రైల్వే స్టేషన్లలో నీరు తాగొచ్చా?తనిఖీల్లో బయటపడ్డ నిజాలు ఇవే!

రైలు ప్రయాణం అంటేనే ఒక వింత అనుభూతి. దూర ప్రయాణాలు చేసేవారు ఎక్కువగా రైళ్లనే ఎంచుకుంటారు. అయితే, రైళ్లలో ఇలా దూర ప్రయాణాలు చేసేవారికి ఒక ప్రధాన సమస్య ఎదురవుతుంది… అదే దాహం! ప్లాట్‌ఫారమ్ మీద లభించే వాటర్ బాటిళ్లు ప్రతీసారి కొనుక్కోవడం అందరికీ వీలుపడదు. అందుకే చాలామంది స్టేషన్లలో ఉండే వాటర్ ట్యాప్‌ల దగ్గరికే వెళ్లి తమ బాటిళ్లను నింపుకుంటారు. అయితే, అలా నీళ్లు తాగే సమయంలో చాలామందికి ఒక దేహం కలుగుతుంది… “ఈ నీళ్లు అసలు తాగొచ్చా? ఈ నీరు స్వచ్ఛమైనదేనా? లేక ఏమైనా బ్యాక్టీరియా ఉండి మన ఆరోగ్యం పాడవుతుందా?” అని.. ఈ సందేహాలకు స్వయంగా రైల్వే అధికారులే సమాధానం చెప్పారు. విజయవాడ రైల్వే డివిజన్ నిర్వహించిన భారీ తనిఖీల నివేదిక ఇప్పుడు అందరికీ ఊరటనిస్తోంది. విజయవాడ డివిజన్ పరిధిలోని రైల్వే స్టేషన్లు, సమీప ప్రాంగణాల్లో అధికారులు ఇటీవల విస్తృతంగా నీటి నాణ్యతా పరీక్షలు నిర్వహించారు. ఈ తనిఖీలలో ప్రధానంగా రెండు కీలక అంశాలపై దృష్టి పెట్టారు. మొదటిది… బ్యాక్టీరియా పరీక్షలు: డివిజన్ పరిధిలోని 99 రైల్వే స్టేషన్ల నుంచి ఏకంగా 633 నీటి శాంపిల్స్‌ను సేకరించి ల్యాబ్‌లలో పరిశీలించారు. ఆశ్చర్యకరంగా, ఈ 633 శాంపిల్స్‌లో ఒక్కటంటే ఒక్క శాంపిల్‌లో కూడా హానికరమైన బ్యాక్టీరియా ఉన్నట్లు తేలలేదు! నీరు తాగడానికి పూర్తిగా అనుకూలంగా ఉందని నివేదిక స్పష్టం చేసింది. రెండోది… క్లోరినేషన్ స్థాయిలు: నీటిలోని క్రిములను సంహరించి, నీటిని స్వచ్ఛంగా ఉంచడానికి క్లోరిన్ ఉపయోగిస్తారు. 83 స్టేషన్లలో ఏకంగా 9,571 సార్లు క్లోరిన్ స్థాయిలను పరీక్షించారు. ఇందులో 9,565 సార్లు నీరు నిర్దేశిత ప్రమాణాల ప్రకారమే ఉందని తేలింది. అంటే క్లోరిన్ పరీక్షల్లో 99.93 శాతం ఉత్తీర్ణత సాధించారు! “ఇదేంటి… వేల సంఖ్యలో పరీక్షలు చేస్తే ఒక్కచోట కూడా లోపం లేదా? ఇదంతా నమ్మశక్యంగా ఉందా?” అని మీకు అనిపిస్తోంది కదా? మీ అనుమానం నిజమే! అధికారులు జరిపిన తనిఖీల్లో ఆరు ప్రదేశాల్లో క్లోరిన్ స్థాయిలలో స్వల్ప తేడాలు, సమస్యలు ఉన్నట్లు గుర్తించారు. అయితే అధికారులు ఆ విషయాన్ని దాచకుండా, వెంటనే స్పందించి సంబంధిత విభాగాల ద్వారా ఆ లోపాలను సరిదిద్దే చర్యలు చేపట్టారు. ముఖ్యంగా నిత్యం వేలాదిమంది వచ్చే విజయవాడ ప్రధాన స్టేషన్‌లో 127 బ్యాక్టీరియా, 1,249 క్లోరిన్ పరీక్షలు చేశారు. భీమవరం సెక్షన్, అలాగే అత్యధికంగా పరీక్షలు జరిగిన తెనాలి డిపోలోనూ నీటి నాణ్యత అత్యుత్తమ ప్రమాణాలకు అనుగుణంగా ఉందని ధ్రువీకరించారు. ఇక అధికారులు తీసుకుంటున్న జాగ్రత్తలు & ప్రయోజనాలు విషయానికి వస్తే.. కేవలం ఒకసారి పరీక్షలు చేసి ఊరుకోవడం లేదు. రోజువారీగా ప్రయాణికులు వాడే ఈ నీటి నాణ్యతపై నిరంతరం పర్యవేక్షణ కొనసాగిస్తామని అధికారులు తెలిపారు. స్టేషన్లలో లభించే నీరు సురక్షితంగా ఉండటం వల్ల ప్రయాణికులకు రెండు రకాల ప్రయోజనాలు ఉన్నాయి. ఒకటి…ఆరోగ్య భద్రత: కలుషిత నీటి వల్ల వచ్చే టైఫాయిడ్, కలరా, డయేరియా వంటి నీటి ద్వారా వ్యాపించే వ్యాధుల భయం ఉండదు. రెండోది..ఆర్థిక ఊరట: ప్రతీ స్టేషన్‌లో ప్లాస్టిక్ వాటర్ బాటిళ్లు కొనే అవసరం తగ్గి, సామాన్య ప్రయాణికుడికి డబ్బు ఆదా అవుతుంది. మొత్తానికి విజయవాడ డివిజన్ గణాంకాలను పరిశీలిస్తే.. ప్రస్తుతం మన రైల్వే స్టేషన్లలో లభించే నీరు ప్రయాణికులు తాగడానికి పూర్తిగా సురక్షితమైనదేనని స్పష్టమవుతోంది. కాబట్టి, ఇకపై విజయవాడ డివిజన్ పరిధిలో ప్రయాణించేటప్పుడు కలుషిత నీటి భయాలు పక్కనపెట్టి నిశ్చింతగా దాహం తీర్చుకోవచ్చు!

మరిన్ని వీడియోల కోసం ఇక్కడ క్లిక్ చేయండి

Also Watch:

Maremma Jatara: ముళ్లకంపలపై పూజారి విన్యాసాలు..గాల్లో తిరిగే వింత ఆచారం..!

ఆస్తులు రాసిచ్చాం..! పిల్లలు పట్టించుకోవడం లేదు.. తల్లిదండ్రుల కన్నీటి గాథ

మొసళ్ల నదిలో 12 గంటలు.. 30 కి.మీ కొట్టుకొచ్చిన బామ్మ! చివరికి ఏమైందంటే?

సూపర్ మార్కెట్‌ ఏరియాలో భయానక దృశ్యం.. భయంతో జనం పరుగులు!

Cement Price Hike: ఇంటి నిర్మాణం చేపడుతున్నారా.. సిమెంట్‌ ధరలు పెరిగిపోతున్నాయ్‌ జాగ్రత్త!