ఢిల్లీలో తుగ్లక్ పాలన.. కేజ్రీవాల్‌‌పై గంభీర్ విమర్శలు

Gautam Gambhir Attacks Kejriwal : జోరుగా కురుస్తున్న వర్షాలు రాజకీయ రంగు పలుముకున్నాయి. దేశరాజధానిని భారీ వర్షాలు ముంచెత్తుతుండటంతో అక్కడి డ్రైనేజీ వ్యవస్థ పూర్తిగా అస్థవ్యస్తంగా మారిపోయింది. దీంతో ఎక్కడికక్కడ వర్షపు నీరు రోడ్డు మీదే.. నిలిచిపోయింది. ప్రధాన రహదారులు చెరువులను తలపిస్తున్నాయి. ఈ క్రమంలో మాజీ క్రికెటర్‌, బీజేపీ ఎంపీ గౌతమ్‌ గంభీర్‌ ఢిల్లీ ముఖ్యమంత్రి అరవింద్‌ కేజ్రీవాల్‌ మీద విమర్శల వర్షం కురిపించారు.

ఓ వీడియోను ట్వీట్‌ చేసిన గంభీర్‌.. ఢిల్లీ సీఎంని తుగ్లక్‌తో పోల్చారు. ఆ వీడియోలో 10-15 మంది ప్రయాణికులతో ఉన్న ఓ ఒంటెద్దు బండి వాననీటిలో రోడ్డులో ప్రయాణం చేస్తోంది. కొద్ది దూరం వెళ్లగానే బ్యాలెన్స్‌ తప్పి ప్రయాణికులు పడిపోయారు. కిందపడ్డవారిని వదిలేసి బండి వెళ్లి పోయింది. ఈ సంఘటనను ఉద్దేశించి గంభీర్‌.. ‘ఇది 14వ శతాబ్దంలో తుగ్లక్‌ పాలించిన ఢిల్లీ కాదు.. 21వ శతాబ్దపు తుగ్లక్‌ పాలన ఇది’ అంటూ తీవ్రస్థాయిలో విమర్శలు గుప్పించారు.

గురువారం ఉదయం నుంచి ఎడతెరపి లేకుండా కురుస్తున్న వర్షాలకు ఢిల్లీలోని అనేక ప్రాంతాలు జలమయమయ్యాయి. ఈ క్రమంలో ఢిల్లీలోని జకీరాలో ఓ బస్సు, ఆటో, కారు నీటిలో మునిగిపోయాయి. ఇదిలా ఉండగా ఢిల్లీ, ఉత్తర ప్రదేశ్‌, హరియాణా, మధ్యప్రదేశ్‌ రాష్ట్రాల్లో కొన్ని ప్రాంతాల్లో ఉరుములతో కూడిన వర్టాలు పడతాయని భారత వాతావరణ శాఖ (ఐఎండి) అంచనా వేసింది.