15 రోజుల నుంచి తీవ్రమైన కడుపు నొప్పి, మోషన్ ప్రాబ్లం.. వామ్మో.. వైద్యులు ఇలా చేశారేంటి..

Kakinada Ggh Incident

బాలింత కడుపులో స్టీల్ పరికరం, దూది అలాగే వదిలేసి కుట్లు వేసిన ఘటన కాకినాడ GGHలో జరిగింది. ప్రసవం తర్వాత ఇంటికి వెళ్లిన బాలింతకు తీవ్రమైన కడుపునొప్పి రావడంతో ప్రైవేట్ ఆసుపత్రికి తీసుకెళ్లగా, అక్కడ స్కానింగ్‌లో ఈ విషయం బయటపడినట్లు కుటుంబసభ్యులు చెబుతున్నారు. గత నెల 23న గర్బిణీ కాకినాడ ప్రభుత్వ ఆసుపత్రిలో చేరారు. ఆసుపత్రిలోని గైనకాలజీ విభాగం వైద్య బృందం ఆమెకు ప్రసవ సమయంలో సేవలు అందించింది. ప్రసవ ప్రక్రియలో భాగంగా గర్భాశయంలోని వ్యర్థ పదార్థాలను తొలగించేందుకు ఎస్ఆర్ కాన్యులా అనే స్టీల్ పరికరాన్ని ఉపయోగించారు. డెలివరీ తర్వాత స్టీల్ పరికరం బయటకు తీయడం మరిచిపోయారు. అలాగే దూదిని కూడా కడుపులోనే వదిలేసి కుట్లు వేసినట్టు కుటుంబసభ్యులు చెబుతున్నారు.

గత నెల 29న బాలింతను ఆస్పత్రి నుంచి డిశ్చార్జ్ చేశారు. అయితే ఇంటికి వెళ్లిన ఆమెకు తీవ్రమైన కడుపునొప్పి రావడంతో కుటుంబసభ్యులు ఆందోళనకు గురయ్యారు. వెంటనే ప్రైవేట్ ఆసుపత్రికి తీసుకెళ్లగా.. GGH వైద్యుల నిర్లక్ష్యం బయటపడింది. కడుపులోనే స్టీల్ పరికరం ఉండిపోయిందని స్కానింగ్‌లో గుర్తించి, GGHకి వెళ్లాలని సూచించారు. మరోసారి సర్జరీ చేసిన GGH డాక్టర్లు.. కడుపులో వదిలేసిన స్టీల్ పరికరం, దూదిని తొలగించారు. ఇలాంటి ఘటనలు జరగకుండా.. చర్యలు తీసుకోవాలని బాధితురాలి కుటుంబసభ్యులు డిమాండ్ చేశారు..

కాకినాడ ఘటనపై ప్రభుత్వం చర్యలు

విధుల్లో నిర్లక్ష్యం వహించిన కాకినాడ ప్రభుత్వాసుపత్రి వైద్యులపై ప్రభుత్వం చర్యలు తీసుకుంది.. ఇద్దరు అసిస్టెంట్ ప్రొఫెసర్లను ప్రభుత్వం సస్పెండ్ చేసింది. ఈ కేసులో అసిస్టెంట్ ప్రొఫెసర్లు వంశీప్రియ, స్రవంతి లను సస్పెన్షన్ చేసిన ప్రభుత్వం.. గైనకాలజీ పీజీ ఉజ్వల వివరణ ఇవ్వాలని నోటీసులు ఇచ్చింది. మరో పీజీ నాగశ్రీపై చర్యలు తీసుకోవాలని రంగరాయ మెడికల్ కాలేజీ ప్రిన్సిపాల్‌కి DME ఆదేశాలు జారీ చేశారు.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..