వానలే వానలు : మరో అల్పపీడనం, ఏపీకి భారీ వర్ష సూచన

ఉభయ తెలుగు రాష్ట్రాలలో వానల జోరు తగ్గడం లేదు. వరుసగా అల్ప పీడనాలు ఏర్పడుతుండటంతో అధిక వర్షపాతం నమోదవుతోంది. ఇప్పటికి వాగులు, వంకలు పొంగి పొర్లుతోన్న విషయం తెలిసిందే. తాజాగా ఈశాన్య బంగాళాఖాతంలో మరో అల్పపీడనం ఏర్పడినట్లు అమరావతి వాతావరణ కేంద్రం తెలిపింది. రానున్న 24 గంటలో ఇది వాయువ్య బంగాళాఖాతం ప్రాంతంలో తీవ్ర అల్పపీడనంగా బలపడే అవకాశం ఉందని వివరించింది. దీని ప్రభావంతో ఉత్తర, దక్షిణ కోస్తాంధ్ర, రాయలసీమ ప్రాంతాల్లో ఈరోజు, రేపు, ఎల్లుండి ఉరుములు, మెరుపులతో కూడిన తేలికపాటి నుండి ఒక మోస్తరు వర్షాలు అనేకచోట్ల కురిసే అవకాశం ఉన్నట్లు  వివరించింది. తూర్పుగోదావరి, పశ్చిమగోదావరి జిల్లాలలో భారీ నుంచి అతి భారీ వర్షాలు అక్కడక్కడ కురిసే అవకాశం ఉందని అమరావతి వాతావరణ కేంద్రం వెల్లడించింది. రాష్ట్రంలోని కొన్ని ప్రాంతాల్లో భారీ వర్షాలు కురిసే అవకాశాలు ఉన్నాయని  వివరించింది.

Also Read : ఏపీలో రేపటి నుంచి విద్యాసంస్థలు పునఃప్రారంభం.. ఈ రూల్స్ తప్పనిసరి