మంజీరా నీళ్లు బంద్! సైబరాబాద్‌లో ఏం జరగబోతోంది? జనవరి నుంచి గడ్డుకాలమేనా?

హైదరాబాద్‌ అంటేనే హైటెక్ సిటీలు.. ఎత్తైన అపార్ట్‌మెంట్ భవనాలు.. గేటెడ్ కమ్యూనిటీలు.. లక్షలాది మంది ఐటీ ఉద్యోగులు. దేశంలోనే అత్యంత వేగంగా అభివృద్ధి చెందుతున్న నగరాల్లో హైదరాబాద్‌ ఒకటి. కానీ ఇప్పుడు ఇదే హైదరాబాద్‌కు నీటి కష్టాలు మొదలయ్యే పరిస్థితి కనిపిస్తోంది. అదీ వేసవిలో కాదు.. జనవరి నుంచే నీటి సరఫరాపై ఆందోళన మొదలైంది. ముఖ్యంగా సైబరాబాద్‌ ఐటీ కారిడార్‌లో నివసించే లక్షలాది కుటుంబాలకు ఈ నీటి సమస్య తప్పదా? మంజీరా నీటి సరఫరాలో కోత విధిస్తే అక్కడ పరిస్థితి ఎలా మారబోతోంది? అసలు హైదరాబాద్‌లో నీటి నిల్వలు ఎంత ఉన్నాయి? డీటెయిల్డ్ గా చూద్దాం.. హైదరాబాద్‌ నగరానికి నీటి సరఫరా విషయంలో కీలకమైన మంజీరా, సింగూరు జలాశయాల నుంచి నీటి లభ్యత తగ్గిపోతోంది. ఈ నేపథ్యంలో జనవరి 2027 నుంచి ఈ రెండు జలాశయాల నుంచి నీటి సరఫరాను తగ్గించాలని హైదరాబాద్‌ మెట్రోపాలిటన్‌ వాటర్‌ సప్లై అండ్‌ సీవరేజ్‌ బోర్డు యోచిస్తున్నట్లు సమాచారం. ప్రస్తుతం అందుతున్న 120 మిలియన్‌ గ్యాలన్ల నీటి సరఫరాను 20 MGDకి తగ్గించే ప్రతిపాదన ఉంది. అంటే రోజుకు దాదాపు 100 MGD నీటి సరఫరా తగ్గే అవకాశం ఉంది. ఈ ప్రతిపాదన అమల్లోకి వస్తే సైబరాబాద్‌ పరిధిలోని 3.5 లక్షలకు పైగా గృహ, వాణిజ్య నీటి కనెక్షన్లపై ప్రభావం పడే అవకాశం ఉంది. మరి ఈ నీటి కోత ప్రభావం ఎక్కడ ఎక్కువగా ఉండబోతోంది? ముఖ్యంగా హైదరాబాద్‌ పశ్చిమ ప్రాంతంలోని ఐటీ కారిడార్‌పై దీని ప్రభావం పడే అవకాశం ఉంది. గచ్చిబౌలి, మాదాపూర్‌, కొండాపూర్‌, నానక్‌రామ్‌గూడ, లింగంపల్లి, చందానగర్‌, మియాపూర్‌, మదీనాగూడ, బీరంగూడ, రామచంద్రాపురం, పటాన్‌చెరు ప్రాంతాల్లో నీటి సరఫరాపై ఒత్తిడి పెరగొచ్చు. అలాగే కూకట్‌పల్లి, కేపీహెచ్‌బీ, ప్రగతినగర్‌ ప్రాంతాల్లోనూ నీటి లభ్యతపై ఆందోళనలు వ్యక్తమవుతున్నాయి. అయితే ఈ ప్రాంతాలన్నింటికీ ఒకే స్థాయిలో నీటి కష్టాలు వస్తాయని చెప్పలేం. సరఫరా తగ్గింపు ఎంతమేర అమలవుతుంది? ఏ ప్రాంతాలపై ఎక్కువ ప్రభావం పడుతుంది? అనేది అధికారుల నిర్ణయాలపై ఆధారపడి ఉంటుంది. ముఖ్యంగా ఈ ప్రాంతాల్లో పెద్ద సంఖ్యలో అపార్ట్‌మెంట్లు, గేటెడ్‌ కమ్యూనిటీలు ఉన్నాయి. వందలాది కుటుంబాలు నివసించే భారీ భవనాలకు ప్రతిరోజూ వేల లీటర్ల నీరు అవసరం. సాధారణంగా మున్సిపల్‌ నీటితో పాటు బోర్‌వెల్స్‌ ద్వారా కూడా అవసరాలు తీర్చుకుంటుంటారు. కానీ భూగర్భ జలాలు కూడా తగ్గిపోతే పరిస్థితి మరింత కష్టంగా మారుతుంది. అప్పుడు ప్రైవేట్‌ వాటర్‌ ట్యాంకర్లపైనే ఆధారపడాల్సి వస్తుంది. ఇప్పటికే కొన్ని అపార్ట్‌మెంట్‌ అసోసియేషన్లు నీటి వినియోగంపై నియంత్రణలు విధిస్తున్నాయి. స్విమ్మింగ్‌ పూల్స్‌, ఫౌంటైన్లు, ల్యాండ్‌స్కేపింగ్‌ వంటి