Watch Video: ఏపీలో ఎడతెరపిలేని వర్షాలు.. అధికారులకు చంద్రబాబు కీలక ఆదేశాలు

ఏపీలో భారీ వర్షాలు, వరదల నేపథ్యంలో చంద్రబాబు సర్కార్ అలెర్ట్ అయింది. అధికారులకు చంద్రబాబు కీలక ఆదేశాలు ఇచ్చారు. వర్షాలు అధికంగా ఉన్న ఆయా జిల్లాల కలెక్టర్లు, ఎస్పీలు, వివిధ శాఖల అధికారులతో సీఎం చంద్రబాబు వీడియో కాన్ఫరెన్స్ నిర్వహించారు. ఈ కాన్ఫరెన్స్‌లో అల్లూరి సీతారామరాజు, పశ్చిమ గోదావరి, తూర్పు గోదావరి, కోనసీమ, కాకినాడ జిల్లాల కలెక్టర్లు, ఎస్పీలతో పాటు ఆయా శాఖల అధికారులు పాల్గొన్నారు. అధికారులు పూర్తి అప్రమత్తతతో ఉండాలనీ.. ప్రాణ, ఆస్తి నష్టం జరగకుండా చూడాలనీ ఆదేశించారు.

ఈ ఏడాదిలో ఇప్పటి వరకు సాధారణ వర్షపాతం 185 మిల్లీమీటర్లకు గాను 244 మిల్లీమీటర్లు నమోదైందని, రాష్ట్ర వ్యాప్తంగా 31 శాతం అదనంగా వర్షపాతం నమోదైంది. ఈ నేపథ్యంలో చెరువు కట్టలు, వాగుల్లో ప్రవాహాలపై నిరంతర పర్యవేక్షణ ఉండాలన్నారు. గత ప్రభుత్వంలో ఇష్టానుసారంగా ఇసుక, మట్టి అక్రమ తవ్వకాల వల్ల గోదావరి కట్టలు బలహీన పడ్డాయనీ.. వాటిపై ప్రత్యేక దృష్టిసారించాలనీ సూచించారు. గత ప్రభుత్వం డిజాస్టర్ మేనేజ్‌మెంట్ వ్యవస్థలను నాశనం చేసింది. మళ్లీ వాటిని యాక్టివేట్ చేయాలని సీఎం సూచించారు. విపత్తులు వచ్చినప్పుడే అధికారుల పనితీరు, సమర్థత బయటపడుతుంది. ఇలాంటి సమయంలోనే అధికారులు డైనమిక్‌‌గా పనిచేయాలన్నారు.