Video: ఇందుకోసమేనా డబ్బులు కట్టేది? ఎయిర్‌పోర్ట్‌లో లగేజీ వీడియో లీక్‌! భగ్గుమన్న నెటిజన్లు

తరచుగా విమాన ప్రయాణాలు చేసే ప్రయాణికులకు లగేజీ దెబ్బతినడం కొత్త విషయం కాదు. అయితే తాజాగా సోషల్ మీడియాలో వైరల్ అవుతున్న ఒక వీడియో ఈ సమస్యపై పెద్ద చర్చకు దారితీసింది. ఈ క్లిప్ అమెరికాలోని ఓ’హేర్ అంతర్జాతీయ విమానాశ్రయం బ్యాగేజ్ హ్యాండ్లింగ్ ప్రాంతానికి చెందినదిగా ప్రచారం అవుతోంది. ఇందులో లగేజీ హ్యాండ్లర్లు సూట్‌కేసులను నిర్లక్ష్యంగా కన్వేయర్ బెల్ట్‌పైకి విసరడం, కింద పడేయడం వంటి దృశ్యాలు కనిపిస్తున్నాయి. వీడియోలో చూపిన దృశ్యాలు విమానయాన సంస్థలు తరచుగా చెబుతున్న రవాణా సమయంలో జరిగే నష్టం అనే వాదనపై సందేహాలు రేకెత్తిస్తున్నాయి. ప్రయాణికులు తమ సామాను పాడవడం వెనుక అసలు కారణం ఇదేనా అనే ప్రశ్నలను లేవనెత్తుతున్నారు.

సోషల్ మీడియాలో పలువురు వినియోగదారులు తమ అనుభవాలను పంచుకుంటూ, ఈ వీడియోలో కనిపిస్తున్న విధానమే తమ లగేజీ నష్టానికి కారణమని భావిస్తున్నట్లు తెలిపారు. ఒక వినియోగదారు ఖరీదైన హార్డ్ కేస్ సూట్‌కేస్ చక్రాలు విరిగిపోవడం తనకు అర్థం కాలేదని, కానీ ఈ వీడియో చూసిన తర్వాత కారణం తెలిసిందని పేర్కొన్నారు. మరొకరు తాము గతంలో గ్రౌండ్ హ్యాండ్లింగ్ సంస్థలో పనిచేసినప్పుడు కూడా ఇలాంటి నిర్లక్ష్య పద్ధతులు సాధారణమేనని వెల్లడించారు.

ఇక మరో ముఖ్య అంశం ఖర్చు. చాలా విమానయాన సంస్థలు చెక్డ్ బ్యాగేజీపై అదనపు ఫీజులు వసూలు చేస్తున్న నేపథ్యంలో, ప్రయాణికులు అందుకు తగిన సేవ అందుతున్నదా అనే సందేహం వ్యక్తం చేస్తున్నారు. ఈ వీడియో వల్ల లగేజీ భద్రత, సేవా ప్రమాణాలపై మళ్లీ చర్చ మొదలైంది. మొత్తానికి ఈ ఘటన విమాన ప్రయాణంలో లగేజీ నిర్వహణపై పారదర్శకత, బాధ్యత అవసరాన్ని మరింత స్పష్టంగా చూపిస్తోంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి