అందరికీ ఆర్థిక పాఠాలు చెప్పే రాబర్ట్ కియోసాకికే వేల కోట్ల అప్పులు!

రిచ్ డాడ్ పూర్ డాడ్ పుస్తకంతో ప్రపంచవ్యాప్తంగా ఆర్థిక సూత్రాలను పరిచయం చేసిన రచయిత, వ్యాపారవేత్త రాబర్ట్ కియోసాకికి భారీ మొత్తంలో అప్పులు ఉన్నాయనే విషయం అప్పట్లో సంచలనం సృష్టించింది. ఇతరులకు ఆర్థిక స్వేచ్ఛ, సంపద సృష్టి గురించి చెప్పే కియోసాకి స్వయంగా ఎంత అప్పులో ఉన్నారనే ప్రశ్నకు ఆయనే సమాధానం ఇచ్చారు.

1.2 బిలియన్ డాలర్ల అప్పు ఉందన్న కియోసాకి

2023లో చేసిన వ్యాఖ్యలు, 2024లో విస్తృతంగా ప్రచారంలోకి వచ్చిన వివరాల ప్రకారం.. తనపై 1.2 బిలియన్ డాలర్ల అప్పు ఉందని కియోసాకి వెల్లడించారు. భారత కరెన్సీలో ఇది సుమారు రూ.10 వేల కోట్లకు పైగా అవుతుంది. అయితే ఈ మొత్తం ఆయన స్వయంగా వెల్లడించారు.

అప్పును ఆయన ఎందుకు భారం అనుకోవడం లేదు?

సాధారణంగా అప్పు అంటే ఆర్థిక ఒత్తిడిగా భావిస్తాం. కానీ కియోసాకి మాత్రం అప్పును గుడ్ డెట్, బ్యాడ్ డెట్‌గా విభజిస్తారు. ఆదాయం తెచ్చే ఆస్తులు, రియల్ ఎస్టేట్ లేదా వ్యాపారాల్లో పెట్టుబడి పెట్టేందుకు తీసుకునే రుణాలను ఆయన ‘గుడ్ డెట్’గా చూస్తారు. వినియోగ వస్తువులు, విలువ తగ్గే వస్తువుల కోసం తీసుకునే అప్పులను ‘బ్యాడ్ డెట్’గా భావిస్తారు.

ఆస్తులు కొనేందుకే అప్పులు

తాను అప్పు తీసుకున్న డబ్బును ఆస్తులు కొనుగోలు చేయడానికి ఉపయోగించానని కియోసాకి చెబుతున్నారు. ముఖ్యంగా రియల్ ఎస్టేట్ వంటి ఆదాయం వచ్చే ఆస్తుల కోసం అప్పును ఒక లీవరేజ్‌‌గా ఉపయోగించడం తన ఆర్థిక వ్యూహంలో భాగమని ఆయన పలుమార్లు వివరించారు. 2026లోనూ ఆయనకు సంబంధించిన ‘రిచ్ డాడ్’ కంటెంట్‌లో 1.2 బిలియన్ డాలర్ల అప్పును ఉద్దేశపూర్వకంగా కొనసాగిస్తున్నట్లు పేర్కొన్నారు.

నేను దివాలా తీస్తే బ్యాంక్‌దే సమస్య

భారీ అప్పుపై మాట్లాడుతున్నప్పుడు కియోసాకి చేసిన వ్యాఖ్య కూడా అప్పట్లో వైరల్‌గా మారింది. తాను దివాలా తీస్తే బ్యాంకుకూ సమస్య వస్తుందని, అందుకే ఆ అప్పును తాను భయపడటం లేదనే భావనను ఆయన వ్యక్తం చేశారు. అయితే ఇది ఆయన వ్యక్తిగత పెట్టుబడి తత్వాన్ని వివరించే వ్యాఖ్య మాత్రమే; సాధారణ వ్యక్తులు అదే విధంగా భారీగా అప్పులు తీసుకోవడం సురక్షితమని అర్థం కాదు.

కియోసాకి కథలో ప్రధాన అంశం అప్పు ఉందా లేదా? కంటే, ఆ అప్పుతో ఏం చేస్తున్నారనేదే ముఖ్యం. ఆదాయం సృష్టించే ఆస్తుల కోసం అప్పు తీసుకోవడం ఒక వ్యూహం కావచ్చు. కానీ ఆదాయం లేని ఖర్చుల కోసం అప్పు చేయడం ఆర్థిక భారంగా మారే ప్రమాదం ఉంది. అందుకే కియోసాకి 1.2 బిలియన్ డాలర్ల అప్పు విషయం ఆసక్తికరమైనదే అయినప్పటికీ, ఆయన వ్యూహాన్ని అర్థం చేసుకోకుండా అనుసరించడం మాత్రం ప్రమాదకరం.

మరిన్ని బిజినెస్ వార్తల కోసం ఇక్కడ క్లిక్ చేయండి