Bowling Captains: భారత జట్టుకు సారథ్యం వహించిన బౌలర్లు వీరే.. లిస్టులో శాస్త్రి సహా ఓ అంపైర్ కూడా..
Bowling Captains: ఇటీవల ముగిసిన ప్రపంచ టెస్ట్ చాంపియన్‌షిప్ ఫైనల్‌లో భారత్ ఓడిన సంగతి తెలిసిందే. అయితే ప్రత్యర్థి ఆస్ట్రేలియా జట్టును నడిపించిన ప్యాట్ కమ్మిన్స్ ఓ బౌలర్ అని గమనించారా..? అలా ఓ బౌలర్ తాను ప్రాతినిథ్యం వహించిన సంఘటనలు చాలా అరుదుగానే ఉన్నాయి. అయితే టీమిండియా చరిత్రలో భారత్‌ను నడిపించిన బౌలర్లు ఆరుగురు ఉన్నారు. మరి వారెవరో ఇప్పుడు చూద్దాం..
గులామ్ అహ్మద్: టీమిండియాను నడిపించిన తొలి బౌలింగ్ కెప్టెన్ గులామ్ అహ్మద్. హైదరాబాద్‌కి చెందిన ఈ మాజీ క్రికెటర్ తన కెరీర్‌లో 22 మ్యాచ్‌లు ఆడి మొత్తం 68 వికెట్లు పడగొట్టాడు. ఇక భారత జట్టుకు కెప్టెన్గా మూడు టెస్ట్ మ్యాచ్‌ల్లో బాధ్యతలు నిర్వహించగా.. అందులో 2 ఓడి, మరోదాన్ని డ్రా చేసుకున్నాడు.
శ్రీనివాస్ వెంకటరాఘవన్: భారత్ జట్టును నడిపించిన బౌలింగ్ కెప్టెన్‌లలో తమిళనాడుకు చెందిన మాజీ క్రికెటర్ శ్రీనివాస్ వెంకటరాఘవన్ కూడా ఉన్నాడు. ఇక సచిన్ టెండూల్కర్, లాలా అమర్నాథ్ తర్వాత భారత్ కోసం ఎక్కువ కాలం ఆడిన మూడో క్రికెటర్‌గా శ్రీనివాస్ రికార్డుల్లో ఉన్నాడు. అయితే ఈ బౌలింగ్ కెప్టెన్ మొత్తం 12 మ్యాచ్‌ల్లో భారత్‌ను నడిపించాడు. ఆయన కెప్టెన్గా ఆడిన 3 టెస్ట్ మ్యాచ్‌ల్లో టీమిండియా ఓడగా.. 2 డ్రా అయ్యాయి. ఇంకా వన్డే క్రికెట్‌లో 1 గెలవగా 6 మ్యాచ్‌ల్లో భారత్ ఓడింది. క్రికెట్ కెరీర్ ముగించిన తర్వాత ఈ మాజీ కెప్టెన్.. అంపైర్‌గా కూడా ఎన్నో మ్యాచ్‌లకు పనిచేశారు.
బిషణ్ సింగ్ బేడీ: భారత మాజీ లెఫ్టార్మ్ స్పిన్నర్ బిషణ్ సింగ్ కూడా టీమిండియాను నడిపించిన బౌలర్ల లిస్టులో ఉన్నారు. మొత్తం 26 మ్యాచ్‌ల్లో టీమిండియాకు కెప్టెన్సీ బాధ్యతలు నిర్వర్తించారు ఆయన. ఇక వాటిల్లో 22 టెస్ట మ్యాచ్‌లు, 3 వన్డేలు ఉన్నాయి. కాగా, బిషణ్ కెప్టెన్సీలో భారత్ 7 మ్యాచ్‌లు గెలవగా, మరో 14 ఓడింది. అలాగే 5 మ్యాచ్‌లు డ్రా అయ్యాయి.
కపిల్ దేవ్: భారత్‌ను తొలి సారి ప్రపంచ విజేతగా నిలిపిన కపిల్ దేవ్ గురించి అందరికీ తెలిసింది. ఈ మాజీ క్రికెటర్ ఓ ఆల్‌రౌండర్ అయినప్పటికీ ప్రాథమికంగా ఫాస్ట్ బౌలర్. ఇక కపిల్ నాయకత్వంలో భారత్ మొత్తం 106 మ్యాచ్‌లు(టెస్ట్, వన్డే) ఆడింది. వాటిల్లో భారత్ 43 గెలవగా, 40 మ్యాచ్‌ల్లో ఓడింది. మరో 23 మ్యాచ్‌లు డ్రాగా ముగిసాయి.
రవి శాస్త్రి: టీమిండియా మాజీ హెడ్ కోచ్ రవిశాస్త్రి కూడా భారత్‌కు సారథిగా ఉన్నారు. శాస్త్రి నాయకత్వంలో భారత్ ఓ టెస్ట్ ఆడగా.. అందులో మనదే విజయం. అలాగే 11 వన్డే మ్యాచ్‌లకు రవిశాస్త్రి కెప్టెన్గా ఉండగా.. అందులో 4 విజయాలు, 7 ఓటములు ఉన్నాయి.
అనీల్ కుంబ్లే: టీమిండియా దిగ్గజ స్పిన్నర్ అనిల్ కుంబ్లే గురించి దాదాపుగా అందరికీ తెలిసిందే. తలకు గాయమైనా కట్టు కట్టుకుని మరీ టీమ్ కోసం మైదానంలో బౌలింగ్ చేసిన ఈ మాజీ సారథ్యంలో టీమిండియా 11 టెస్ట్‌లు ఆడింది. వాటిల్లో 3 గెలవగా, 5 ఓటములు, 6 డ్రా ఉన్నాయి. ఇంకా కుంబ్లే సారథ్యంలో టీమిండియా ఆడిన ఏకైక వన్డేలో జట్టు విజయం సాధించింది.
జస్ప్రీత్ బూమ్రా: గతేడాది ఇంగ్లాండ్‌తో జరిగిన రిషెడ్యూల్డ్ మ్యాచ్‌లో టీమిండియాను యువ బౌలర్ జస్ప్రీత్ బూమ్రా నడిపించిన సంగతి తెలిసిందే. రోహిత్ ఆ ఈ మ్యాచ్‌కి దూరం కావడంతో బూమ్రా సారథిగా ఎంపికయ్యాడు. విశేషమేమిటంటే.. బూమ్రా సారథ్యం వహించిన ఈ మ్యాచ్ టీమ్‌లో కోహ్లీ, ఛతేశ్వర్ పుజారా, రవీంద్ర జడేజా వంటి సీనియర్లు కూడా ఉన్నారు.