IND vs PAK, Asia Cup Final: ఫైనల్లో పాకిస్థాన్ పరుగుల సునామీ.. భారత్ ముందు 338 పరుగుల భారీ టార్గెట్..!

Pakistan U19 vs India U19 Asia Cup Final: అండర్-19 ఆసియా కప్ 2026 ఫైనల్‌లో భారత యువ జట్టుకు పాకిస్థాన్ గట్టి సవాల్ విసిరింది. అల్ అమరత్ వేదికగా జరుగుతున్న తుది పోరులో తొలుత బ్యాటింగ్ చేసిన పాకిస్థాన్ నిర్ణీత 50 ఓవర్లలో 9 వికెట్ల నష్టానికి 337 పరుగులు చేసింది. దీంతో భారత్ ముందు 338 పరుగుల భారీ లక్ష్యాన్ని ఉంచింది. పాకిస్థాన్ బ్యాటర్లలో ఉస్మాన్ ఖాన్ (Usman Khan) అద్భుత సెంచరీతో ఆకట్టుకోగా.. అబ్దుల్ ఖాదిర్ (Abdul Qadir), ఫర్హాన్ యూసఫ్ (Farhan Yousaf) హాఫ్ సెంచరీలతో రాణించారు.

ఉస్మాన్ ఖాన్ అద్భుత సెంచరీ..

పాకిస్థాన్ ఇన్నింగ్స్‌లో ఉస్మాన్ ఖాన్ కీలక పాత్ర పోషించాడు. భారత బౌలర్లను సమర్థంగా ఎదుర్కొంటూ 111 బంతుల్లో 107 పరుగులు చేశాడు. అతడి ఇన్నింగ్స్‌లో 11 ఫోర్లు, 3 సిక్సర్లు ఉన్నాయి. మరో బ్యాటర్ అబ్దుల్ ఖాదిర్ కూడా దూకుడుగా ఆడాడు. కేవలం 54 బంతుల్లో 80 పరుగులు బాదాడు. అతడి ఇన్నింగ్స్‌లో 3 ఫోర్లు, 8 సిక్సర్లు ఉన్నాయి.

ఫర్హాన్ యూసఫ్ హాఫ్ సెంచరీ..

పాకిస్థాన్ కెప్టెన్ ఫర్హాన్ యూసఫ్ కూడా బాధ్యతాయుతంగా బ్యాటింగ్ చేశాడు. 60 బంతుల్లో 63 పరుగులు సాధించాడు. అతడి ఇన్నింగ్స్‌లో 4 ఫోర్లు, 3 సిక్సర్లు ఉన్నాయి. హయం ఖాన్ 21 పరుగులు, అహ్మద్ హుస్సేన్ 17 పరుగులు చేశారు. మిగిలిన బ్యాటర్లు పెద్దగా రాణించలేకపోయారు. చివర్లో రిజ్వానుల్లా 4 పరుగులతో, అలీ రజా పరుగులేమీ చేయకుండా నాటౌట్‌గా నిలిచారు.

భారత బౌలర్లలో రాణించిన కావ్య పటేల్..

భారత బౌలర్లలో కావ్య పటేల్ (Kavya Patel) అద్భుత ప్రదర్శన చేశాడు. 10 ఓవర్లలో 68 పరుగులు ఇచ్చి నాలుగు వికెట్లు పడగొట్టాడు. చిగురుపాటి వెంకట (Chigurupati Venkata) ఐదు ఓవర్లలో 40 పరుగులు ఇచ్చి మూడు వికెట్లు సాధించాడు. అర్జున్ రాజ్‌పుట్ ఒక వికెట్ తీశాడు. మిగిలిన బౌలర్లు పరుగులను నియంత్రించడంలో ఇబ్బంది పడ్డారు.

భారత్ ముందు 338 పరుగుల లక్ష్యం..

పాకిస్థాన్ 337 పరుగులు చేయడంతో భారత్‌కు ఫైనల్‌లో విజయం సాధించాలంటే 338 పరుగులు చేయాల్సి ఉంది. ఉస్మాన్ ఖాన్ సెంచరీ, అబ్దుల్ ఖాదిర్ మెరుపు ఇన్నింగ్స్ పాకిస్థాన్‌కు భారీ స్కోరు అందించాయి. ఇప్పుడు భారత బ్యాటర్లు ఎలా స్పందిస్తారన్నది ఆసక్తికరంగా మారింది. ఈ లక్ష్యాన్ని ఛేదించి ఆసియా కప్ టైటిల్‌ను సొంతం చేసుకుంటారా? అన్నది చూడాలి.