హాంకాంగ్ తో అప్పగింత ఒప్పందం రద్దు…బ్రిటన్

చైనాకు, తనకు మధ్య విభేదాలు తలెత్తిన నేపథ్యంలో.. హాంకాంగ్ తో అప్పగింత ఒప్పందాన్ని రద్దు చేసుకుంటున్నట్టు బ్రిటన్ ప్రకటించింది. హాంకాంగ్ పై ఆధిపత్యానికి చైనా జాతీయ భద్రతా చట్టాన్ని తెచ్చింది. ఇప్పటికే డ్రాగన్ కంట్రీతో తలనొప్పులు తెచ్చుకుంటున్న బ్రిటన్ కి.. మధ్యలో ఈ హాంకాంగ్ ‘తకరారు’ కూడా తోడవడంతో.. ఇక ఆ నగరంతో ‘నేరస్థుల అప్పగింత’ ఒప్పందాన్ని రద్దు చేసుకుంది. ఇది తక్షణమే అమల్లోకి వస్తుందని విదేశాంగ మంత్రి డొమినిక్ రాబ్ పార్లమెంటులో ప్రకటించారు. అలాగే ఆయుధ నిషేధానికి సంబంధించి చైనాతో గల సుదీర్ఘకాల ఒప్పందాన్ని పొడిగిస్తున్నామని, తాజాగా ఈ నిషేధ నిబంధన హాంకాంగ్ కి కూడా వర్తిస్తుందని ఆయన చెప్పారు. అంటే స్వయం ప్రతిపత్తిగల ఆ ప్రాంతానికి కూడా తమ దేశం నుంచి ఎలాంటి ఆయుధాలూ ఎగుమతి కాబోవన్నారు. ఆస్ట్రేలియా, కెనడా దేశాలు ఈ నెలారంభంలోనే హాంకాంగ్ తో అప్పగింత ఒప్పందాలను రద్దు చేసుకున్నాయి.

2027 కల్లా చైనాలోని హువే టెక్నాలజీ సంస్థ నుంచి విడిభాగాలను తమ దేశ 5 జీ నెట్ వర్క్ తెప్పించుకోవడానికి స్వస్తి చెప్పాలని బ్రిటన్ ప్రధాని బోరిస్ జాన్సన్ ఆదేశించారు. అటు-అమెరికా చెప్పినట్టు బ్రిటన్ నడచుకుంటోందని చైనా ఆరోపిస్తోంది. సుమారు మూడు లక్షలమంది హాంకాంగ్ వాసులకు తమ దేశ తాత్కాలిక పౌరసత్వం ఇస్తామని బ్రిటన్ ఆ మధ్య చేసిన ప్రకటన పట్ల చైనా మండిపడుతోంది.