Video: వైభవ్ సూర్యవంశీ చెమటలు పట్టించిన బుమ్రా.. నెట్ సెషన్లో చుక్కలే..!
India vs Afghanistan T20 Series: గాయం కారణంగా కొంతకాలం ఆటకు దూరమైన భారత స్టార్ పేసర్ జస్ప్రీత్ బుమ్రా (Jasprit Bumrah) తిరిగి రిథమ్ అందుకున్నాడు. అఫ్గానిస్థాన్ సిరీస్కు ముందు ఢిల్లీలో జరిగిన నెట్ సెషన్లో బుమ్రా వేగం, కచ్చితత్వం స్పష్టంగా కనిపించాయి. 15 ఏళ్ల వైభవ్ సూర్యవంశీ (Vaibhav Suryavanshi) బుమ్రా బంతులను ఎదుర్కొంటూ తీవ్రంగా ఇబ్బంది పడిన వీడియో ప్రస్తుతం సోషల్ మీడియాలో తెగ సందడి చేస్తోంది.
India vs Afghanistan T20 Series: అఫ్గానిస్థాన్తో జరగనున్న మూడు టీ20ల సిరీస్ కోసం భారత క్రికెట్ జట్టు (Team India) సిద్ధమవుతోంది. సెప్టెంబర్ 13న ఢిల్లీలోని అరుణ్ జైట్లీ స్టేడియంలో తొలి మ్యాచ్ జరగనుంది. ఈ సిరీస్ను దృష్టిలో ఉంచుకుని భారత ఆటగాళ్లు సెప్టెంబర్ 11న నెట్ ప్రాక్టీస్లో పాల్గొన్నారు. గాయం కారణంగా గత కొన్ని సిరీస్లకు దూరమైన జస్ప్రీత్ బుమ్రా (Jasprit Bumrah) పూర్తి ఫిట్నెస్తో రీఎంట్రీ ఇచ్చేందుకు సిద్ధమయ్యాడు. ప్రాక్టీస్లో అతడి బౌలింగ్లో వేగం, లైన్, లెంగ్త్పై మంచి నియంత్రణ కనిపించింది. ఈక్రమంలో బుమ్రా సంధించిన బంతులతో యువ బ్యాటర్ వైభవ్ సూర్యవంశీ తీవ్రంగా ఇబ్బంది పడ్డాడు. వీరిద్దరి మధ్య పోరు ప్రత్యేక ఆకర్షణగా నిలిచింది. మొదటి బంతిని ఆడేందుకు ప్రయత్నించిన వైభవ్కు నిరాశే ఎదురైంది. రెండో డెలివరీ కూడా దాదాపు అదే గుడ్ లెంగ్త్లో పడగా, అతడు మరోసారి బీట్ అయ్యాడు. మూడో బంతిని బుమ్రా యార్కర్గా సంధించడంతో వైభవ్ బ్యాట్ను కిందకు దించి ఎలాగోలా అడ్డుకున్నాడు. నాలుగో బంతి కొద్దిగా షార్ట్ ఆఫ్ లెంగ్త్లోకి రావడంతో బ్యాట్ ఎడ్జ్ తీసుకుని దూరంగా వెళ్లింది. బుమ్రా వేసిన మరో బంతి ముందుగా పడి రావడంతో వైభవ్ కవర్స్పై నుంచి చక్కగా కొట్టి బౌండరీ సాధించాడు. మొత్తం సెషన్లో యువ ఆటగాడికి బుమ్రా బౌలింగ్ కఠిన పరీక్షగా మారింది.
బుమ్రా తిరిగి జట్టులోకి రావడం ఈ సిరీస్కు ప్రధాన అంశంగా మారింది. భారత జట్టు మూడు టీ20 మ్యాచ్లను ఢిల్లీలోనే ఆడనుంది. ఆసియా క్రీడలు 2026 సన్నాహకాల్లో భాగంగా ఈ సిరీస్కు ప్రాధాన్యం ఉంది. అందుకే ఆటగాళ్ల ప్రదర్శనతో పాటు బుమ్రా ఫిట్నెస్పైనా ప్రత్యేక దృష్టి పెట్టనుంది.
మూడు ఫార్మాట్లలోనూ అత్యుత్తమ పేసర్లలో ఒకడిగా గుర్తింపు పొందిన బుమ్రాను ఎదుర్కోవడం బ్యాటర్లకు సాధారణంగా సవాలే. అతడి ప్రత్యేక బౌలింగ్ యాక్షన్, యార్కర్లపై నియంత్రణ, వేగంలో మార్పులు ప్రత్యర్థి బ్యాటర్లను ఇబ్బంది పెడతాయి. నెట్ సెషన్లో వైభవ్ ఎదుర్కొన్న పరిస్థితి దీనికి మరో ఉదాహరణగా నిలిచింది.
Jasprit Bumrah vs Vaibhav Sooryavanshi. What happened next? pic.twitter.com/Ep6igaQUnf
— Tanuj Lakhina (@tanujlakhina) September 11, 2026
అఫ్గానిస్థాన్ సిరీస్ తరువాత భారత జట్టుకు కీలక సిరీస్లు ఉన్నాయి. ఆ దశలో బుమ్రా పాత్ర ఎంతో ముఖ్యమవుతుంది. అందువల్ల ఢిల్లీలో అతడు ఎలా బౌలింగ్ చేస్తాడు, మ్యాచ్ ఫిట్నెస్ను ఎలా నిలబెట్టుకుంటాడు అన్నది ఆసక్తికరంగా మారింది. ప్రాక్టీస్లో కనిపించిన లయ భారత జట్టుకు కొండంత భరోసాను అందించింది.
ఎక్కువమంది చదివినది: ఆసియా విజేతగా నిలిచినా.. ట్రోఫీతోపాటు ఒక్కపైసా దక్కదు.. ఎందుకో తెలుసా?
మరిన్ని క్రీడా వార్తల కోసం ఇక్కడ క్లిక్ చేయండి..