అమెరికాలో సీరియల్ కిల్లర్ మృతి, 19 రాష్ట్రాల్లో ఎంతమందిని హతమార్చాడంటే, నాలుగు దశాబ్దాల క్రిమినల్ హిస్టరీ
అమెరికాలో అత్యంత దారుణాలకు పాల్పడుతూ సుమారు 93 మంది అమాయకుల హత్యకు కారకుడైన సీరియల్ కిల్లర్ శామ్యూల్ లిటిల్ మరణించాడు.
అమెరికాలో అత్యంత దారుణాలకు పాల్పడుతూ సుమారు 93 మంది అమాయకుల హత్యకు కారకుడైన సీరియల్ కిల్లర్ శామ్యూల్ లిటిల్ మరణించాడు. 80 ఏళ్ళ ఇతడు బుధవారం ఆసుపత్రిలో మృతి చెంది ఉండగా కనుగొన్నారు. అమెరికాలోని 19 రాష్ట్రాల్లో ఈ కిల్లర్ నాలుగు దశాబ్దాల పాటు సాగించిన హత్యాకాండకు అంతే లేదు. ఇతని బారిన పడిన బాధితుల కుటుంబాల ఆచూకీ కోసం ఫెడరల్ పోలీసులు నేటికీ గాలిస్తూనే ఉన్నారు. ఎక్కువగా వేశ్యలను, డ్రగ్ యూజర్లను, పేదలను, నల్లజాతి మహిళలను లిటిల్ హత్య చేస్తూ వచ్చాడు. ఇతడిని ప్రాసిక్యూట్ చేయడానికి పోలీసులు నానా తంటాలు పడ్డారు. 2018 లో అతికష్టం మీద శామ్యూల్ లిటిల్ ని పోలీసులు పట్టుకుని కాలిఫోర్నియా జైలుకు తరలించారు. తాను చేసిన నేరాల గురించి ఇతగాడు ఆ ఏడాది టెక్సాస్ లోని ఓ రేంజర్ కు వివరించాడట.
2014 లో మూడు హత్యలు చేసినా తాను ఏ నేరమూ చేయలేదని బుకాయించాడు. అంతకు ముందు లైంగిక నేరాలు, హత్యా యత్నాలు, హత్యల అభియోగాలను ఎదుర్కొన్నాడు. పోలీసులు 8 కేసులు పెట్టారు. అయితే ఎప్పటికప్పుడు వారి నుంచి తప్పించుకుంటూ వచ్చాడు. ఇతని క్రిమినల్ హిస్టరీ తెలిసి పోలీసులు షాక్ తింటున్నారు. తమనే బురిడీ కొట్టించిన ఈ కరడు గట్టిన నేరగాని కథ ఇలా సమాప్తమైంది.
