ఇక తెలంగాణలో ర్యాపిడ్ టెస్టులు.. అరగంటలో రిజల్ట్..
ఇప్పటికే తెలంగాణ ప్రభుత్వం పలు ప్రాంతాల్లో ఫ్రీగా కోవిడ్ టెస్టులు నిర్వహిస్తోంది. ఇకపై కోవిడ్ టెస్టులను మరింత వేగం చేయనుంది. అయితే టెస్టుల రిపోర్ట్ వచ్చే సరికి మరింత ఆలస్యం జరుగుతోంది. ఈ నేపథ్యంలో తెలంగాణ సర్కార్ ఓ సంచలన నిర్ణయం..
ప్రస్తుతం తెలంగాణ రాష్ట్రంలో కరోనా వైరస్ పాజిటివ్ కేసులు విపరీతంగా పెరుగుతున్న విషయం తెలిసిందే. అందులోనూ గ్రేటర్ హైదరాబాద్ పరిధిలో పరిస్థితి మరింత దారుణంగా ఉంది. ఇప్పటికే కరోనాను కట్టడి చేయడానికై కంటైన్మెంట్ జోన్లను ఏర్పాటు చేసినప్పటికీ కేసుల సంఖ్య మాత్రం అస్సలు తగ్గడం లేదు. రాష్ట్రంలో నమోదయ్యే కేసుల్లో 70 నుంచి 80 శాతం వరకూ హైదరాబాద్ పరిధిలోనే నమోదవుతున్నాయి. ఇప్పటికే పలువురు ప్రజా ప్రతినిధులు, ఉద్యోగులు, వైద్యులు, నటులు సైతం ఈ వైరస్ బారిన పడటం ఆందోళన కలిగిస్తోంది.
అయితే ఇప్పటికే తెలంగాణ ప్రభుత్వం పలు ప్రాంతాల్లో ఫ్రీగా కోవిడ్ టెస్టులు నిర్వహిస్తోంది. ఇకపై కోవిడ్ టెస్టులను మరింత వేగం చేయనుంది. అయితే టెస్టుల రిపోర్ట్ వచ్చే సరికి మరింత ఆలస్యం జరుగుతోంది. ఈ నేపథ్యంలో తెలంగాణ సర్కార్ ఓ సంచలన నిర్ణయం తీసుకుంది. కరోనా అనుమానితులకు కేవలం 15 నిమిషాల్లో కోవిడ్ ఉందా? లేదా అనే విషయం తెలుసుకునేందుకు ఉపయోగించే ‘ర్యాపిడ్ యాంటీజెన్ డిటెక్షన్’ ద్వారా పరీక్షలు చేయాలని కీలక నిర్ణయం తీసుకుంది.
ఈ ‘ర్యాపిడ్ యాంటీజెన్ డిటెక్షన్’ ద్వారా పరీక్షలు చేస్తే గరిష్టంగా అరగంటలో ఫలితం రానుంది. దీనికి భారతీయ వైద్య పరిశోధన మండలి (ఐసీఎంఆర్) కూడా గ్రీన్ సిగ్నల్ ఇచ్చింది. ఇందుకు సంబంధించి మరో 2, 3 రోజుల్లో ఢిల్లీ నుంచి కిట్లు తెలంగాణకి రానున్నాయి.
కాగా ముఖ్యంగా ఈ పరీక్షలను కరోనా లక్షణాలు ఉన్నవారికి మాత్రమే చేస్తారు. అందులోనూ 65 ఏళ్ల పై బడిన వారు, జ్వరం, దగ్గు, శ్వాస కోవ ఇబ్బందులు, జలుబు ఉన్నవారికి దీని ద్వారా పరీక్షించాలని వైద్య ఆరోగ్య శాఖ వర్గాలు వెల్లడిస్తున్నాయి. అలాగే కంటైన్మెంట్ జోన్లలో ఉన్నవారికి, గుండె జబ్బులు, ఊపిరితిత్తుల వ్యాధి, కాలేయ, మూత్ర పిండాల వ్యాధి, షుగర్, బీపీ తదితర అనారోగ్య లక్షణాలున్న వారికి కూడా ఈ పరీక్షలను చేస్తారు.
