MBBS, BDS మెడికల్ కోర్సుల ఫీజులు పెరిగాయ్‌.. పూర్తి వివరాలు ఇవిగో
మెడికల్ కాలేజీల్లో చదువుతున్న విద్యార్థులకు ఫీజుల భారం మరింత పెరిగింది. 2026-27 విద్యా సంవత్సరానికి సంబంధించి UG కోర్సులతో పాటు PG మెడికల్, డెంటల్ కోర్సులకు కూడా ప్రభుత్వం మధ్యంతర ఫీజులను ఖరారు చేసింది. UG కోర్సులకు 10 శాతం, PG కోర్సులకు 15 శాతం పెంపుతో కొత్త ఫీజులను..
Updated on: Aug 29, 2026 | 3:39 PM
అమరావతి, ఆగస్ట్‌ 29: ప్రైవేట్ మెడికల్, డెంటల్ కాలేజీల్లో చదువుతున్న విద్యార్థులకు ఫీజుల భారం మరింత పెరిగింది. 2026-27 విద్యా సంవత్సరానికి సంబంధించి UG కోర్సులతో పాటు PG మెడికల్, డెంటల్ కోర్సులకు కూడా ప్రభుత్వం మధ్యంతర ఫీజులను ఖరారు చేసింది. UG కోర్సులకు 10 శాతం, PG కోర్సులకు 15 శాతం పెంపుతో కొత్త ఫీజులను నిర్ణయించింది. MBBS, BDS UG కోర్సులకు 2025-26లో ఉన్న ఫీజులపై 10 శాతం పెంపు చేస్తూ ప్రభుత్వం నిర్ణయం తీసుకుంది. MBBS ఏ-కేటగిరీ ఫీజు రూ.18,150 కాగా.. బీ-కేటగిరీ ఫీజు రూ.14.52 లక్షలుగా నిర్ణయించారు. NRI కోటాలో సీ-కేటగిరీ ఫీజు రూ.43.56 లక్షల వరకు ఉంటుంది.
BDS ఫీజులు ఖరారు
BDSలో ఏ-కేటగిరీ ఫీజు రూ.15,730.. బీ-కేటగిరీ ఫీజు రూ.4.84 లక్షలుగా ఖరారైంది. NRI కోటాలో సీ-కేటగిరీ ఫీజు రూ.14.52 లక్షల వరకు నిర్ణయించారు. PG మెడికల్ కోర్సులకు 15 శాతం పెంపుతో మధ్యంతర ఫీజులు ఖరారయ్యాయి. క్లినికల్ డిగ్రీల్లో ఏ-కేటగిరీ ఫీజు రూ.5,71,320.. బీ-కేటగిరీ ఫీజు రూ.11,42,640గా నిర్ణయించారు. NRI కోటాలో సీ-కేటగిరీ ఫీజు రూ.66,12,500గా ఖరారైంది. పారా క్లినికల్ డిగ్రీ, డిప్లొమా కోర్సులకు ఏ-కేటగిరీ ఫీజు రూ.1,78,538గా.. ప్రీ క్లినికల్ డిగ్రీకి రూ.80,937గా నిర్ణయించారు. PG డెంటల్ క్లినికల్ డిగ్రీల్లో ఏ-కేటగిరీ ఫీజు రూ.3,92,783.. బీ-కేటగిరీ ఫీజు రూ.7,85,565గా ఖరారైంది. NRI కోటాలో సీ-కేటగిరీ ఫీజు రూ.15,87,000గా నిర్ణయించారు. డెంటల్ పారా క్లినికల్ డిగ్రీల్లో ఏ-కేటగిరీ ఫీజు రూ.3,53,504.. బీ-కేటగిరీ ఫీజు రూ.5,74,759గా నిర్ణయించారు. సీ-కేటగిరీ ఫీజు రూ.9,25,750గా ఖరారైంది. ప్రభుత్వం నిర్ణయించిన మధ్యంతర ఫీజులకు మించి ప్రైవేట్ కాలేజీలు ఎలాంటి అదనపు మొత్తాన్ని వసూలు చేయరాదు. ఏ రూపంలోనైనా అదనపు వసూళ్లు చేస్తే నిబంధనలకు విరుద్ధంగా పరిగణిస్తారు.
తుది ఫీజుల తర్వాత సర్దుబాటు
ప్రస్తుతం ప్రకటించిన ఫీజులు 2026-27 విద్యా సంవత్సరానికి మాత్రమే మధ్యంతరంగా అమల్లో ఉంటాయి. APHEFR&MC తుది ఫీజులను నిర్ణయించిన తర్వాత ఫీజులో తేడా వస్తే.. విద్యార్థులకు రీఫండ్ లేదా సర్దుబాటు చేయాలి. తుది ఫీజు పెరిగితే నిబంధనల ప్రకారం అదనపు మొత్తాన్ని వసూలు చేసే అవకాశం ఉంటుంది. అంటే.. ఒకవైపు UGలో MBBS, BDS ఫీజుల పెంపు.. మరోవైపు PG మెడికల్, డెంటల్ కోర్సుల ఫీజుల పెంపుతో ప్రైవేట్ వైద్య విద్య మరింత ఖరీదుగా మారనుంది. అయితే ఇవన్నీ ప్రస్తుతం ఇంటెరిమ్ ఫీజులే.. కమిటీ తుది నిర్ణయం తర్వాత ఫీజుల్లో మార్పులు ఉండే అవకాశం ఉంది.
