Budget 2026: తక్షణ ఊరట నుంచి భవిష్యత్‌ వృద్ధికి పాలసీ బ్రిడ్జ్

కేంద్ర ఆర్థిక మంత్రి నిర్మలా సీతారామన్‌ ప్రవేశపెట్టిన యూనియన్‌ బడ్జెట్‌–2026ను ప్రభుత్వం ఒక పాలసీ బ్రిడ్జ్‌గా అభివర్ణిస్తోంది. కోవిడ్‌ అనంతర ఆర్థిక పునరుద్ధరణను కొనసాగిస్తూ, భారత ఆర్థిక వ్యవస్థను భవిష్యత్‌ అవసరాలకు సిద్ధం చేయడమే ఈ బడ్జెట్‌ లక్ష్యం. అతిశయ నిర్ణయాలకు దూరంగా, స్థిరత్వం..వృద్ధి మధ్య సమతుల్యతను పాటించిన ఈ బడ్జెట్‌లో సుమారు 60–70 శాతం కొనసాగింపు విధానాలే కనిపిస్తాయి. అదే సమయంలో తయారీ, సాంకేతికత, గ్లోబల్‌ సరఫరా గొలుసుల్లో భారత్‌ పాత్రను బలపరిచే కొత్త పథకాలను ప్రవేశపెట్టింది. బడ్జెట్‌–2026లో ప్రధానంగా గత కొన్నేళ్లుగా అమలులో ఉన్న విధానాలనే మరింత బలోపేతం చేశారు. ఆర్థిక లోటును FY27 నాటికి జీడీపీలో 4.3 శాతంకు పరిమితం చేయాలన్న లక్ష్యాన్ని ప్రభుత్వం కొనసాగిస్తోంది. FY31 నాటికి అప్పు–జీడీపీ నిష్పత్తిని 50 శాతంకు తగ్గించడమే దీర్ఘకాల లక్ష్యం. పన్ను రేట్లలో ఎలాంటి మార్పులు చేయకుండా, నియమాలను సులభతరం చేసేలా ఇన్‌కమ్‌ ట్యాక్స్‌ యాక్ట్‌–2025ను ప్రవేశపెట్టనుంది.

మౌలిక సదుపాయాలపై దృష్టి:

దేశ వృద్ధికి ప్రధాన ఇంజిన్‌గా మౌలిక సదుపాయాల పెట్టుబడులను ప్రభుత్వం కొనసాగిస్తోంది. ఈ ఏడాది క్యాపిటల్‌ ఎక్స్‌పెండిచర్‌ను రూ.12.2 లక్షల కోట్లు (జీడీపీలో 3.1 శాతం)కి పెంచింది. డెడికేటెడ్‌ ఫ్రైట్‌ కారిడార్లు, 20 కొత్త జలమార్గాలు, 7 హైస్పీడ్‌ రైల్‌ కారిడార్ల అభివృద్ధికి ఇది తోడ్పడనుంది.

తయారీ–టెక్నాలజీ విస్తరణ:

సెమీకండక్టర్‌ రంగంలో భారత్‌ స్థానం బలపడేలా ఇండియా సెమీకండక్టర్‌ మిషన్‌ 2.0ను ప్రకటించారు. ఎలక్ట్రానిక్స్‌ కాంపొనెంట్స్‌ తయారీ పథకానికి కేటాయింపులు రూ.40 వేల కోట్లకు పెరిగాయి.

ఎంఎస్‌ఎంఈలు, గ్రామీణ ఆర్థిక వ్యవస్థ:

200 పాత పారిశ్రామిక క్లస్టర్ల పునరుద్ధరణ, టైర్‌–2, టైర్‌–3 పట్టణాల్లో అనుసరణ సహాయానికి ‘కార్పొరేట్‌ మిత్రాలు’ ప్రవేశపెట్టడం ద్వారా ఉద్యోగావకాశాలకు ఊతమిచ్చారు. వ్యవసాయంలో హై–వాల్యూ పంటలు, నేషనల్‌ ఫైబర్‌ స్కీమ్‌పై దృష్టి పెట్టారు.

వ్యూహాత్మక ఖనిజ భద్రత:

ఒడిశా, కేరళ, ఆంధ్రప్రదేశ్‌, తమిళనాడు రాష్ట్రాల్లో రేర్‌ ఎర్త్‌ కారిడార్లు ఏర్పాటు చేయనున్నారు. ఇది ఎలక్ట్రానిక్స్‌, ఈవీ, రక్షణ రంగాలకు కీలకంగా మారనుంది.

శాస్త్ర–ఆరోగ్య రంగంలో ముందడుగు:

రూ.10 వేల కోట్లతో ‘బయోఫార్మా శక్తి’ పథకంను ప్రకటించారు. బయోఫార్మా పరిశోధన, క్లినికల్‌ ట్రయల్స్‌లో భారత్‌ను గ్లోబల్‌ హబ్‌గా తీర్చిదిద్దడమే లక్ష్యం.

ఆర్థిక వ్యవస్థ సంస్కరణలు:

మౌలిక సదుపాయాల ప్రాజెక్టులకు మద్దతుగా ఇన్‌ఫ్రాస్ట్రక్చర్‌ రిస్క్‌ గ్యారంటీ ఫండ్‌ ఏర్పాటు చేశారు. ఎంఎస్‌ఎంఈల విస్తరణ కోసం ఎస్ఎంఈ గ్రోత్‌ ఫండ్‌, ట్రీడ్స్‌ ద్వారా ఇన్వాయిస్‌లకు సెకండరీ మార్కెట్‌ ప్రవేశపెట్టనున్నారు.

తక్షణ ఊరట చర్యలు:

భవిష్యత్‌ లక్ష్యాలతో పాటు, సామాన్యులకు వెంటనే ఊరట కలిగించే నిర్ణయాలు కూడా ఉన్నాయి. విదేశీ విద్య, వైద్యం, టూర్‌ ప్యాకేజీలపై TCSను 5% నుంచి 2%కు తగ్గింపు చేశారు.  17 కీలక ఔషధాలపై కస్టమ్స్‌ డ్యూటీ మినహాయింపు ఇచ్చారు. వ్యక్తిగత దిగుమతులపై టారిఫ్‌ 20% నుంచి 10%కు తగ్గించారు.  చిన్న తప్పిదాలపై క్రిమినల్‌ చర్యలకు ముగింపు పలికి.. ఐటీఆర్‌ గడువుల పొడిగింపు చేశారు.

మహిళా సంక్షేమం:

జెండర్‌ బడ్జెట్‌ను 11 శాతం పెంచి రూ.5 లక్షల కోట్లకు పైగా కేటాయించారు. మహిళా వ్యాపారాలను స్వయం ఉపాధి నుంచి యాజమాన్య స్థాయికి తీసుకెళ్లడమే లక్ష్యం.

త్వరిత పరిష్కారాలు కాదు.. దీర్ఘకాల దృష్టి

బడ్జెట్‌–2026లో ఆకర్షణీయమైన ‘షార్ట్‌కట్స్‌’ లేవు. బదులుగా, విధాన స్థిరత్వం, దీర్ఘకాల పెట్టుబడులు, స్కిల్ డెవలప్‌మెంట్‌పై ఫోకస్ పెట్టింది. నేటి వ్యాపారాలపై భారాన్ని తగ్గిస్తూ, రేపటి వృద్ధికి బలమైన పునాదులు వేయడమే ఈ బడ్జెట్‌ సారాంశం.

మరిన్ని బడ్జెట్ వార్తల కోసం ఇక్కడ క్లిక్ చేయండి..