సినిమా ఇండస్ట్రీని వీడని విషాదాలు.. ఒకే రోజు కన్నుమూసిన సీనియర్‌ డైరెక్టర్‌, యంగ్‌ అసిస్టెంట్‌ డైరెక్టర్‌

Ramdoss, Ramakrishnan

సినిమా ఇండస్ట్రీలో వరుస విషాదాలు చోటు చేసుకుంటున్నాయి. పేరు మోసిన నటులు ఒక్కొక్కరూ ఈ లోకాన్ని విడిచి వెళ్లిపోతున్నారు. ఇటీవల టాలీవుడ్‌కు చెందిన యువనటుడు సుధీర్‌ వర్మ ఆత్మహత్య చేసుకున్న సంగతి తెలిసిందే. దీనిని మర్చిపోకముందే మరో ఇద్దరు సినీ ప్రముఖులు కన్నుమూశారు. ఒకే రోజున డైరెక్టర్, యంగ్‌ అసిస్టెంట్ డైరెక్టర్ మృతి చెందారు.  కోలీవుడ్ కు చెందిన ప్రముఖ సీనియర్‌ దర్శకుడు, నటుడు ఈ.రామదాస్‌(66) చెన్నైలో తుదిశ్వాస విడిచారు. కొన్ని రోజులుగా అనారోగ్యంతో బాధపడుతోన్న ఆయనను చూలైమేడులోని ప్రైవేట్‌ ఆస్పత్రికి తరలించారు. అయితే చికిత్స కొనసాగుతుండానే కన్నుమూశారాయన. దర్శకుడి మృతికి పలువురు సినీ ప్రముఖులు సంతాపం వ్యక్తం చేశారు. రామదాస్‌కు భార్య, ఇద్దరు కుమారులు ఉన్నారు. విల్లుపురంకు చెందిన రామదాసు సినిమా రంగంపై ఆసక్తితో చెన్నై వచ్చారు. మొదట రచయితగా కెరీర్‌ ప్రారంభించారు. ఆ తర్వాత దర్శకుడిగా మారారు. అధేవిధంగా క్యారెక్టర్‌ ఆర్టిస్టుగా పలు సినిమాల్లో నటించి మెప్పించారు.

కాగా ఎంతో భవిష్యత్‌ ఉన్న అసిస్టెంట్ డైరెక్టర్ రామకృష్ణన్ (25) కూడా హఠాత్తుగా కన్నుమూశడు. తూత్తుకుడి జిల్లా, కోవిల్ పట్టికి చెందిన శ్రీనివాసన్ కుమారుడు అయిన రామకృష్ణన్.. సినిమాల్లో అసిస్టెంట్ డైరెక్టర్ గా పని చేస్తున్నారు. ప్రస్తుతం డ్యాన్స్ కొరియోగ్రాఫర్ బృందా దర్శకత్వం వహిస్తున్న థగ్స్ సినిమాకి అసిస్టెంట్ డైరెక్టర్ గా పని చేస్తున్నారు. ఈ సినిమాకి సంబంధించి పోస్ట్ ప్రొడక్షన్ పనులు సాలిగ్రామంలో ఓ స్టూడియోలో జరుగుతున్నాయి. అయితే స్టూడియోలో ఉన్నట్లుండి ఒక్కసారిగా స్పృహ తప్పి పడిపోయారు రామకృష్ణన్. వెంటనే చిత్రబృందం అతన్ని ఆసుపత్రికి తరలించారు. అయితే రామకృష్ణన్ అప్పటికే మృతి చెందినట్లు వైద్యులు వెల్లడించారు. ఇలా కొన్ని గంటల వ్యవధిలో ఇద్దరు ప్రముఖులు మృతిచెందడంతో కోలీవుడ్‌లో విషాద ఛాయలు అలుముకున్నాయి. పలువురు ప్రముఖులు వీరి మృతికి నివాళులు అర్పిస్తున్నారు.

మరిన్ని సినిమా వార్తల కోసం క్లిక్ చేయండి..