CBSE విద్యార్థులకు గుడ్‌న్యూస్.. 9 నుంచి 12వ తరగతి వరకు AI పాఠాలు.. 20 గంటల ప్రత్యేక మాడ్యూల్!
ఆర్టిఫిషియల్ ఇంటెలిజెన్స్ (AI) వినియోగం రోజురోజుకూ పెరుగుతున్న నేపథ్యంలో విద్యార్థులకు చిన్న వయసు నుంచే ఏఐపై అవగాహన కల్పించేందుకు కేంద్రం చర్యలు చేపట్టింది. ఇందులో భాగంగా సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) పరిధిలోని విద్యార్థులకు ఏఐ, కంప్యూటేషనల్ థింకింగ్ (CT) అంశాలను పరిచయం చేయనున్నారు..
Updated on: Oct 26, 2026 | 4:49 PM
న్యూఢిల్లీ, అక్టోబర్ 26: మారుతున్న సాంకేతిక ప్రపంచానికి అనుగుణంగా పాఠశాల విద్యలోనూ కీలక మార్పులు చోటుచేసుకుంటున్నాయి. ఆర్టిఫిషియల్ ఇంటెలిజెన్స్ (AI) వినియోగం రోజురోజుకూ పెరుగుతున్న నేపథ్యంలో విద్యార్థులకు చిన్న వయసు నుంచే ఏఐపై అవగాహన కల్పించేందుకు కేంద్రం చర్యలు చేపట్టింది. ఇందులో భాగంగా సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) పరిధిలోని విద్యార్థులకు ఏఐ, కంప్యూటేషనల్ థింకింగ్ (CT) అంశాలను పరిచయం చేయనున్నారు. ఇందుకోసం నేషనల్ కౌన్సిల్ ఆఫ్ ఎడ్యుకేషనల్ రీసెర్చ్ అండ్ ట్రైనింగ్ (NCERT) 9 నుంచి 12వ తరగతి విద్యార్థుల కోసం 20 గంటల ప్రత్యేక పరిచయ మాడ్యూల్‌ను రూపొందించింది.
20 గంటల ప్రత్యేక మాడ్యూల్.. అంతర్గత మూల్యాంకనం
ప్రస్తుత రోజుల్లో చదువులు, పరిశోధనలు, కంటెంట్ తయారీ, కెరీర్ గైడెన్స్ వంటి అనేక రంగాల్లో ఏఐ సాధనాలను ఉపయోగిస్తున్నారు. అయితే, ఏఐ ఇచ్చే ప్రతి సమాధానం సరైనదే అని నమ్మడం ప్రమాదకరం. తప్పుడు సమాచారాన్ని గుర్తించడం, ఏఐ సాంకేతికత ఎలా పనిచేస్తుందో అర్థం చేసుకోవడం, దానిని బాధ్యతాయుతంగా ఉపయోగించడం వంటి అంశాలపై విద్యార్థులకు అవగాహన కల్పించడమే ఈ మాడ్యూల్ ప్రధాన ఉద్దేశం. 9 నుంచి 12వ తరగతి విద్యార్థుల కోసం రూపొందించిన ఈ 20 గంటల మాడ్యూల్‌ను పాఠశాల స్థాయి అంతర్గత మూల్యాంకనంలో భాగంగా ఉపయోగించనున్నారు. 2026-27 విద్యా సంవత్సరంలో ఈ మాడ్యూల్స్‌ను అందించనున్నట్లు CBSE ఏప్రిల్ 9న విడుదల చేసిన సర్క్యులర్‌లో ప్రకటించింది. బోర్డు సవరించిన విధానం ప్రకారం, 9వ తరగతి విద్యార్థులకు కంప్యూటేషనల్ థింకింగ్, ఆర్టిఫిషియల్ ఇంటెలిజెన్స్ మాడ్యూల్స్ తప్పనిసరిగా ఉంటాయి. అయితే, 10వ తరగతి విద్యార్థులకు ప్రస్తుతం అమల్లో ఉన్న విధానమే కొనసాగనుంది.
ఈ మాడ్యూల్ ద్వారా విద్యార్థులకు ఏఐ సాంకేతికతకు సంబంధించిన ప్రాథమిక అంశాలను పరిచయం చేయనున్నారు. ముఖ్యంగా డీప్‌ఫేక్ వీడియోలు, తప్పుడు సమాచారాన్ని గుర్తించడం, ఏఐ చాట్‌బాట్‌లు ఇచ్చే సమాధానాలను పరిశీలించడం, వాటిలోని తప్పులను గుర్తించడం వంటి అంశాలపై అవగాహన కల్పించనున్నారు. ఏఐ సాధనాలను ఉపయోగించినప్పుడు వచ్చిన సమాచారాన్ని ఇతర విశ్వసనీయ వనరులతో పోల్చి తనిఖీ చేయడం, సరైన సమాచారాన్ని గుర్తించడం వంటి నైపుణ్యాలను విద్యార్థుల్లో పెంపొందించడంపై దృష్టి సారించనున్నారు. ఏఐపై ప్రాథమిక అవగాహన కల్పించడంతో పాటు, ఈ అంశాన్ని మరింత లోతుగా అభ్యసించాలనుకునే విద్యార్థుల కోసం NCERT ప్రత్యేక ఏఐ పాఠ్యపుస్తకాలను కూడా సిద్ధం చేస్తోంది. కంప్యూటర్ సైన్స్ చదవని విద్యార్థులకు కూడా ఏఐపై ప్రాథమిక పరిజ్ఞానం అందుబాటులో ఉండాలన్నది ఈ కార్యక్రమం వెనుక ఉన్న ముఖ్య ఉద్దేశం. ఈ మాడ్యూల్‌ను రూపొందించడంలో ఐఐటీ మద్రాస్, ఐఐటీ జోధ్‌పూర్‌లు NCERTకు సహకరించాయి.
విద్యాశాఖ ఉన్నతాధికారి తెలిపిన వివరాల ప్రకారం.. ఏఐ సాధనాలు ఇప్పుడు విద్య, పరిశోధన, కంటెంట్ రైటింగ్, కెరీర్ సలహాలు వంటి అనేక కార్యకలాపాల్లో భాగమయ్యాయి. అందువల్ల విద్యార్థులు వీటిని ఎలా ఉపయోగించాలి? వాటి ద్వారా వచ్చిన సమాచారాన్ని ఎలా ధ్రువీకరించాలి? అనే అంశాలను నేర్చుకోవడం ఎంతో అవసరం. పాఠశాల స్థాయి నుంచే ఏఐపై అవగాహన పెంచడం ద్వారా విద్యార్థులు భవిష్యత్తులో మారుతున్న సాంకేతిక ప్రపంచానికి సిద్ధంగా ఉండేందుకు ఈ కార్యక్రమం ఉపయోగపడనుంది. ఏఐను కేవలం ఒక ఐచ్ఛిక సబ్జెక్టుగా కాకుండా, ప్రతి విద్యార్థికి అవసరమైన ప్రాథమిక నైపుణ్యంగా పరిచయం చేయడమే ఈ చర్యలోని ప్రధాన లక్ష్యం.
