మాతృత్వానికి అడ్డురాని జాతి వైరం.. పాలిచ్చి కుక్కపిల్లను సాకుతున్న వానరం..!

ఖమ్మం జిల్లాలో చోటుచేసుకున్న ఒక అపురూప ఘటన ప్రస్తుతం సోషల్ మీడియాలో వైరల్ అవుతుంది. ఇది మానవత్వానికే ఒక గొప్ప పాఠం నేర్పుతోంది. సహజంగా కోతికి, కుక్కకు మధ్య జాతి వైరం ఉంటుంది. కానీ, ఇక్కడ మాత్రం ఒక వానరం ఆ వైరాన్ని మరచి, ఒక కుక్క పిల్లను తన సొంత బిడ్డలా సాకుతూ అందరినీ ఆశ్చర్యపరిచింది.

సత్తుపల్లి పట్టణంలోని కృషి బైపాస్ రోడ్డు పరిసర ప్రాంతాల్లో కోతుల గుంపులు ఎక్కువగా తిరుగుతుంటాయి. ఈ క్రమంలోనే సుమారు వారం రోజుల క్రితం, ఒక కోతి తన గుంపుతో కలిసి ఒక ఇంటి ఆవరణలోకి వచ్చింది. అక్కడ ఆడుకుంటున్న చిన్న కుక్క పిల్లను చూసిన ఆ కోతి, దానిపై దాడి చేయకుండా ఎంతో ప్రేమగా దగ్గరకు తీసుకుంది. ఆ నిమిషం నుంచి నేటి వరకు, ఆ కుక్క పిల్లను తన గుండెలకు హత్తుకుని వదలకుండా తిప్పుతోంది.

సాధారణంగా కోతులు ఆహారం కోసం లేదా భయంతో ఇతర జంతువులను వేధిస్తుంటాయి. కానీ ఈ కోతి మాత్రం ఆ కుక్క పిల్లకు ఎక్కడా దెబ్బ తగలకుండా, చెట్ల మీదకు, గోడల మీదకు దూకుతున్నప్పుడు కూడా తన చంకలోనే భద్రంగా పట్టుకుంటోంది. అంతేకాదు ఆ కుక్క పిల్ల ఆకలితో ఏడ్చినప్పుడు, ఆ వానరం మాతృత్వంతో దానికి పాలు ఇస్తూ ఆకలి తీరుస్తోంది. గుంపులోని ఇతర కోతుల నుంచి కూడా ఆ కుక్క పిల్లకు ఎలాంటి హాని కలగకుండా ఈ వానరం కాపాడుతోంది.

ప్రస్తుత సమాజంలో మనుషుల మధ్యే విద్వేషాలు పెరిగిపోతున్న తరుణంలో, నోరులేని జీవాలు ఇలాంటి ప్రేమను కనబరచడం అందరినీ ఆలోచింపజేస్తోంది. తోటి మనిషి ఆపదలో ఉంటే కనీసం పలకరించని ఈ రోజుల్లో, భిన్న జాతికి చెందిన జీవిని తన బిడ్డలా సాకుతున్న ఈ వానరం మాతృత్వానికి నిలువెత్తు నిదర్శనంగా నిలిచింది.

సత్తుపల్లి పట్టణ వీధుల్లో ఈ వింత దృశ్యాన్ని చూసేందుకు స్థానికులు ఎగబడుతున్నారు. వారం రోజులుగా ఆ కుక్క పిల్ల కోతి చెంతనే సురక్షితంగా ఉండటం చూసి జంతు ప్రేమికులు మురిసిపోతున్నారు. “ప్రేమకు భాష, జాతి అనే భేదాలు లేవు” అని ఈ మూగ జీవం నిరూపిస్తోంది.

వీడియో ఇక్కడ చూడండి..

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..