IND vs AFG Result: ఆఫ్ఘాన్పై హ్యాట్రిక్ విక్టరీ.. వన్డే సిరీస్ కైవసం చేసుకున్న టీమిండియా..
చెన్నై వేదికగా జరిగిన మూడో వన్డేలో భారత యువ ఓపెనర్ యశస్వి జైస్వాల్ అద్భుత శతకంతో చెలరేగాడు. కెప్టెన్ రోహిత్ శర్మతో కలిసి ప్రత్యర్థి బౌలర్లను ఊచకోత కోస్తూ భారత్కు 9 వికెట్ల తేడాతో భారీ విజయాన్ని అందించాడు. ఈ విజయంతో టీమిండియా సొంతగడ్డపై మరో చిరస్మరణీయమైన సిరీస్ విజయాన్ని తన ఖాతాలో వేసుకుంది.
IND vs AFG Result: ఆఫ్ఘనిస్తాన్ నిర్దేశించిన లక్ష్యాన్ని ఛేదించేందుకు బరిలోకి దిగిన భారత జట్టుకు ఓపెనర్లు అదిరిపోయే ఆరంభాన్ని ఇచ్చారు. ముఖ్యంగా యువ సంచలనం యశస్వి జైస్వాల్ మైదానం నలుమూలలా బౌండరీల వర్షం కురిపించాడు. కేవలం 86 బంతులు ఎదుర్కొన్న జైస్వాల్ 14 ఫోర్లు, 3 భారీ సిక్సర్ల సాయంతో 110 పరుగులు చేసి నాటౌట్గా నిలిచాడు. వన్డే క్రికెట్లో తన మార్కు క్లాస్, మాస్ షాట్లతో ఆఫ్ఘన్ బౌలింగ్ విభాగాన్ని పూర్తిగా నిర్వీర్యం చేస్తూ అజేయ శతకంతో జట్టును విజయతీరాలకు చేర్చాడు.
అండగా నిలిచిన కెప్టెన్ రోహిత్ శర్మ
మరోవైపు కెప్టెన్ రోహిత్ శర్మ కూడా తనదైన శైలిలో విరుచుకుపడ్డాడు. జైస్వాల్కు అండగా నిలుస్తూనే స్కోరు బోర్డును పరుగులు పెట్టించాడు. రోహిత్ శర్మ 69 బంతుల్లో 9 ఫోర్లు, 3 సిక్సర్లతో 79 పరుగుల అద్భుత ఇన్నింగ్స్ ఆడాడు. వీరిద్దరి మధ్య నమోదైన భారీ భాగస్వామ్యంతో భారత్ విజయం ఎప్పుడో ఖాయమైపోయింది. అయితే సెంచరీ వైపు దూసుకెళ్తున్న రోహిత్.. మహమ్మద్ నబి బౌలింగ్లో ప్రత్యామ్నాయ ఫీల్డర్ సెదిఖుల్లా అటల్ చేతికి చిక్కి అవుటయ్యాడు. దాంతో భారత్ తొలి వికెట్ను కోల్పోయింది.
కేవలం 28.4 ఓవర్లలోనే మ్యాచ్ క్లోజ్..
రోహిత్ అవుటైన తర్వాత క్రీజులోకి వచ్చిన శ్రేయస్ అయ్యర్ ఏమాత్రం ఒత్తిడికి లోనవకుండా వేగంగా ఆడాడు. అయ్యర్ 19 బంతుల్లో 2 సిక్సర్ల సాయంతో 20 పరుగులు చేసి నాటౌట్గా నిలిచాడు. భారత్ కేవలం 28.4 ఓవర్లలోనే 1 వికెట్ నష్టానికి 224 పరుగులు చేసి ఘన విజయం సాధించింది. ఆఫ్ఘన్ బౌలర్లలో మహమ్మద్ నబికి మాత్రమే ఒక వికెట్ దక్కింది. మిగతా బౌలర్లు ఎవరూ కూడా భారత బ్యాటర్లను అడ్డుకోలేకపోయారు.
చెన్నైలోని చిదంబరం స్టేడియంలో భారత బ్యాటర్లు ఆడిన ఇన్నింగ్స్ అభిమానులకు కంటినిండా విందును ఇచ్చింది. యశస్వి జైస్వాల్ బాధ్యతాయుతమైన శతకం, రోహిత్ శర్మ అనుభవజ్ఞుడైన ఆటతీరు జట్టుకు తిరుగులేని విజయాన్ని తెచ్చిపెట్టాయి. రాబోయే పర్యటనలకు ముందు యువ ఆటగాళ్లు ఇలాంటి ఫామ్ను ప్రదర్శించడం భారత క్రికెట్కు ఎంతో సానుకూలాంశం.