IPL Records: లక్నోపై కోహ్లీ సిక్సర్ల పర్వం.. కట్ చేస్తే, టాప్ 5 లిస్టులో పొలార్డ్ స్థానం గల్లంతు.. ఆ జాబితాలో ధోనితో సహా..
ఆర్‌సీబీ, లక్నో జట్ల మధ్య సోమవారం రాత్రి జరిగిన ఐపీఎల్ మ్యాచ్‌లో కింగ్ కోహ్లీ మొత్తం 61 పరుగులు చేసి ఔట్ అయ్యాడు. అయితే క్రీజులో ఉన్నప్పుడు కోహ్లీ తన బ్యాట్ నుంచి 4 ఫోర్లు, 4 సిక్సర్లు బాదాడు. ఈ సిక్సర్లతో కోహ్లీ ఓ సరికొత్త రికార్డు సృష్టించాడు.
ఐపీఎల్ 2023: బెంగళూరు చిన్నస్వామి స్టేడియం వేదికగా జరిగిన మ్యాచ్‌లో ఆర్‌సీబీపై లక్నో సూపర్‌జెయింట్‌ ఒక వికెట్ తేడాతో విజయం సాధించింది. ఉత్కంఠబరితంగా సాగిన ఈ మ్యాచ్‌లో లక్నో చివరి బంతితో విజయతీరాలకు చేరింది. అయితే ఈ మ్యాచ్‌లో కోహ్లీ 4 ఫోర్లు, 4 సిక్సర్లతో మొత్తం 61 పరుగులు చేశాడు.
ఇలా సంచలన ప్రదర్శన చేసిన కోహ్లీ ఓ సరికొత్త రికార్డు సృష్టించాడు. ఈ మ్యాచ్‌లో 4 సిక్సర్లు కొట్టిన కోహ్లీ ఐపీఎల్‌లో మొత్తం 227 సిక్సర్లు బాదినట్లయింది. దీంతో అత్యధిక సిక్సర్లు కొట్టిన టాప్ 5 ఐపీఎల్ ప్లేయర్ల జాబితాలోకి 5వ స్థానాన్ని సొంతం చేసుకున్నాడు. లక్నో తరఫున అవేశ్ ఖాన్ వేసిన 2వ ఓవర్ 3వ బంతికి కోహ్లి భారీ సిక్సర్ బాది.. ఈ ఘనత సాధించాడు.
అయితే ఈ రికార్డు అంతకముందు ముంబై ఇండియన్స్ ప్లేయర్ కీరాన్ పోలార్డ్ పేరిట ఉండేది. అవును, ముంబై ఇండియన్స్ తరఫున మాత్రమే ఐపీఎల్ ఆడిన కీరన్ పొలార్డ్ 171 ఇన్నింగ్స్‌ల్లో మొత్తం 223 సిక్సర్లు బాదాడు. అయితే ఇప్పుడు ఈ రికార్డును విరాట్ కోహ్లీ తన 227 సిక్సర్లతో బద్దలు కొట్టాడు.
తాజాగా కోహ్లీ సిక్సర్ల రికార్డు నెలకొన్న తర్వాత.. ఐపీఎల్‌లో అత్యధిక సిక్సర్లు కొట్టిన టాప్ 5 బ్యాట్స్‌మెన్ లిస్ట్ ఎలా ఉందో ఇప్పుడు చూద్దాం..
1. క్రిస్ గేల్: ఐపీఎల్‌లో 141 ఇన్నింగ్స్‌లు ఆడిన యూనివర్స్ బాస్ క్రిస్ గేల్ మొత్తం 357 సిక్సర్లు బాదాడు. దీంతో అతను ఐపీఎల్ చరిత్రలో అత్యధిక సిక్సర్లు బాదిన ఆటగాడిగా ఈ జాబితా అగ్రస్థానంలో ఉన్నాడు.
2. ఏబీ డివిలియర్స్: ఆర్‌సీబీ జట్టు మాజీ ఆటగాడు ‘మిస్టర్ 360’ 170 ఇన్నింగ్స్‌లలో మొత్తం 251 సిక్సర్లు కొట్టాడు. అలా అత్యధిక సిక్సర్లు బాదిన రెండో ఐపీఎల్ క్రికెటర్‌గా నిలిచాడు.
3. రోహిత్ శర్మ: ఈ లిస్టులో హిట్ మ్యాన్ రోహిత్ శర్మ కూడా ఉన్నాడు. 224 ఐపీఎల్ ఇన్నింగ్స్‌ ఆడిన ముంబై ఇండియన్స్ కెప్టెన్ రోహిత్ మొత్తం 241 సిక్సర్లు కొట్టాడు. దీంతో అతను ఈ లిస్టులో మూడో స్థానంలో ఉన్నాడు.
4. ఎంఎస్ ధోని: చెన్నై సూపర్ కింగ్స్ కెప్టెన్ ధోని 208 ఇన్నింగ్స్‌లలో 232 సిక్సర్లు కొట్టి టాప్ 5 లిస్టులో నాలుగో స్థానంలో ఉన్నాడు.
5. విరాట్ కోహ్లీ: తాజాగా లక్నో సూపర్‌జెయింట్స్‌తో జరిగిన మ్యాచ్‌లో.. కోహ్లీ కేవలం 44 బంతుల్లో 4 భారీ సిక్సర్లు, 4 ఫోర్లతో 61 పరుగులు చేశాడు. ఈ నాలుగు సిక్సర్లతో మొత్తం 227 సిక్సర్లు పూర్తి చేసి సిక్సర్ల జాబితాలో 5వ స్థానాన్ని ఆక్రమించాడు. ఇందుకోసం కింగ్ కోహ్లి 218 ఇన్నింగ్స్‌ తీసుకున్నాడు.