ప్రియురాలికి ప్రేమతో పుట్టిన రోజు కానుక.. విచిత్ర బహుమతితో జైలు పాలైన జంట! కథ కాదండోయ్..
ప్రియురాలిని ఖుషి చేయడానికి వినూత్నంగా ఆలోచించిన ఒక వ్యక్తి, కన్న కలలు చివరకు అతడిని జైలు పాలు చేశాయి. ప్రియురాలి పుట్టినరోజు కానుకగా ఒక అరుదైన ఒంటెమరిని గిఫ్ట్గా ఇవ్వాలని భావించిన యువకుడు, దాన్ని కొనడానికి సరిపడా డబ్బులు లేకపోవడంతో సమీపంలోని ఫామ్హౌస్ నుండి దొంగిలించాడు. అనంతరం దొంగతనం బయటపడుతుందనే భయంతో ఒక విచిత్రమైన కథ అల్లి పోలీసులకు అడ్డంగా చిక్కాడు..కట్చేస్తే ప్రేమికులిద్దరూ ఇప్పుడు కటకటాలు లెక్కించాల్సి వచ్చింది..అసలు విషయంలోకి వెళితే..
ప్రేమలో ఉన్నవారు తమ భాగస్వామిని సంతోషపెట్టడానికి రకరకాల కానుకలు ఇస్తుంటారు. కానీ, దుబాయ్లో ఒక వ్యక్తి తన ప్రియురాలి పుట్టినరోజును ప్రత్యేకంగా జరుపుకోవాలని చేసిన ప్రయత్నం ఊహించని మలుపు తిరిగింది. బర్త్డే గిఫ్ట్గా ఏకంగా ఒక కొత్తగా జన్మించిన అరుదైన ఒంటెమరిని దొంగిలించి, చివరకు కటకటాల పాలయ్యాడు.
దుబాయ్కి చెందిన ఒక యువకుడి ప్రియురాలికి ఒంటె అంటే ఎంతో ఇష్టం. ఆమె తన పుట్టినరోజు కానుకగా ఒక అరుదైన ఒంటెను ఇవ్వాలని కోరింది. అయితే సదరు జాతి ఒంటెను కొనుగోలు చేయడానికి ఆ వ్యక్తి వద్ద తగినంత డబ్బు లేదు. ఎలాగైనా ప్రియురాలి కోరిక తీర్చాలనే ఉద్దేశంతో, అతడు అక్రమ మార్గాన్ని ఎంచుకున్నాడు. తన నివాసం సమీపంలోని ఒక ఫామ్హౌస్లో కొత్తగా జన్మించిన ఒంటెమరి ఉందనే విషయాన్ని గుర్తించి, రాత్రి వేళ రక్షణ వలయాన్ని దాటి ఆ పసి ఒంటెను దొంగిలించి ప్రియురాలికి బహుమతిగా ఇచ్చాడు.
ఫామ్హౌస్ నుండి ఒంటెమరి కనిపించకుండా పోవడంతో యజమాని వెంటనే పోలీసులకు ఫిర్యాదు చేశారు. పోలీసులు రంగంలోకి దిగి గాలింపు చర్యలు చేపట్టినా ప్రారంభంలో ఎలాంటి ఆధారాలు లభించలేదు. కొన్ని రోజుల తర్వాత, సదరు దొంగిలించిన వ్యక్తే పోలీసులకు ఫోన్ చేసి, తన ఫామ్హౌస్ సమీపంలో ఒక తప్పిపోయిన పసి ఒంటె ప్రత్యక్షమైందని నాటకం ఆడటానికి ప్రయత్నించాడు.
మూల స్థానం నుండి దాదాపు 3 కిలోమీటర్ల దూరంలో ఉన్న రోడ్డును దాటుకుని అంత చిన్న ఒంటెమరి అంత దూరం ఒంటరిగా నడిచి వచ్చే అవకాశం లేదని పోలీసులు పసిగట్టారు. తీవ్రమైన శైలిలో విచారించడంతో, ఆ యువకుడు అసలు విషయాన్ని ఒప్పుకున్నాడు. పట్టుబడతామనే భయంతోనే తప్పిపోయిందంటూ నాటకమాడినట్లు అంగీకరించాడు.
విషయం తెలిసిన పోలీసులు, ఒంటెమరిని భద్రంగా స్వాధీనం చేసుకుని నిజమైన యజమానికి అప్పగించారు. దొంగతనానికి పాల్పడిన యువకుడితో పాటు, ఆ ఒంటెమరిని దొంగిలించినదిగా తెలిసి కూడా దగ్గర ఉంచుకున్న ప్రియురాలిపై కూడా కేసులు నమోదు చేసి ఇద్దరినీ అరెస్టు చేశారు. ఎంతటి ప్రేమైనా చట్టవ్యతిరేక మార్గంలో చూపిస్తే జీవితాలు ఎలా నాశనమవుతాయో చెప్పడానికి ఈ ఘటన ఒక విచిత్ర ఉదాహరణగా నిలిచింది.