హోర్ముజ్ ఓపెన్ చేస్తాం.. యుద్ధం ఆపేద్దాం.. ఇరాన్ ఆఫర్‌కు అమెరికా షాక్!

మధ్యప్రాచ్యంలో కొనసాగుతున్న యుద్ధానికి తెరదించేందుకు ఇరాన్ చేసిన కీలక ప్రతిపాదనపై ఉత్కంఠ నెలకొంది. హోర్ముజ్ జలసంధిని ఏడు రోజుల్లో తిరిగి తెరవడంతో పాటు ఆ ప్రాంతవ్యాప్తంగా కాల్పుల విరమణకు సిద్ధమని ఇరాన్ ప్రకటించింది. అయితే ఈ ప్రతిపాదనను అమెరికా అధ్యక్షుడు డొనాల్డ్ ట్రంప్ తిరస్కరించినట్లు ‘వాల్ స్ట్రీట్ జర్నల్’ అమెరికా అధికారులను తెలిపినట్లు వెల్లడించింది. ట్రంప్ నవంబర్ మధ్యంతర ఎన్నికల తర్వాత ఇరాన్‌పై మళ్లీ బాంబు దాడులు జరిగే అవకాశం ఉందని తన సహాయకులతో చెప్పినట్లు కూడా ఆ కథనం పేర్కొంది.

ఇరాన్ విదేశాంగ మంత్రి అబ్బాస్ అరాఘ్చి ఐక్యరాజ్యసమితి సర్వసభ్య సమావేశం సందర్భంగా మాట్లాడుతూ.. ఖతార్ మధ్యవర్తుల ద్వారా తమ ప్రతిపాదనను అమెరికాకు చేరవేసినట్లు తెలిపారు. అమెరికా ఈ ఒప్పందానికి అంగీకరిస్తే, హోర్ముజ్ జలసంధిని తిరిగి తెరవడానికి ఏడు రోజుల కౌంట్‌డౌన్ ప్రారంభమవుతుందని చెప్పారు. ‘‘అమెరికా వైపు చిత్తశుద్ధి ఉంటే, అన్నీ సిద్ధంగా ఉన్నాయి’’ అని అరాఘ్చి పేర్కొన్నారు.

ఇరాన్ ప్రతిపాదనలో కీలక అంశాలు ఉన్నాయి. హోర్ముజ్‌ను తిరిగి తెరవడం, ప్రాంతంలోని వివిధ రంగాల్లో శత్రుత్వాలను నిలిపివేయడం, అమెరికా ఇరాన్ ఓడరేవులపై విధించిన నౌకాదళ దిగ్బంధనాన్ని ఎత్తివేయడం, స్తంభింపజేసిన ఇరాన్ నిధులను విడుదల చేయడం, చమురు ఆంక్షలను సడలించడం వంటి అంశాలు ఇందులో ఉన్నట్లు రాయిటర్స్ తెలిపింది. అయితే ఇరాన్ డిమాండ్లను నెరవేరుస్తుందన్న విషయంలో ట్రంప్‌కు అనుమానాలు ఉన్నాయని WSJ నివేదిక పేర్కొంది. మరోవైపు అమెరికా నుంచి అధికారిక స్పందన కోసం ఇరాన్ ఎదురుచూస్తోంది. ఇప్పటివరకు అమెరికా తరఫున ఈ ప్రతిపాదనపై అధికారిక సమాధానం వెలువడలేదు.

ఏడు నెలలుగా కొనసాగుతున్న ఈ ఘర్షణ ఇప్పటికే మధ్యప్రాచ్యాన్ని దాటి ప్రపంచ ఇంధన సరఫరాలపై ప్రభావం చూపుతోంది. ప్రపంచంలోని అత్యంత కీలకమైన చమురు రవాణా మార్గాల్లో ఒకటైన హోర్ముజ్ జలసంధి పరిస్థితి కారణంగా అంతర్జాతీయ ఇంధన మార్కెట్లలో అనిశ్చితి కొనసాగుతోంది. ఇరాన్ ప్రతిపాదనకు అమెరికా స్పందన ఇప్పుడు తదుపరి పరిణామాలను నిర్ణయించే కీలక అంశంగా మారింది.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..