్లో ప్రేక్షకుల పరిస్థితులు, ఆటగాళ్ల శారీరక శ్రమపై వేసవి ప్రభావం చూపుతోంది. ఈ నేపథ్యంలో ఐపీఎల్‌ షెడ్యూల్‌ను మార్చాలనే చర్చ తెరపైకి వచ్చింది.
లలిత్ మోడీ ప్రతిపాదనకు జూహీ మద్దతు..
ఐపీఎల్‌ మాజీ ఛైర్మన్‌ లలిత్ మోడీ (Lalit Modi) ఇటీవల టోర్నీని జనవరిలో ప్రారంభించే అవకాశాన్ని పరిశీలించాలని సూచించారు. మరో ప్రత్యామ్నాయంగా అక్టోబర్‌ నుంచి ఏప్రిల్‌ వరకు అనువైన సమయంలో పోటీలు నిర్వహించే విధానాన్ని కూడా ప్రస్తావించారు. ఐపీఎల్‌ ఇప్పుడు ప్రపంచ క్రికెట్‌లో కీలకమైన టోర్నీగా ఎదిగిందని, దాని షెడ్యూల్‌ను పరిస్థితులకు అనుగుణంగా రూపొందించుకోవాలని ఆయన అభిప్రాయపడ్డారు.
ఈ ప్రతిపాదనపై కోల్‌కతా నైట్‌రైడర్స్‌ (Kolkata Knight Riders) సహ యజమాని జూహీ చావ్లా మెహతా (Juhi Chawla Mehta) స్పందించారు. ఐపీఎల్‌ తనకంటూ ప్రత్యేక గుర్తింపు సంపాదించిందని, ఇక క్రికెట్ క్యాలెండర్‌లో తన స్థానాన్ని తానే ప్రభావితం చేయగల స్థాయికి చేరుకుందని ఆమె పేర్కొన్నారు. ఏప్రిల్‌–మే నెలల్లో తీవ్రమైన ఎండల్లోనే ప్రపంచంలోనే అతిపెద్ద క్రికెట్ టోర్నీని ఎందుకు నిర్వహించాలని ప్రశ్నించారు.
జనవరిలో నిర్వహిస్తే ఆటగాళ్లకు మెరుగైన వాతావరణం లభిస్తుందని, అభిమానులు కూడా మ్యాచ్‌లను మరింత సౌకర్యంగా ఆస్వాదించగలరని జూహీ అభిప్రాయపడ్డారు. టోర్నీ అభివృద్ధి చెందుతున్నప్పుడు దాని నిర్వహణ క్యాలెండర్‌ కూడా మారాల్సిన అవసరం ఉందని ఆమె తన సోషల్ మీడియా పోస్టులో పేర్కొన్నారు.
బీసీసీఐ ఏం ఆలోచిస్తోంది?
మరోవైపు బీసీసీఐ కూడా ఐపీఎల్‌ ప్రారంభ తేదీని ముందుకు జరిపే అంశంపై చర్చిస్తున్నట్లు కార్యదర్శి దేవజిత్ సైకియా వెల్లడించారు. మే 15 తర్వాత వర్షాలు, ప్రీ-మాన్సూన్ పరిస్థితులతో పాటు తీవ్రమైన వేడి ఇబ్బందులు కలిగించే అవకాశం ఉందని తెలిపారు. 2027 సీజన్‌ను మార్చి 10 ప్రాంతంలో ప్రారంభించి మే 15లోపు ముగించే అవకాశాలను పరిశీలిస్తున్నట్లు చెప్పారు. అయితే జనవరిలో టోర్నీ నిర్వహణపై బీసీసీఐ తుది నిర్ణయం తీసుకున్నట్లు సమాచారం లేదు.
జనవరి ప్రతిపాదన అమలైతే అంతర్జాతీయ మ్యాచ్‌లు, దేశవాళీ క్రికెట్ షెడ్యూల్‌, విదేశీ ఆటగాళ్ల అందుబాటు వంటి అంశాలను కూడా సమన్వయం చేయాల్సి ఉంటుంది. దీంతో ఐపీఎల్‌ క్యాలెండర్‌లో మార్పులు వస్తాయా? లేక మార్చి–మే మధ్యే టోర్నీ కొనసాగుతుందా? అనేది ఆసక్తికరంగా మారింది.
మరిన్ని క్రీడా వార్తల కోసం ఇక్కడ క్లిక్ చేయండి..