Droupadi Murmu: సంప్రదాయ సంతాలీ చీరలో ద్రౌపది ముర్ము ప్రమాణస్వీకారం.. ఇంతకీ ఈ శారీ స్పెషల్ ఏంటంటే?
Droupadi Murmu: భారతదేశ 15వ రాష్ట్రపతిగా ద్రౌపది ముర్ము ఈరోజు ఉదయం ప్రమాణ స్వీకారం చేశారు. సుప్రీంకోర్టు ప్రధాన న్యాయమూర్తి జస్టిస్‌ ఎన్వీరమణ ఆమె చేత ప్రమాణస్వీకారం చేయించారు.
భారతదేశ 15వ రాష్ట్రపతిగా ద్రౌపది ముర్ము ఈరోజు ఉదయం ప్రమాణ స్వీకారం చేశారు. సుప్రీంకోర్టు ప్రధాన న్యాయమూర్తి జస్టిస్‌ ఎన్వీరమణ ఆమె చేత ప్రమాణస్వీకారం చేయించారు. ఈ సందర్భంగా ద్రౌపది ముర్ము సంప్రదాయ సంతాలీ చీర ధరించి ఈ కార్యక్రమానికి హాజరయ్యారు.
ఆకుపచ్చ ఎరుపు రంగు కాంబినేషన్ల ఉన్న అంచులతో తెల్లటి రంగులో ఉన్న ఈ చీర చూడ్డానికి ఎంతో సింపుల్‌గా అందంగా ఉంది. ఈ చీరను మొత్తం చేతితోనే తయారుచేస్తారు. ఇందులో ఎలాంటి యంత్రాలను ఉపయోగించరు.
నేత కార్మికులు చక్కటి రంగు దారాలతో ఈ చీరను తయారు చేస్తారు. ఈ చీర పూర్తి సాంప్రదాయ శైలిలో ఉన్నా ట్రెండింగ్ లుక్‌ను ఇస్తుంది. ఒకప్పుడు గిరిజన మహిళలు ప్రత్యేక సందర్భాలలో మాత్రమే ఈ చీరలు ధరించేవారట.
గతంలో స్త్రీల స్వాతంత్ర్యానికి, సాధికారతకు చిహ్నంగా ఈ చీరలపై ప్రత్యేకంగా మూడు విల్లులను డిజైన్లు చేసేవారట. అయితే కాలక్రమేణా ఆ డిజైన్ల స్థానంలో మార్పులు వచ్చాయి. నేటి నాగరికత, సాంప్రదాయలకు తగ్గట్టుగా ఈ చీరలను తీర్చిదిద్దుతున్నారు.
కాగా తూర్పు భారతదేశంలోని సంతాల కమ్యూనిటీకి చెందిన ప్రజలు ఎక్కువగా ఉన్నారు. జార్ఖండ్‌తో పాటు, ఒడిశా, పశ్చిమ బెంగాల్‌, అస్సాం తదితర రాష్ట్రాల్లో ఈ చీరకు ఎంతో ప్రాముఖ్యం ఉంది. ఎలాంటి యంత్రాల సహాయం లేకుండా కేవలం చేతితో తయారు చేయడం వల్ల ఈ చీర ఖరీదు కూడా కాస్త ఎక్కువే.