World Bank: శ్రీలంక పరిస్థితులపై ఆందోళన ఉంది.. కానీ రుణాలు మాత్రం ఇవ్వం: ప్రపంచ బ్యాంకు
పీకల్లోతు అప్పుల్లో ఉన్న శ్రీలంకకు ప్రపంచ బ్యాంక్‌ మొండి చేయి చూపింది. ప్రస్తుతానికి సహాయం చేసే అలోచన లేదని స్పష్టం చేసింది. ఆ దేశంలో స్థూల ఆర్థిక విధానానికి సంబంధించిన స్పష్టమైన కార్యాచరణ ఏర్పడే వరకూ ఆర్థిక సాయం అందించడం సాధ్యం కాదని తెలిపింది.
World Bank on Sri Lanka: తీవ్ర ఆర్థిక, రాజకీయ సంక్షోభంలో కూరుకుపోయిన శ్రీలంకకు కష్టాలు మరిన్ని పెరిగాయి. ఈ కష్టాల నుంచి గట్టెక్కేందుకు ప్రపంచ బ్యాంకు సహకరిస్తుందని శ్రీలంక గంపడాశలు పెట్టుకుంది.. కానీ ప్రపంచ బ్యాంకు మాత్రం చేతులు దులుపేసుకుంటూ కీలక ప్రకటన చేసింది. ప్రస్తుతానికి శ్రీలంకకు ఆర్థిక సాయం చేసే ప్రణాళికగానీ, ఆలోచన తమకు లేదని స్పష్టం చేసింది. ఆ దేశంలో స్థూల ఆర్థిక విధానానికి సంబంధించిన స్పష్టమైన కార్యాచరణ ఏర్పడే వరకూ ఆర్థిక సాయం అందించడం సాధ్యం కాదని తెలిపింది. ఆర్థిక సంక్షోభం నుంచి గట్టెక్కేందుకు నిర్మాణాత్మక సంస్కరణలు అవసరమని ప్రపంచ బ్యాంకు ఒక ప్రకటనలో పేర్కొంది. శ్రీలంకలో ప్రస్తుత సంక్షోభం అక్కడి ప్రజలపై చూపుతున్న ప్రభావంపై తీవ్ర ఆందోళన ఉందని.. కానీ ఎటువంటి ఆర్థిక సాయం చేయలేమంటూ ప్రపంచ బ్యాంకు తెలిపింది. ఆహారం, మందులు, వంటగ్యాస్‌ తదితర అవసరాల కోసం శ్రీలంకకు ఇప్పటికే రుణాలను మంజూరు చేశామని.. ప్రస్తుతం రుణం ఇచ్చే ఆలోచన మాత్రం లేదని స్పష్టం చేసింది.
ఇదిలాఉంటే.. శ్రీలంకలో పరిస్థితులను గాడిన పెట్టడానికి అధ్యక్షుడు రణిల్‌ విక్రమసింఘే దృష్టిసారించారు. దేశ వ్యాప్తంగా నిరసనలు ఇంకా కొనసాగుతున్న నేపథ్యంలో ఎమర్జెన్సీని పొడగించారు. అన్ని రాజకీయ పక్షాలతో కలిపి సంకీర్ణ ప్రభుత్వాన్ని ఏర్పాటు చేసేందుకు ప్రయత్నిస్తున్నారు. ఇందు కోసం శ్రీలంక ఫ్రీడమ్‌ పార్టీ నాయకుడు మైత్రిపాలసిరి సేనతో చర్చలు జరిపారు. నేషనల్‌ ఫ్రీడమ్‌ ఫ్రంట్‌ విక్రమ సింఘేకు మద్దతు ఇస్తున్నా, ఎస్‌జేబీ కలిసి రావడం లేదు.. కాగా ప్రజలు రణిల్‌ విక్రమ సింఘేను అనుమానంగానే చూస్తున్నారు. శ్రీలంకలో రాజకీయ స్థిరత్వం వస్తే కానీ ఆర్థిక సంక్షోభం నుంచి బయట పడటం కష్టమని భావిస్తున్నారు ఆర్థిక వేత్తలు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..