అవసరాలకు నీటి వినియోగాన్ని తగ్గిస్తున్నాయి. తాగడానికి, వంటకు, ఇతర నిత్యావసరాలకు నీటిని కేటాయించాల్సిన పరిస్థితి ఏర్పడుతోంది. నీటి సరఫరా మరింత తగ్గితే అపార్ట్‌మెంట్ల నిర్వహణ ఖర్చులు కూడా భారీగా పెరిగే అవకాశం ఉంది. వారానికి ట్యాంకర్ల కోసం లక్షల రూపాయలు ఖర్చు చేయాల్సి వస్తుందన్న ఆందోళన వ్యక్తమవుతోంది. మరోవైపు సైబరాబాద్‌ ఐటీ కంపెనీలకూ నీటి అవసరం చాలా ఎక్కువ. ముఖ్యంగా భారీ ఐటీ భవనాల్లో సెంట్రల్‌ ఎయిర్‌ కండిషనింగ్‌ వ్యవస్థలు, వాటర్‌ కూల్డ్‌ చిల్లర్లు పనిచేయడానికి నీరు అవసరం. నీటి లభ్యత తీవ్రంగా తగ్గితే కార్యాలయాల నిర్వహణపైనా ప్రభావం పడవచ్చు. పరిస్థితి మరింత క్లిష్టంగా మారితే కొన్ని సంస్థలు వర్క్‌ ఫ్రమ్‌ హోమ్‌ లేదా హైబ్రిడ్‌ విధానాలను పరిశీలించాల్సి రావచ్చు. అయితే ఇది ఇప్పటికైతే ఒక సంభావ్య పరిణామం మాత్రమే. ఇక హైదరాబాద్‌ నగరానికి నీటి సరఫరా విషయంలో మరో కీలకమైన ఆధారం నాగార్జునసాగర్‌. నగర తాగునీటి అవసరాల కోసం ఈ ప్రాజెక్టు నుంచి కూడా నీటిని విడుదల చేస్తున్నారు. అందులో హైదరాబాద్‌ అవసరాలకే రోజుకు సుమారు 1200 క్యూసెక్కుల నీరు అవసరమవుతోంది. వేసవి కాలంలో నగర తాగునీటి అవసరాల కోసం ఏటా దాదాపు 21 టీఎంసీల నీటిని వినియోగిస్తున్నట్లు సమాచారం. మరోవైపు సింగూరు ప్రాజెక్టులో మరమ్మతుల కారణంగా నీటి నిల్వలు, వినియోగంపై పరిమితులు ఏర్పడ్డాయి. ప్రస్తుతం అందుబాటులో ఉన్న నీటి నిల్వలు కూడా ఆందోళన కలిగిస్తున్నాయి. సింగూరులో సుమారు 2.55 టీఎంసీల నీరు ఉండగా.. అందులో డెడ్‌ స్టోరేజీకి పైన వినియోగించుకోగల నీరు 1.8 టీఎంసీలుగా ఉన్నట్లు సమాచారం. దీంతో హైదరాబాద్‌ నీటి అవసరాల భారం నాగార్జునసాగర్‌పై మరింత పెరిగే అవకాశం కనిపిస్తోంది. మొత్తంగా చూస్తే.. ఒకవైపు పెరుగుతున్న జనాభా.. మరోవైపు విస్తరిస్తున్న ఐటీ కారిడార్‌.. ఇంకోవైపు తగ్గుతున్న జలాశయాల నీటి నిల్వలు. ఈ మూడు అంశాలు హైదరాబాద్‌ నీటి భవిష్యత్తుపై ఆందోళన కలిగిస్తున్నాయి. జనవరి నుంచి మంజీరా నీటి సరఫరాలో కోత విధించే ప్రతిపాదన అమల్లోకి వస్తే సైబరాబాద్‌లో పరిస్థితి ఎలా ఉండబోతోంది? నగరానికి ప్రత్యామ్నాయ నీటి వనరులు ఉన్నాయా? వేసవి నాటికి నీటి సమస్య మరింత తీవ్రం కాకుండా అధికారులు ఎలాంటి చర్యలు తీసుకోబోతున్నారు? అనేది ఇప్పుడు కీలకంగా మారింది.

మరిన్ని వీడియోల కోసం ఇక్కడ క్లిక్ చేయండి

Also Watch:

పుష్ప సినిమాకు మించిన స్కెచ్‌.. మామూలుగా లేదుగా!

పండగ పేరుతో విచ్చలవిడి ఖర్చులు! ఈ తప్పు మీరూ చేస్తున్నారా?

ఇదెక్కడి గోల.. రెండేళ్ల కిందటి కరెంట్ బిల్లు ఇప్పుడు కట్టాలా?

బాసరకు వెళ్లే భక్తులకు గుడ్ న్యూస్.. హైదరాబాద్ నుంచి కొత్త రూట్ వచ్చేసింది

రూ.12 లక్షల కోట్ల పెట్టుబడులు.. 2.46 లక్షల ఉద్యోగాలు.. విశాఖ సమ్మిట్ టార్గెట్ ఏంటి?