Cinema : ఊహించని సంఘటనతో గందరగోళం.. క్లైమాక్స్ చూస్తే అంతే ఇక.. ఓటీటీలో ట్రెండ్ అవుతున్న సినిమా..
ప్రస్తుతం ఓటీటీలో మలయాళీ చిత్రాలకు వస్తున్న క్రేజ్ గురించి చెప్పక్కర్లేదు. సస్పెన్స్, హారర్, థ్రిల్లర్ డ్రామాలు చూసేందుకు జనాలు తెగ ఆసక్తి చూపిస్తున్నారు. ఇప్పుడు ఓ మూవీ దూసుకుపోతుంది. ఎలాంటి అంచనాలు లేకుండా విడుదలైన ఈ సినిమా సంచనలం సృష్టిస్తుంది. ఇంతకీ ఆ సినిమా పేరెంటో తెలుసుకుందామా.
మలయాళ చిత్ర పరిశ్రమ నుండి వచ్చిన అత్యంత స్ఫూర్తిదాయకమైన చిత్రాలలో 'ఉయరే' (Uyare) ఒకటి. పార్వతి తిరువోతు ప్రధాన పాత్రలో నటించిన ఈ చిత్రం, ప్రస్తుతం ప్రముఖ ఓటీటీ ప్లాట్ ఫామ్ అమెజాన్ ప్రైమ్ వీడియోలో అందుబాటులో ఉండి ప్రేక్షకులను విశేషంగా ఆకట్టుకుంటోంది. ఈ సినిమా కథాంశం గురించి ఆసక్తికర విషయాలు మీకోసం.
కథ విషయానికి వస్తే.. పల్లవి రవీంద్రన్ (పార్వతి) అనే ఒక సామాన్య యువతి చుట్టూ ఈ కథ తిరుగుతుంది. చిన్నప్పటి నుండి పైలట్ కావాలన్నది ఆమె ఏకైక కల. ఎంతో కష్టపడి ఏవియేషన్ అకాడమీలో చేరుతుంది. అయితే, ఆమె ప్రియుడు గోవింద్ (ఆసిఫ్ అలీ) అత్యంత స్వార్థపరుడు. ఆమె తనను వదిలి వెళ్ళిపోతుందనే భయంతో, విచక్షణ కోల్పోయి పల్లవిపై యాసిడ్ దాడి చేస్తాడు.
ఈ ఘోర ప్రమాదంలో పల్లవి తన ముఖాన్ని, చూపును (ఒక కన్ను), పైలట్ కావాలనే తన కెరీర్ను కోల్పోతుంది. ఆ చీకటి నుండి ఆమె తిరిగి ఎలా కోలుకుంది, తన కలలను ఎలా నిజం చేసుకుంది అనేదే ఈ చిత్ర సారాంశం. యాసిడ్ దాడికి గురైన బాధితురాలిగా పార్వతి నటన అద్భుతమనే చెప్పాలి. శారీరక, మానసిక వేదనను ఆమె పండించిన తీరు ప్రేక్షకులను కంటతడి పెట్టిస్తుంది.
జీవితంలో సర్వస్వం కోల్పోయామని అనుకున్నప్పుడు, మళ్ళీ ఫీనిక్స్ పక్షిలా ఎలా ఎదగాలి అనేది పల్లవి పాత్ర మనకు నేర్పుతుంది. టొవినో థామస్ పోషించిన విశాల్ పాత్ర, ఒక వ్యక్తికి కష్టాల్లో తోడుగా నిలబడటం ఎంత ముఖ్యమో వివరిస్తుంది. ప్రేమ పేరుతో భాగస్వామిని నియంత్రించడం ఎంత ప్రమాదకరమో ఈ సినిమా కళ్లకు కట్టినట్లు చూపిస్తుంది.
ఆసిఫ్ అలీ పాత్ర ద్వారా అభద్రతా భావం కలిగిన ప్రేమికుడి మనస్తత్వాన్ని దర్శకుడు చక్కగా చూపించారు. మను అశోకన్ దర్శకత్వం వహించిన ఈ సినిమాకు పీ సుందర్ అందించిన సంగీతం హైలెట్ అయ్యింది. 'ఉయరే' అంటే మలయాళంలో 'ఎత్తు' అని అర్థం. ఈ సినిమా కేవలం ఒక బాధితురాలి కథ మాత్రమే కాదు, తనను తాను నిరూపించుకోవాలనుకునే ప్రతి మహిళా పోరాటం.